Сайт тест ҳолатида ишламоқда!
10 Июл, 2025   |   15 Муҳаррам, 1447

Тошкент шаҳри
Бомдод
03:17
Қуёш
04:59
Пешин
12:33
Аср
17:41
Шом
20:02
Хуфтон
21:36
Bismillah
10 Июл, 2025, 15 Муҳаррам, 1447

Имом Бухорий халқаро илмий-тадқиқот марказида тарғибот тадбири бўлиб ўтди

24.01.2021   1450   1 min.
Имом Бухорий халқаро илмий-тадқиқот марказида тарғибот тадбири бўлиб ўтди

Имом Бухорий халқаро илмий-тадқиқот марказида Президентимизнинг Олий Мажлисга Мурожаатномаси мазмун-моҳияти ва унда илгари сурилган ташаббусларни халқимизга етказиш мақсадида тадбир ўтказилди.

Унда марказ жамоаси, Ҳадис илми мактаби ўқитувчи ва талабалари ҳамда Ўзбекистон халқаро ислом академияси ҳузуридаги малака ошириш маркази Самарқанд минтақавий филиали тингловчилари иштирок этди.

Ўзбекистон давлат санъат ва маданият институти ректори Иброҳим Йўлдошев ва Самарқанд давлат чет тиллар институти ректори Илҳом Тўхтасинов сўнгги йилларда юртимизда амалга оширилаётган кенг кўламли ислоҳотлар, фан-таълим, маданият, тиббиёт соҳаларини ривожлантириш, иқтисодий барқарорликни таъминлаш бўйича олиб борилаётган ишлар ҳақида сўз юритди. Ушбу йўналишларда эришилаётган ютуқлар ҳаётий мисоллар билан тушунтирилди.

Президентимизнинг Олий Мажлисга йўллаган Мурожаатномаси ҳам ушбу эзгу саъй-ҳаракатларнинг мантиқий давоми бўлгани, унда илгари сурилган таклиф ва ташаббуслар юртимиз тараққиётига хизмат қилиши эътироф этилди.

– Давлатимиз раҳбари Мурожаатномада калом илмининг асосчиси, буюк мутаккаллим Абу Мансур Имом Мотуридий ҳазратларининг “Тириклик ҳикматини соғлиқда, деб билгин”, деган чуқур маъноли ҳикматларини ёдга олдилар, - деди Имом Бухорий халқаро илмий-тадқиқот маркази директори Ш.Зиёдов. - Дунё халқларини ларзага солган коронавирус пандемияси даврида бу ҳикматнинг нечоғли аҳамиятга эга эканлигини халқимиз чуқур ҳис этди. Албатта, халқимизга, ёшларимизга аждодларимизнинг кимлигини танитсак, уларнинг илмий меросини чуқур ўргатсак, уларнинг орасидан адашганлар чиқмайди. Аксинча, юртимизни янада тараққий эттиришга муносиб ҳисса қўша оладиган етук кадрлар, улуғ алломаларимизга муносиб ворислар етишиб чиқади.

Тадбир доирасида Президентимиз томонидан Мурожаатномада илгари сурилган энг муҳим ташаббуслар акс этган видеоролик намойиш этилди.

Ғ.Ҳасанов, ЎзА

Ўзбекистон янгиликлари
Бошқа мақолалар
Мақолалар

Жамоат ҳақининг гуноҳи оғир!

10.07.2025   230   1 min.
Жамоат ҳақининг гуноҳи оғир!

Ўзбекистон Республикаси Бош прокуратураси хабар беришича, май ойининг 13-санасида бир кунда 3 млрд сўмлик энергоресурсларини талон-торож қилиш ҳолатлари аниқланган. Афсуски, бугун бундай газ ва электр энергияга яширинча уланиб, давлатга миллиардлаб зарар етказган кимсалар ҳақидаги хабарларни тез-тез ўқиб қоламиз.

 

Бировнинг, айниқса, халқ ҳақидан қўрқмай ўғрилик орқали манфаат топмоқчи бўлаётган инсонлар орамизда кўплаб топилади. Бундайларнинг наздида газ, сув, электр энергия туганмас бойлик. Ундан ҳар ким ўз манфаати йўлида фойдаланиши мумкин. Бироқ бу неъматлар хонадонларга кириб бориши учун минглаб инсонлар меҳнат қилишини, давлат эса миллиардлаб маблағ сарфлашини, улар ҳам бир кун тугаб қолишини хаёлига ҳам келтирмайди.

 

Аслида ушбу неъматлардан оқилона фойдаланиш, исроф қилмаслик нафақат фуқаролик мажбуриятимиз, балки инсоний вазифамиз, мўминлик бурчимиздир.

 

Айтиш жоизки, уйда, ишда, кўчада коммунал тўловлар атрофида айланаётган қатор муаммолар ҳақида кўп эшитамиз, баъзан ўзимиз унинг гувоҳи ёки бевосита иштирокчисига айланамиз. Лекин бу муаммолар тўловни ўз вақтида амалга оширмаслик ёки айрим нобоп кимсаларнинг қилмиши оқибатида юзага чиқаётгани ёдимизга ҳам келмайди. Тўловларни имкон бўла туриб асоссиз баҳоналар ёки ўз вақтида тўламаслик ёки ҳисоблагич жиҳозларини тес­карига айлантириш ёхуд ҳар хил ҳийлалар ишлатиб, уларни тўлашдан қочиш давлатнинг ва халқнинг ҳақини ейиш ҳисобланади. Чунки табиий бойликлар давлат ва халқ мулкидир.

 

Қолаверса, коммунал хизматлардан фойдаланиш учун ҳар бир хонадон таъминотчилар билан шартнома тузиб, қўл қўйган ва ўзаро келишувда тўловни ўз вақтида адо этишга келишган. Шу боис тўловларни вақтида адо этишимиз шаръан ҳам жоиз.

 

Таъкидлаш лозимки, халқнинг мулкида барча фуқаролар, хусусан, кам таъминланганлар, ногиронлар, етим-есирлар, кексаларнинг ҳақи бор. Улардан фойдаланишга келганда фаол бўлиб, тўловга келганда қочаётган, пайсалга солаётганлар юқорида зикр этилган қат­ламларнинг ҳам ҳақини ўзлаштириб, ноҳақ еяётганини билиб олсинлар. Зеро, Қуръони каримда: “Эй иймон келтирганлар, бир-бир­ларингизнинг молларингизни ботил йўл билан еманглар” (Нисо сураси 29-оят), дея огоҳлантирилган. Шундай бўлгач, ҳар бир фуқаро ўзгаларнинг молига, айниқса, жамоат мулкига хиёнат этмаслиги даркор! Бунга ­эътиборсизлик охиратда ёмон оқибатларга олиб келиши мумкин.

 

Ҳавла бинти Амр розияллоҳу анҳо ривоят қилган ҳадисда Расулуллоҳ соллаллоҳу алайҳи ва саллам бундай деганлар: “Баъзи бир одамлар Аллоҳнинг мулки (жамоат пуллари)га хиёнат қилади. Қиёмат куни улар жаҳаннамга равона бўлишади” (Имом Бухорий ривояти). Шундай экан, бу масалага жиддий ёндашишимизга тўғри келади.

 

Шунингдек, газ, электр энергия ва сув каби неъматлардан оқилона фойдаланиш ҳам динимиз талабидир. Зеро, Пайғамбаримиз соллаллоҳу алайҳи ва саллам: “Иқтисод қилган кимса камбағал бўлмас, маслаҳат қилган пушаймон бўлмас” (“Мушкотул на­собиҳ”), деб тавсия берганлар.

 

Ибн Аббос розияллоҳу анҳудан ривоят қилинган ҳадиси шарифда Набий соллаллоҳу алайҳи ва саллам: “Солиҳ ҳидоят, гўзал кўриниш ва иқтисодли бўлиш набийликнинг етмишдан бир жузидир”, дедилар (Имом Бухорий ривояти).

 

Демак, доим аҳли солиҳлардан бўлиб, тежамкор бўлиш, исрофга йўл қўймаслик, ҳар бир нарсани ўз ўрнида, меъёрида тасарруф қилиш, керагидан ортиқ, беҳудага сарфламаслик набийликнинг етмиш жузидан бир жуз, етмиш бўлагидан бир бўлак экан. Буни ҳар бир мўмин-мусулмон яхши англаб, ҳаётига татбиқ қилиши лозим.

 

Хулоса қилиб айтганда, ҳалоллик инсон ҳаётини хотиржам, осойишта ва фаровон қи­лади. Шундай экан, коммунал тўловларни ўз вақтида тўлаб, халқ ҳақига хиёнат қилмайлик, азизлар! 

Ғайрат БОЗОРОВ,

Деҳқонобод тумани “Оқработ ота”

жоме масжиди имом-хатиби

Мақолалар