23 Май, 2026, 5 Зулҳижжа, 1447
23 Май, 2026, 5 Зулҳижжа, 1447
20 сентябрь куни ижтимоий тармоқларда “Вақф” фонди фаолияти ҳақида яна асоссиз хабарлар тарқалди. Биз ушбу хабарларда нима дейилгани, қандай ёлғон тўқилгани тўғрисида тўхталмоқчи эмасмиз.
Фонд томонидан шу йил 9 ойи давомида бажарилган энг асосий хайрия ишларни баён қиламиз, хулоса эса Сиз азизлардан.
1593 нафар фуқарога моддий ёрдам берилди
1593 нафар кам таъминланган, ёрдамга муҳтож оилаларга 1 миллиард 841 миллион 587 минг сўмлик моддий ёрдам ҳамда 80 миллион сўмлик 40 дона ногиронлик аравачалари тарқатилди.
3 кишининг турар жойи таъмирланди
Ёрдамга муҳтож 3 нафар фуқаронинг уйлари 8 923 000 сўмлик Фонд маблағлари ва ҳомийларни жалб этган ҳолда қайта таъмирланди.
770 та имомга 370 миллион сўм ойлик маош берилди
“Вақф” фонди томонидан шу йил январь ойидан бошлаб жойлардаги 770 та олис ҳудудда жойлашган ва кам даромадли масжидлар имом-хатибларига ойлик маошлари учун ҳар ой 370 миллион сўм миқдорда маблағ ажратилмоқда.
“Модул” янги диний таълим тизимига 190 миллион сўм ажратилди
Тошкент ислом институтида янги ташкил этилган “Модул” таълим тизимида жойлардаги масжидларда меҳнат қилаётган ўрта махсус маълумотга эга бўлган имомларни олийлаштириш бошланди. Шу муносабат билан 60 ўринга мўлжалланган дарс хоналар, ўқув предметлари, таълим дастгоҳлари, ошхона ва ётоқхона учун 190 миллион сўм маблағ сарфланди.
8 минг аҳоли ичимлик суви билан таъминди
Шу йил февраль ойида Сурхондарё вилоятидаги “Боғи Обод”, “Себзор” ва “Эҳтиром” маҳаллаларида истиқомат қилаётган 8 минг нафар аҳоли тоза ичимлик суви билан таъминди. Бу ишларга жами 70 000 000 (етмиш миллион) сўм сарфланди.
157 миллион сўмлик Рамазон туҳфалари
Қорақалпоғистон Республикаси, Тошкент шаҳри ва вилоятлардаги ижтимоий ҳимояга муҳтож оилаларга Рамазон ойида 157 миллион сўмлик озиқ-овқат маҳсулотлари тарқатилди.
2 миллиард сўм закот маблағлари ҳақдорларга етказилди
Рамазон ойида 2 миллиард сўм закот ва хайрия маблағлари ҳақдорларга етказди.
70 та йирик ва 260 та кичик қорамол гўштлари улашилди
Фонд ва ҳудудий филилаллар томонидан “Қурбонлик – 2019” хайрия тадбирлари ташкил этилиб, улар доирасида 70 га яқин йирик ва 260 га яқин кичик қорамол қурбонлик қилинди. Йигирма мингга яқин кам таъминланган, боқувчисини йўқотган фуқароларга қурбонлик гўштлари тақсимлаб берилди.
Мурувват карвони
“Мурувват карвони” хайрия тадбирида 200 нафар ижтимоий ҳимояга муҳтож, имконияти чекланган ва боқувчисини йўқотган шахсларга озиқ-овқат маҳсулотлари, ногиронлиги бор шахсларга ногиронлик аравачалари тақдим қилинди. Тадбирлар доирасида жами 190 миллион сўм маблағ сарфланди.
3000 дона Қуръони карим ҳадя қилинди
“Ҳилол-нашр” нашриётида чоп этилган 93 миллион сўмлик 3000 дона Қуръони карим китоблари барча вилоятлардаги жоме масжидларга ҳадя қилинди.
14 миллион сўмлик китоб улашилди
14 миллион сўмлик диний китоблар Навоий вилоятидаги 15 та масжидга етказилди. Тошкент шаҳридаги “Сузук ота” масжиди кутубхонаси учун 3,7 миллион сўмлик диний китоблар тақдим этилди.
Ўқув-тўлов шартномалари тўланди
Тошкентдаги Хадичаи Кубро ўрта махсус аёл-қизлар ислом билим юртининг 10 нафар талаба қизларига 2-семестр учун 27 050 000 сўм ўқув шартнома пули тўлаб берилди.
“Кўкалдош” ўрта махсус ислом билим юртининг 5 нафар эҳтиёжманд талабасига 16 250 000 сўмлик ўқув-шартнома пули тўлаб берилди.
Бухоро вилоятидаги “Жўйбори Калон” аёл-қизлар ўрта махсус ислом билим юртига 30 миллион сўмлик 10 дона компьютер жамланмаси берилди.
Оққон беморларга дори-дармон берилди
Республика гематология ва қон қуйиш илмий текшириш институтида даволанаётган оқ қон (лейкоз) касаллиги билан касалланган беморларнинг 85 нафарига 137 миллион сўм ёрдам пуллари берилди.
70 миллион сўм сурдо таржимага сарфланди
Эшитиш ва гапиришда нуқсони бор фуқаролар учун барча вилоятларда жума маърузаларини сурдо таржималарини намойиш қилиш лойиҳаси бўйича 70 миллион сўм маблағ ажратилди.
7 та никоҳ ва 35 та суннат тўйи
Навоий шаҳрида ҳомийлар ёрдамида 7 та никоҳ ва 35 нафар боланинг суннат тўйи ўтказиб берилди. Ёш оилаларга хайрия тариқасида 3 500 000 сўмлик электр-техника жиҳозлари, суннат тўйи ўтказилаётган болаларга эса велосипед ва кийим-кечаклар етказиб берилди.
“Вақф-мед” дорихоналари
Тошкент шаҳридаги “Олтинтепа” маҳалласи ҳудудида биринчи “Вақф-мед” дорихонаси ташкил этилди. Савдодан тушган маблағ вақф мулкларини шакллантириш ва хайрия ишларига йўналтирилмоқда. Айни пайтда дорихонани дори маҳсулотлари билан бойитиш ишлари олиб борилмоқда.
Нон ва нон маҳсулотлари
Нон ва нон маҳсулотлари ишлаб чиқариш корхонасида бир кунда 2 минг дона қолипли нон ишлаб чиқарилмоқда. Ўз навбатида айтиш керакки, нон ва нон маҳсулотларини ишлаб чиқариш ўзига хос қатъий талаблари бўлгани боис, ушбу шароитларни ҳозирлаш учун мазкур цех бир неча кун фаолият олиб бормади. Шунингдек, ушбу цехга тоза ичимлик суви олиб келиш учун ҳам бир неча кун сарфланди. Айни кунларда цехнинг фаолияти бир маромда давом этмоқда.
Вақф ерлари
Тошкент вилояти Қибрай туманида жойлашган 16 гектар Фондга ажратилган ер майдонида бугунги кунда лимон ва кунгабоқар экинлари парваришланмоқда.
Ўз навбатида айтиш керакки, “Вақф” фонди Устави фаолиятига асосан вақф мулкларини шакллантириш учун ишлаб чиқариш корхоналари, савдо дўконлари ва хизмат кўрсатиш шаҳобчалари очиш мумкин. Тушган даромаднинг тегишли қисми хайрия ишларига йўналтирилади.
Зиёратгоҳларни обод қилиш
2018 – 2019 йиллар давомида зиёратгоҳларни қурилиш-таъмирлаш, ободонлаштириш, коммунал тўловларни тўлаш ва 750 нафарга яқин зиёратгоҳларда меҳнат қилаётган ишчи-хизматчиларнинг иш ҳақлари ва бошқа харажатларга жами 17,1 млрд. сўм маблағ сарфланган.
Ҳомийлар маблағларини жалб этиш ва йўналтириш
Ўз навбатида айтиш керакки, “Вақф” фонди ҳисоб рақамларига тушган маблағлардан ташқари Фонд масъулларининг саъй-ҳаракатлари ва қўли очиқ кишиларнинг мурувватлари билан ҳам жуда катта хайрия ишлари амалга оширилмоқда. Масалан, Қашқадарё, Самарқанд, Бухоро, Жиззах ва Наманган вилоятларининг энг олис ва чекка ҳудудларида жойлашган бир неча масжидларнинг бунёд этиш ишларига 1 миллиард сўмдан зиёд маблағ миқдоридаги қурилиш материаллари етказилган.
Хулоса
Юртимиздаги ўзгаришлар натижасида юз йилдан кейин тикланган, эндигина 1,5 ёшга тўлиб-тўлмаган “Вақф” фондини барчамиз қўллаб-қувватлайлик!
Фонд фаолияти шаффоф бўлиб, маблағлар айланиши ва сарф-ҳаражатларини онлайн кузатиш мумкин.
Ҳар қандай саъй-ҳаракат бор жойда хато бўлиши мумкин, иш-ҳаракатсиз жойдагина нуқсон бўлмайди.
Шундай экан Сиз азизларнинг Фонд равнақи йўлида берган ҳар бир таклиф ва мулоҳазаларингизни самимий қабул қиламиз.
Ҳақ таоло барчамизни тўғри йўлда собитқадам айласин!
“Вақф” хайрия жамоат фонди Матбуот хизмати
Бисмиллаҳир Роҳманир Роҳийм
Ҳар йили баҳорнинг сўнгги кунларида юртимиздаги минглаб мактабларда «Сўнгги қўнғироқ» тадбирлари бўлиб ўтади. Бу кун — йиллар давомида олинган билимларнинг сарҳисоби, катта ҳаёт бўсағасидаги илк қадамдир. Аммо, минг афсуски, кейинги йилларда бу қувончли кун баъзи оилалар учун битмас-туганмас куйиниш, айрилиқ ва фалокат кунига айланиб бормоқда. Кўз-кўз қилиш, мақтаниш ва масъулиятсизлик оқибатида ёш умрлар завол топмоқда.
Омонатга хиёнат ва нафсга қуллик.
Ислом дини инсон ҳаётини энг олий қадрият деб билади. Аллоҳ таоло бандаларига ўз жонини хатарга қўйишни, беҳуда ҳалок қилишни тақиқлаб, Қуръони каримда бундай марҳамат қилади: «...Ўз қўлларингиз билан ўзларингизни ҳалокатга ташламанг! Яхшилик қилинг! Албатта, Аллоҳ яхшилик қилувчиларни яхши кўради» (Бақара сураси, 195-оят).
Битирув куни ёшларга қимматбаҳо машиналарни ишониб топшириш, уларнинг тезликни ошириб, кўчаларда тартибсизлик (автокалонналар) уюштиришига кўз юмиш — мана шу оятга зид иш тутишдир. Бу ота-оналар томонидан фарзанд ҳаётини ўз қўли билан ҳалокатга топшириш билан баробардир.
Пайғамбаримиз Муҳаммад Мустафо соллаллоҳу алайҳи васаллам ҳадисларида марҳамат қиладилар: "Ҳеч бир банда қиёмат куни тўрт нарсадан сўралмагунча жойидан жилмайди: умрини нимага сарф қилгани, ёшлигини қандай ўтказгани, мол-давлатини қаердан топиб, нимага сарфлагани ва илмига қандай амал қилгани ҳақида" (Имом Термизий ривояти).
Битирувчи ёшлар ва уларнинг ота-оналари «биз ёшлигимизни ва топган молимизни шу бир кунлик дабдабага қандай сарфладик?» деган саволга жавоб беришни унутмасликлари лозим.
Исроф ва сохта обрў илинжи «Сўнгги қўнғироқ» тадбирларида ресторанлардаги дабдабали базмлар, қимматбаҳо совғалар ва кийим-бошлар учун қилинадиган харажатлар исрофнинг олий намунасидир. Ваҳоланки, ўша маблағларни боланинг олий таълим олишига, китобларига ёки касб-ҳунар ўрганишига йўналтириш мумкин эди.
Ислом дини исрофни қаттиқ қоралайди. Аллоҳ таоло айтади:
«Қариндошга, мискин ва йўловчига (хайр-эҳсон қилиш билан) ҳақларини адо этинг ва исрофгарчиликка мўл-кўл йўл қўйманг! Чунки исрофгарлар шайтонларнинг биродарларидир...» (Исро сураси, 26-27-оятлар).
Шайтоннинг дўстига айланиб, Аллоҳ берган неъматни кўкка совуриш ҳеч бир мўминга тўғри келмайди. Бир кунлик «орзу-ҳавас» деб қилинган исроф ортидан қанча оилалар қарз ботқоғига ботаётгани ҳам сир эмас.
Аччиқ, аммо ҳаётий мисоллар: Ҳар йили 25 май куни ОАВ ва ижтимоий тармоқларда бир хил мазмундаги мудҳиш хабарлар тарқалади: «Битирувчилар иштирокида мудҳиш ЙТҲ содир бўлди: 3 нафар йигит воқеа жойида ҳалок бўлди...» ёки «Дарахтга бориб урилган Каптива ичидаги мактаб битирувчилари шифохонага ётқизилди...». Бу шунчаки статистика эмас, бу — бузилган оилалар, фарзанд доғида куяётган оналар, сочлари бир кечада оқарган оталар фожиасидир. Куни кеча мактаб фоясида аттестат олаётган ўғил ёки қизнинг эртасига қабр ичида ётганини кўришдан кўра даҳшатлироқ мусибат борми?!
Ҳали ҳаёт нималигини тушуниб етмаган, оила қуриб, жамиятга нафи тегмаган ёш ниҳолларнинг ўз хатоси ёки ота-онанинг «болам бошқалардан кам бўлмасин» деган сохта ғурури туфайли тупроққа қорилиши — энг катта трагедиядир.
Нима қилмоқ керак? Мавзуни шунчаки муҳокама қилиш кифоя эмас, амалий чоралар кўриш вақти келди: Ота-оналар масъулияти: Фарзандингизга қиммат машина калитини эмас, келажакка бўлган масъулият ҳиссини беринг. Сўнгги қўнғироқ куни уларнинг қаерда ва ким билан эканини қаттиқ назорат қилинг.
Ёшлар фаросати: Сиз — ота-онангизнинг умидисиз. Бир лаҳзалик мақтаниш ва тезлик ишқи сизни тириклик неъматидан, ота-онангизни эса сиздан жудо қилмасин.
Тадбирларни илмга йўналтириш: Ресторандаги базмлар ўрнига, мактаб кутубхонасига китоб совға қилиш, эҳтиёжманд синфдошларга ёрдам бериш каби хайрли амалларни анъанага айлантириш лозим.
Хулоса шуки «Сўнгги қўнғироқ» ҳаётнинг тугаганини эмас, балки гўзал ва масъулиятли янги бир босқич бошланганини билдирувчи рамз бўлиши керак. Шошқалоқлик, манманлик ва исроф билан бу кунни мотамга айлантирмайлик. Зеро, Аллоҳ таоло бизга берган ҳаёт ва фарзанд неъмати — эртага Қиёматда ҳар бир сонияси учун жавоб бериладиган улуғ омонатдир!
Исломхон Ҳамидов,
Наманган шахар Боқимирзо жоме масжиди имом ноиби
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 