03 Июн, 2026, 16 Зулҳижжа, 1447
03 Июн, 2026, 16 Зулҳижжа, 1447
2020 йил 13 апрель куни Ўзбекистон, Қозоғистон ва Қирғизистон давлатлари мусулмонлари идораларининг масъул ходимлари иштирокида видео-конференция ўтказилди.
Онлайн мулоқотда Ўзбекистон мусулмонлари идораси раисининг биринчи ўринбосари Ҳомиджон Ишматбеков, бўлим мудири Муҳаммад Аюбхон Ҳомидов, Қозоғистон мусулмонлари идораси Фатво бўлими мудири Сансызбай Шоқанов, мудир ўринбосари Ҳасан Аманқулов, Қирғизистон мусулмонлари идораси Уламолар Кенгаши раиси Абибилла Кадырбердиев ва мазкур мамлакатлар диний идораларининг масъул ходимлари иштирок этди.
Суҳбатда милодий 2020 йил, ҳижрий 1441 йил Рамазон ойи ва ҳайитининг биринчи кунини (янги ой ҳилолини) кузатиш, ҳозирги пандимея даврида жамоат билан таровиҳ намозини ўқиш, масжидларда хатми Қуръонлар қилиш, жамоавий ифторлар уюштиришни вақтинча чеклаш ҳамда закот, фитр садақаси ва фидя миқдорини белгилаш борасида ўзаро фикрлар алмашилди.
Айниқса, карантин даврида жамоат билан таровиҳ намозини ўқиш, масжидларда кўпчилик билан хатми Қуръонлар уюштириш ва жамоавий ифторлар ўтказиш айни кунларда инсон ва жамият саломатлиги учун катта хавф эканига иттифоқ қилинди. Шунингдек, фитр садақаси буғдой, ун, арпа, майиз ва хурмо маҳсулотларининг нархи билан ҳисоблаб, эълон қилишга келишилди.
Ушбу мажлисда уламолар Ислом дини манбалари ва астрономик маълумотларга таянган ҳолда 2020 йилда Рамазон ойи ва ҳайитининг биринчи куни қайси кунга тўғри келиши Шаъбон ойини кузатиб бориш ва Рамазон ойи ҳилолини аниқлаш бўйича келгусида ушбу давлатлар муфтийлари билан кенгашиб, кейин эълон қилинишига хулоса қилинди.
Таъкидлаш жоизки, Рамазони шариф ойи ҳадиси шарифга биноан ҳилолнинг кўриниши билан бошланишини инобатга олган ҳолда Рамазон ойи ҳилолининг кўриниши қайси кунга тўғри келишини аниқлаш борасида Абу Райҳон Беруний номидаги Астрономия институти мутахассислари билан ҳам ҳамкорлик ишлари олиб борилмоқда.
Инша Аллоҳ, яқин кунларда 2020 йилги Рамазон ойининг қайси куни бошланиши эълон қилинади.
Ўзбекистон мусулмонлари идораси Матбуот хизмат
Бисмиллаҳир Роҳманир Роҳийм
Ибратли ҳикоялар
Бисмиллаҳир Роҳманир Роҳийм
Ассалому алайкум ва раҳматуллоҳи ва баракатуҳу
Ҳикоямиз мактабда ўқитувчи бўлиб ишлайдиган аёл ҳақида. Унинг турмуш ўртоғи фабрикада ишлайдиган жуда банд инсон эди. Унинг кундузи ҳам, кечаси ҳам деярли бўш вақти бўлмасди.
Кунларнинг бирида ўқитувчи ўқувчиларига ўз орзулари ҳақида иншо ёзиш вазифасини берди. Болалар иншо ёзишга киришдилар. Дарс тугагач, устоз барча иншоларни йиғиб олиб, баҳолаш учун уйига олиб кетди.
Ўқитувчи иншоларни бирин-кетин ўқиб чиқар экан, тўсатдан бир иншога кўзи тушиб, қаттиқ йиғлаб юборди. Шу пайт эри хонага шошилиб кириб:
— Нима бўлди? — деб сўради.
Аёл:
— Мана шу иншони ўқиганим учун йиғлаяпман, — деди.
— Нега? Иншо нима ҳақида экан? Қани, бир кўрайчи.
— Сизга ўқиб берайми?
— Майли, ўқинг.
— Бир боланинг орзуси телефон бўлиш экан.
— Нима?!
— Ҳа, у шундай деб ёзибди: «Телефон бўлишни хоҳлайман».
Аёл иншони ўқишда давом этди:
«Аллоҳим, мени телефонга айлантириб қўй. Шунда бутун оилам — ота-онам, ака-укаларим ва опа-сингилларим менга эътибор беришади.
Аллоҳим, мени телефонга айлантир. Чунки отам ишдан уйга келганда менга қарамайдилар, аммо телефондан бошларини кўтармайдилар. Соатлаб видеолар томоша қиладилар.
Аллоҳим, мени телефонга айлантир. Шунда онам уйга келганларида менга бақирмайдилар. Ахир телефон билан кулиб, мамнун бўлиб вақт ўтказадилар-ку!
Аллоҳим, мени телефонга айлантир. Токи телефоннинг ўрнини мен эгаллай.
Аллоҳим, мен кўп нарса сўрамайман. Фақат оилам атрофимда тўпланиши учун телефон бўлишни хоҳлайман, холос».
Ота аёлининг йиғлаётганини кўриб:
— Қандай бечора бола экан! Унинг ота-онаси жуда ҳам бепарво кўринади, — деди.
Бу гапни эшитган аёл янада қаттиқроқ йиғлай бошлади.
Эри ҳайрон бўлиб:
— Нега яна йиғлаяпсиз? — деб сўради.
Аёл кўз ёшлари ичида жавоб берди:
— Ўғлимиз менинг синфимда ўқишини ва мен унинг ўқитувчиси эканимни унутдингизми? Бу иншони сизнинг ўғлингиз ёзган...
Ҳурматли ота-оналар!
Илтимос, фарзандларингизга вақт ажратинг. Ҳеч қачон уларни ҳис-туйғулардан маҳрум деб ўйламанг. Болалар жуда таъсирчан бўладилар. Улар ҳатто энг кичик нарсаларга ҳам эътибор берадилар.
Фарзандингизнинг юзидаги умид ва қувонч табассумини кўришни хоҳлайсизми? Бу сиз уларга қанча пул берганингизда ёки қандай ўйинчоқ, велосипед олиб берганингизда эмас. Балки уларга кўрсатадиган меҳрингиз, эътиборингиз ва ажратадиган вақтингиздадир.
Ибн Умар розияллоҳу анҳумодан ривоят қилинади. Расулуллоҳ соллаллоҳу алайҳи васаллам: “Ҳар бирингиз мутасаддидир ва ҳар бирингиз қўл остидагилари учун масъулдир”, деганлар.
Даврон НУРМУҲАММАД
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 