12 Ноябр, 2026, 2 Жумадул сони, 1448
12 Ноябр, 2026, 2 Жумадул сони, 1448
— Тўрт нафар қизим бор. Эрим қиз туққаним учун бизни ташлаб уйдан чиқиб кетган. Ҳозирда умуман хабар олмайди. Шу фарзандларнинг уволи тутади-ми? Динимизда бундай оталар ҳақида нима дейилган?
— Аллоҳ таоло Қуръони Каримда бундай марҳамат қилади:
﴿لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاءُ يَهَبُ لِمَنْ يَشَاءُ إِنَاثًا وَيَهَبُ لِمَنْ يَشَاءُ الذُّكُورَ أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَنْ يَشَاءُ عَقِيمًا إِنَّهُ عَلِيمٌ قَدِيرٌ﴾
“Осмонлару ернинг мулки Аллоҳникидир. У зот хоҳлаган нарсасини яратур. У зот хоҳлаган кишисига қизлар ҳадя этур ва хоҳлаган кишисига ўғиллар ҳадя этур. Ёки уларни жуфтлаб ўғил-қиз қилиб берур ва хоҳлаган кишисини туғмас қилур. Албатта, У зот ўта билгувчи ва ўта қодирдир” (Шуро сураси, 49-50 – оятлар).
Инсонга ҳамма нарсани фақат Аллоҳ таоло беришининг ёрқин намунаси фарзанд масаласида кўринади. Айни шу масалада инсон ўзининг ожизлигини ҳис этади. Ўз хоҳишига кўра бирон нарсани бор қила олмаслигини, Аллоҳ таолонинг мадади ва иноятига муҳтож бўлиб туришини англаб етади.
Абу Саъийд Худрий розияллоҳу анҳудан ривоят қилинади. Набий соллаллоҳу алайҳи васаллам: “Кимнинг учта қизи бўлса ёки учта синглиси бўлса ёхуд икки қизи ёки икки синглиси бўлса, у уларнинг суҳбатини яхши қилган бўлса ва уларнинг ҳаққида Аллоҳга тақво қилган бўлса, унга жаннат берилур”, дедилар (Имом Термизий, Имом Абу Довуд ривояти).
Қиз кўргани учун аёл айбдор-ми?! Кимга қандай фарзанд ато этишни Аллоҳ таолонинг Ўзи билади. Саволда кўзда тутилган эркак пасткашлик қилган, Аллоҳ таолонинг қазои қадарига рози бўлмаган, аёлини масъулликда айблаб, унга туҳмат қилган, ўзининг зиммасидаги оталик масъулиятини ҳис қилмаган, нафақа деган муҳим вожиб амални тарк этган кимса ҳисобланади. Агар у ўзини тузатиб, тавба қилиб, оиласини қайтариб олиб келмаса, дунёда ҳам, охиратда ҳам оғир аҳволда қолади. Валлоҳу аълам!
Муҳаммад Айюб ҲОМИДОВ
Жорий йилнинг 18 ноябрь куни Самарқандда илк бор XIV "Global Waqf" анжумани бўлиб ўтади. Мазкур нуфузли халқаро тадбирга тайёргарлик жараёнлари билан яқиндан танишиш мақсадида 11 ноябрь куни "Вақф" хайрия жамоат фонди раҳбари Зайниддин домла Эшонқулов Самарқандда бўлди.
Сафар давомида дастлаб Имом Бухорий мажмуаси зиёрат қилинди. Зиёрат чоғида Қуръони карим тиловат қилиниб, савоби буюк муҳаддис Имом Бухорий ҳазратлари руҳларига бағишланди.
Шундан сўнг Зайниддин домла Эшонқулов Малайзиянинг "Yayasan Restu" фонди асосчиси ва раҳбари Абдуллатиф Мираса ҳамда Nasyrul Quran академияси ижрочи директори Шайх Абдуллоҳ Собҳи Мареи билан учрашди. Мулоқот давомида ўзаро ҳамкорлик алоқаларини янада ривожлантириш, Қуръони карим нашри, диний-маърифий лойиҳалар ва келгусидаги истиқболли ташаббуслар юзасидан фикр алмашилди.
Шунингдек, Зайниддин домла Эшонқулов "Yayasan Restu" фонди томонидан барпо этилган Nasyrul Quran меҳмонхонасининг очилиш маросимида иштирок этди.
Маълумот ўрнида айтиш жоизки, Nasyrul Quran академияси "Yayasan Restu" фондининг йирик лойиҳаларидан бири бўлиб, Қуръони каримни нашр этиш, мусҳафларни тайёрлаш, хаттотлик, безак санъати ва сифат назорати йўналишларида фаолият юритади. Nasyrul Quran академияси Қуръони каримни чоп этиш кўлами бўйича дунёда иккинчи йирик марказ ҳисобланади.
Алоҳида таъкидлаш керакки, "Yayasan Restu" фонди "Вақф" хайрия жамоат фонди билан изчил ҳамкорлик қилиб келмоқда. Хусусан, ўзаро ҳамкорлик доирасида Малайзия томони "Вақф" фондига 20 минг нусхада Қуръони карим ҳадя этган. Ушбу хайрли ташаббус икки ташкилот ўртасидаги мустаҳкам алоқалар, ўзаро ишонч ва диний-маърифий соҳадаги эзгу мақсадлар муштараклигининг ёрқин намунасидир.
Сафар давомида, шунингдек, 18 ноябрь куни Самарқандда ўтказиладиган XIV "Global Waqf" анжуманига тайёргарлик ишлари ҳам атрофлича кўздан кечирилди. Тадбирни юқори савияда ташкил этиш, халқаро меҳмонларни муносиб кутиб олиш, анжуман дастури ва ташкилий жараёнларини самарали мувофиқлаштириш билан боғлиқ масалалар муҳокама қилинди.
Маълумот учун, XIV "Global Waqf" анжумани "Вақф ва исломий ижтимоий молияга янгича ёндашув: бошқарув, стандартлар, инновациялар ва барқарор ривожланиш йўллари" мавзусида ташкил этилади. Унда дунёнинг 30 дан ортиқ мамлакатларидан нуфузли вакиллар, соҳа мутахассислари ва халқаро ташкилотлар вакиллари иштирок этиши кутилмоқда.
"ВАҚФ" ХАЙРИЯ ЖАМОАТ ФОНДИ ижтимоий тармоқлари
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 