Joriy yilning 12 dekabr kuni Uchtepa tumani “Ayollar maslahat markazi”da Toshkent shahrida faoliyat yuritayotgan otinoyilarning diniy, ma’naviy-ma’rifiy bilim salohiyatlarini oshirish maqsadida “Buyuk mazhabboshi – Imomi A’zam” mavzusida o‘quv seminar bo‘lib o‘tdi.
O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita va O‘zbekiston musulmonlari idorasi tomonidan tashkil etilgan ushubu senminarda Toshkent shahar hokimligi va boshqa mutasaddi tashkilotlarning mus’ul xodimlari ishtirok etdi.
Seminarda bugungi kunda dunyo musulmonlarining aksariyati Hanafiy mazhabiga ergashishi, ushbu mazhabning zamon va makonga moslashuvchanligi, shar’iy qoidalarning ishonchli va puxtaligi haqida ma’lumotlar berildi.
Shahar otinoyilari tomonidan Imomi A’zam rahmatullohi alayhning bolaliklari, ustozlari, shogirdlari va asarlari hadislar va ma’ruzalar asosida yoritib berildi.
Shuningdek, o‘quv seminarida otinoyilar doimo o‘z ustida ishlab, bilim salohiyatini oshirib borishi, bunda hozirgi kunda yurtimiz ulamolari tomonidan chop etilayotgan kitoblardan foydalanishi hamda diniy idora tashabbusi bilan internetda aqoid, tajvid, tafsir, hadis, fiqh fanlaridan olib borilayotgan onlayn darslarini kuzatib borishlari tavsiya qilindi.
Tadbir davomida jamiyatimizdagi ayrim: mushkulkushod, bibiseshanba kabi bid’at-xurofotlarning oldini olish bo‘yicha ham kerakli tavsiyalar berildi.
O‘zbekiston musulmonlari idorasi
matbuot xizmati
Bugun, 4 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari juma namozini Samarqand shahridagi "Namozgoh" jome masjidida ado etdilar.
Jamoat namozidan oldin Muftiy hazratlari jomega yig‘ilganlarga qadim Samarqand shahrida bo‘layotgan "Markaziy Osiyo – Yevropa Ittifoqi" birinchi sammiti xalqaro iqlim forumining ahamiyati haqida so‘zlash barobarida “O‘zgalarga ozor bermaslik – dinimiz talabi” mavzusida suhbat qilib berdilar.
Muftiy hazrat ma’ruza davomida ahillik, birodarlik, o‘zaro hamjihatlik bo‘lgan yurtda taraqqiyot, ravnaq va el-yurt osoyishtaligi-yu farovonligi hukm surishi, aksincha qay bir jamiyatda murosasizlik, o‘zaro xusumat kuchaysa, bunday jamiyatlarda urush va mojarolar avj olib, yurt vayron, el parokanda bo‘lishini bayon etdilar. Shuningdek, o‘zga din vakillariga ham ozor bermaslik, ular bilan jamiyatda tinch-osuda, ahil-inoq bo‘lib yashash zarurligi haqida so‘z yuritdilar.
Mav’iza asnosida o‘zgalarga ozor berish dinimizda katta gunohlardan biri sanalishi, Qur’oni karimdagi: “Mo‘min va mo‘minalarga qilmagan gunohlari bilan ozor beradigan kimsalar bo‘hton va aniq gunohni o‘zlariga olgan bo‘lurlar” (Ahzob surasi, 58-oyat), degan mazmundagi oyati karimani sharhlab, unda o‘zgalarga ozor yetkazish nojoizligi, bu ozor yetkazishning har qanday ko‘rinishini o‘z ichiga olishi, o‘zgalarga ozor bermaslik sadaqaning bir turi ekanini hayotiy misollar bilan so‘zlab berdilar.
Mazmunli suhbat yakunida Muftiy hazratlari Haq taolo barchaga ikki dunyo saodatini nasib qilishini so‘rab, elu yurtimiz haqqiga xayrli duolar qildilar.
O‘zbekiston musulmonlari idorasi Matbuot xizmati