Жорий йилнинг 9 ноябрь куни Ўзбекистон мусулмонлари идораси Фарғона вилояти вакили, вилоят бош имом-хатиби Убайдуллоҳ домла Абдуллаев масжидларда олиб борилаётган қурилиш ва таъмирлаш ҳамда куз-қиш мавсумига тайёргарлик жараёнлари билан танишиш мақсадида Қўштепа туманига ташриф буюрди.
Тумандаги «Қорашбува» жоме масжидининг дастлабки биноси хўжалик иншооти сифатида қурилган бўлиб, кейинчалик масжидга мослаштирилган. Юртимизда диний-маърифий соҳада олиб борилаётган ислоҳотлар самараси ўлароқ мазкур масжид ҳам айни вақтда янги лойиҳа асосида қайта қад кўтармоқда.
Вилоят бош имом-хатиби қурилиш жараёни, у ерда олиб борилаётган ишлар билан яқиндан танишар экан, янги бунёд этилаётган масжид ва унга ҳамоҳанг бўлган қўшимча бинолар ҳам замонавий архитектура талабларига жавоб бериши, мўмин-мусулмонларнинг ибодати учун ҳар томонлама қулай бўлишини эътиборга олиниши ҳам халқимизга узоқ йиллар хизмат қилиши, бир сўз билан айтганда, узоқни кўзлаб иш олиб бориш зарурлигини таъкидлади.
«Эшонгузар» ва «Дўрмон» масжидларига уюштирилган ташриф асносида таҳоратхоналар ҳолати, куз-қиш мавсумига тайёргарлик бўйича амалга оширилаётган ишлар билан танишилиб, зарурий тавсиялар берилди.
Р.Жалилов,
Фарғона вилояти вакиллиги ходими
Убода ибн Сомит розияллоҳу анҳудан ривоят қилинган ҳадисда Набий соллаллоҳу алайҳи васаллам: "Кимки мўмин ва мўминалар ҳаққига истиғфор айтса, Аллоҳ унга ҳар бир мўмин ва мўмина ҳисобида биттадан яхшилик ёзади", деганлар.
Шарҳ: Агар бирор (таниган ва танимаган) мўмин-мўминанинг ҳаққига истиғфор айтсангиз, Аллоҳ таоло бунинг эвазига ўша мўмин ва мўмина номидан сизга яхшилик (савоб) ёзади.
Аллоҳ таоло бундай марҳамат қилади: "Эй Роббимиз, мени, ота-онамни ва мўминларни ҳисоб қилинадиган куни мағфират айлагин" (Иброҳим сураси, 41-оят).
Аллоҳим Одам алайҳиссаломдан то Қиёматга қадар келадиган жамики мўмин-мусулмонларнинг гуноҳларини мағфират этгин.