Kecha, 6 yanvar kuni Diniy idorada Qur’on musobaqasini o‘tkazish bo‘yicha tashkiliy qo‘mitaning yig‘ilishi bo‘lib o‘tdi. Unda shu kunga qadar musobaqani o‘tkazish bo‘yicha qilingan ishlar va galdagi muhim vazifalar kelishib olindi.
Yig‘ilishda Abdulhakim qori Matqulov so‘zga chiqib, muhtaram Prezidentimizning 2017 yil 1 sentyabr kuni “Hazrati Imom” majmuasidagi Qur’on musobaqasini o‘tkazish bo‘yicha bergan ko‘rsatmalari va shu yo‘nalishdagi diniy idora rahbariyati topshiriqlarining ijrosi bo‘yicha tashkiliy qo‘mita tomonidan bajarilgan ishlar haqida ma’lumot berdi. Jumladan, u joylarda ishtirokchilarni ro‘yxatga olish davom etayotgani, 22 nafar hakamni tayyorlash bo‘yicha mashg‘ulotlar o‘tkazilgani, ishtirokchilarni ro‘yxatga olish va tayyorgarlik jarayonlarini ko‘zdan kechirish maqsadida, hakamlar viloyatlarga xizmat safariga yuborilgani, musobaqa bannerlari va nishonlari ishlab chiqilgani hamda mazkur jarayonlar internet saytlarida keng yoritib borilayotganini bayon qildi.
O‘zbekiston musulmonlari idorasi raisi, muftiy Usmonxon Alimov hazratlari yig‘ilishda so‘z olib, musobaqaning har bir jihatiga jiddiy hozirlik ko‘rish, musobaqani juda keng ko‘lamda o‘tkazish, tuman-shahar va viloyat bosqichlarini ham yuqori kayfiyatda bo‘lishini ta’minlash borasida ko‘rsatmalar berdilar. Musobaqa ishtirokchilarining chiqishlarini baholashda adolat va shaffoflikka qat’iy amal qilish, tanish-bilishchilikka mutlaqo yo‘l qo‘ymaslikni alohida qayd etdilar. Hatto xorijdagi mutaxassislar ham musobaqani katta qiziqish bilan kutishayotgani va bu ishlar kelgusida xalqaro musobaqa o‘tkazish uchun zamin bo‘lishini ta’kidladilar. Shuningdek, muftiy hazratlari so‘zlarida davom etib, muhtaram Prezidentimiz Qur’on musobaqasini eng yuqori darajada o‘tkazish uchun barcha shart-sharoitlarni muhayyo qilib berayotganlarini katta mamnunlik bilan izhor qildilar.
Muftiy hazratlari so‘zlarining yakunida, Davlatimiz rahbari tomonidan biz mo‘min-musulmonlarga berilayotgan imkoniyatlar va ushbu musobaqani o‘tkazish borasida ham kutilmagan xushxabarlar hali oldinda ekanini bildirib o‘tdilar. Muftiy hazrat bir hafta davomida Diniy idorada baholash mezoni buyicha jiddiy tayergarlikdan o‘tgan hakamlarning bundan keyingi ishlariga Allohdan madad so‘rab, muvaffaqiyat tiladilar.
O‘zbekistonlik qorilarning eng tabarruk ustozi Yahyo qori Turdiyev zoti shariflarining xayrli duolari bilan yig‘ilish yakunlandi.

O‘zbekiston musulmonlari idorasi
Matbuot xizmati