Misr Arab Respublikasining al-Azhar universiteti Frantsiyaning Nitstsa shahridagi hujumgv munosabat bildirdi. Ushbu munosabatda jumladan shunday deyiladi:   

Al-Azhari sharif va uning rahbari Shayxul-azhar  Doktor Ahmad Toyyib hazratlari Frantsiyaning Nitstsa shahridagi Notr Dam cherkovi yaqinida uch kishining o'limiga va boshqalarning jarohatlanishiga sabab bo'lgan mash'um terror hujumini qat'iyan qoralaydi. 

Al-Azhar har qanday holatda ham terroristik harakatlarni oqlab bo'lmasligini, ushbu xatti harakatlar nafaqat Islom dinining, balki barcha ilohiy dinlarning bag'rikenglik ta'limotiga zid ekanini ta'kidlaydi. Shu bilan birga har qanday zo'ravonlik, ekstremizm va murosasizlik harakatlariga qarshi kurash zaruratini yana bir bor eslatib o'tadi. 

Azhari sharif ushbu jirkanch terror hodisasini qoralash bilan birga, xalqlar orasida zo'ravonlik va nafrat ritorikasi kuchayib borayotgani haqida ogohlantiradi. Ayniqsa, gap boshqalarning e'tiqodi haqida ketganda donolik, aql va ijtimoiy mas'uliyatga sodiqlikni ustun qo'yishga chaqiradi. 

Al-Azhar qurbon bo'lganlarning oilalari va frantsuz xalqiga hamdardlik bildiradi, Allohdan jarohat olganlar tezroq sog'ayib ketishini so'rab duo qiladi.

Manba: azhar.eg