Бугун, 20 декабрь куни Ўзбекистон Республикаси Президенти давлат маслаҳатчиси Рустам Камилов, Дин ишлари бўйича қўмита раиси Ортиқбек Юсупов, Ўзбекистон мусулмонлари идораси раиси, муфтий Усмонхон Алимов ҳазратлари ва бир неча уламолардан иборат делегация Озарбайжон давлатининг Боку шаҳрида ўтказиладиган халқаро анжуманда иштирок этиш учун жўнаб кетди.
Озарбайжонда 2017 йилни “Ислом бирдамлиги йили” деб эълон қилиниши муносабати билан ушбу давлат ташаббуси билан қатор маърифий йиғинлар ўтказилиб келинмоқда.
Шу йил 18 октябрь куни Тошкент шаҳрида Озарбайжон давлати билан ҳамкорликда ўтказилган “Ислом ҳамжиҳатлиги: Ўзбекистон ва Озарбайжон мисолида” номли халқаро конференция ҳам мана шу тадбирлар сирасидан эди. Шунингдек, бу йўналишдаги анжуманлар Испания, Туркия, Россия, Эрон каби мамлакатларда ҳам ўтказилди.
Йил давомида амалга оширилган тадбирларнинг якуни сифатида 2017 йил 21-22 декабрь кунлари Озарбайжон давлатининг пойтахти Боку шаҳрида “2017 йил – Ислом ҳамжиҳатлиги йили: динлараро ва маданиятлараро мулоқот” номли халқаро анжуман бўлиб ўтади. Унда 40 дан ортиқ давлатлардан 200 га яқин дин пешволари, уламолар, олимлар, муфтийлар ва соҳа мутахассислари иштирок этиши кутилмоқда.
Мазкур тадбирлар Ислом дини қадриятларини асраб-авайлаш, турли нохолис қарашлардан ҳимоя қилиш ва мусулмон давлатлари ўртасида ҳамкорлик алоқаларини мустаҳкамлашга қаратилганлиги билан жуда ҳам аҳамиятлидир.
Анжуманда муҳокама қилинадиган долзарб масалаларни сайтимизда мунтазам ёритиб боришни режалаштирганмиз. Бизни кузатиб боринг.
Ўзбекистон мусулмонлари идораси
Матбуот хизмати
Савол: Масжиддаги жамоатда баъзан олдинги сафдаги одамнинг кийими калта бўлгани учун саждада орқаси қисман очилиб қолади ва бехосдан унга кўзимиз тушиб қолади. Шу ҳолатда таҳорат ёки намозимиз бузилмайдими?
Жавоб: Бисмиллаҳир Роҳманир Роҳийм. Уламолар таҳорат ва намозни бузувчи омилларни бирма-бир санаганлар. Улар ичида бировнинг авратига кўз тушиб қолиш сабабли бузилади, деган гап йўқ. Бировнинг, хоҳ аёлнинг, хоҳ эркакнинг авратига қараш сабабли бавл ёки бирор суюқлик чиқмаса, таҳорат синмайди. Аммо бу дегани қараш, назар солиш мумкин экан, деб тушунмаслик керак. Чунки бундай ишлар асло мумкин эмас.
Бир нарсани ёдда тутиш лозимки, намоз ўқиш учун тайёрланаётган инсон намоз ўқиш асносида авратлари очилиб қолмаслигининг чорасини кўриши керак бўлади. Чунки бир рукн (фарз амали) миқдорича авратининг тўртдан бири очилиб турса, унинг намози бузилади. Валлоҳу аълам.
Ўзбекистон мусулмонлари идораси
Фатво маркази