Сайт тест ҳолатида ишламоқда!
20 Сентябр, 2024   |   17 Рабиъул аввал, 1446

Тошкент шаҳри
Бомдод
04:50
Қуёш
06:09
Пешин
12:21
Аср
16:35
Шом
18:26
Хуфтон
19:40
Bismillah
20 Сентябр, 2024, 17 Рабиъул аввал, 1446

Раҳмат ойида яна бир мега лойиҳа

17.05.2018   2662   1 min.
Раҳмат ойида яна бир мега лойиҳа

Ҳурматли порталимиз мухлислари. Бошланган Рамазони шариф барчамизга муборак бўлсин!

Ўзбекистон мусулмонлари идорасининг muslim.uz портали ижодкорларидан Раҳмат ойида яна бир мега лойиҳа.

Навбатдаги лойиҳамиз “Онлайн ифторлик суҳбатлари” деб номланади. Ушбу лойиҳамизда юртимизнинг кўзга кўринган уламоларининг ифторлик маросимларидаги мавъизаларини ижтимоий тармоқ саҳифамиз орқали тўғридан тўғри узатилади.

Маълумки, ифторликка яқин рўзадорнинг дуоси қабул бўлиши ҳадисларда келтирилган. Буни англаган аксарият инсонлар ана шу ғанимат дамларда дуо ва зикр билан машғул бўлади. Энди Сиз ҳам илоҳий раҳмат ёғилиб турган маҳалда уйингизда туриб, Фейсбукдаги саҳифамиз орқали ҳар куни бир олимнинг Рамазонга оид манфаатли маърузасидан баҳраманд бўласиз. Маъруза якунида кўпчиликнинг дуосига қўшилиб, савобга шерик бўласиз.

Ушбу лойиҳани ишга туширишимиздан кўзланган асосий мақсад – Рамазон ойининг ҳар дақиқасини ғанимат билиб, ажру савобга эга бўлиш ва вақтни мазмунли ўтказишдир. Шунингдек, ҳукуматимизнинг тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солиш тўғрисидаги қарорига мувофиқ ифторлик маросимини ҳам ихчам, оила даврасида ўтказишни тарғиб қилишдир.

Янги лойиҳа барчамиз учун манфаатли бўлсин!

Эслатиб ўтамиз, бугун “Ҳазрати Али” жоме масжиди имом-хатиби Салоҳиддин домла Шариповнинг ифторлик суҳбатларидан баҳраманд бўласиз.

Ўзбекистон мусулмонлари идораси

Матбуот хизмати

Ўзбекистон янгиликлари
Бошқа мақолалар
Мақолалар

“ҳар бирингиз жаҳаннамга тушувчидирсиз” оятини қандай тушунамиз?

20.09.2024   116   4 min.
“ҳар бирингиз жаҳаннамга тушувчидирсиз” оятини қандай тушунамиз?

Бисмиллаҳир Роҳманир Роҳийм

Cавол: Қуръони каримнинг Марям сурасида: “Сизлардан ҳар бирингиз унга (жаҳаннамга) тушувчидирсиз. (Бу) Раббингиз (иродасига биноан) вожиб бўлган ҳукмдир”, деган оятни Шайх Абдулазиз Мансурнинг Қуръони карим маънолар таржимасида ўқиб қолдим. Ушбу оятдан мўмин-мусулмонлар ҳам дўзахга тушадими? Шу ҳақда батафсил тушунтириб берсангиз.

Жавоб: Бисмиллаҳир Романир Роҳийм. Аллоҳ таоло Марям сурасининг 70-72-оятларида бундай марҳамат қилади: “Сизлардан ҳар бирингиз унга (жаҳаннамга) тушувчидирсиз. (Бу) Раббингиз (иродасига биноан) вожиб бўлган ҳукмдир. Сўнгра тақводор бўлганларни (ундан) қутқарурмиз ва золим кимсаларни тиз чўккан ҳолларида (жаҳаннамда) қолдирурмиз”.

Ушбу ояти каримадаги: “Сизлардан ҳар бирингиз унга (жаҳаннамга) тушувчидирсиз”, жумласини муфассирлар томонидан турлича тафсир қилинган бўлиб, қуйида уларнинг энг машҳурларини келтириб ўтамиз:

1. Мўминларнинг жаҳаннам устидаги кўприкдан ўтишлари назарда тутилган.

Машҳур саҳоба Абдуллоҳ ибн Масъуд розияллоҳу анҳу оятни бундай тафсир қилганлар. Тобеинлардан Ҳасан Басрий ва Қатода ҳамда муфассирлар шайхи Ибн Жарир Табарий, Аллома Шавконий каби бир жамоа уламолар ушбу тафсирни ихтиёр қилишган. Муфассирлар бунга Сирот кўпригидан ўтиш ҳақидаги барча ҳадисларни далил қилганлар.

 

2. Барча халойиқ дўзахга кириши, мўминлар иймони сабабли у ерда азоб-уқубатсиз чиқарилишлари назарда тутилган.

Машҳур саҳоба Абдуллоҳ ибн Аббос розияллоҳу анҳу оятни шундай тафсир қилганлар. Имом Бағавий, Жалолиддин Суютий, Исмоил Ҳаққий, Муҳаммад Амийн Шинқитий ва бошқа кўплаб муфассирлар ушбу тафсирни устун кўришган. Жобир Абдуллоҳ розияллоҳу анҳу ушбу оят тафсири ҳақида Пайғамбаримиз алайҳиссаломдан ривоят қилган қуйидаги ҳадис буни қўллайди: “Яхши бўлсин ва ёмон бўлсин бирорта одам дўзахга кирмай қолмайди. Худди (гулҳан) Иброҳим алайҳиссаломга саломат бир макон бўлгани каби дўзах ҳам мўминга салқин ва саломат жой бўлади. Ҳатто мўминларнинг салқинидан дўзахнинг қичқириғи бўлади. Сўнгра Аллоҳ тақводор бўлганларни дўзахдан қутқаради ва золим кимсаларни тиз чўккан ҳолларида жаҳаннамда қолдиради” (Имом Аҳмад ривояти).

 

3. Мўминларнинг дўзахга кирмасдан унинг олдида – маҳшаргоҳда тўпланиб туришлари назарда тутилган.

Машҳур тобеин Убайд ибн Умайр ибн Қатода шундай тафсир қилганлар. Ушбу тафсирни араб тилидаги услуб ҳам қўллайди. Масалан арабларда تَرِدُ الْمَاءَ (таридул мааъа) деганда “сувнинг олдига келиб, ўша сувдан ичмаслик”ка айтилади. Бундан оятда келган “وَرَدَ” сўзи ҳам дўзах олдига келиб, унга кирмаслиги тушунилади.

Ушбу ояти каримани бундан бошқа тафсир қилганлар ҳам бор, лекин энг машҳур ва мўътабарлари шулар.

Мазкур тафсирлардан қайси бири тўғри бўлишидан қатъи назар, мўминлар Қиёмат куни дўзахни ўз кўзлари билан кўришлари ва ундан Аллоҳ нажот бериши келиб чиқади. Бунинг ҳикмати шуки, мўмин киши иймоннинг нақадар буюк неъмат эканини ҳис қилади. Ўша иймон унинг қўлидан етаклаб, жаннатга соғ-саломат олиб киради. Шунинг учун Аллоҳ таоло бизга ушбу масалани эслатиб, Қуръонда бундай деган: Бас, (ўша куни) ким дўзахдан узоқлаштирилиб, жаннатга киритилса, демак, у (катта) ютуққа эга бўлибди” (Оли Имрон сураси, 185-оят).

Аммо кофир кимса эса, унга аввал жаҳаннам кўрсатилади. Дўзахга киришидан олдинги ушбу кўриш кофир учун ҳасрат, надомат ва қўрқув бўлади. Чунки у бироздан кейин ўша дўзахга киришини, ундан қутулолмаслигини билади. Тавфиқ Аллоҳдан.

Ўзбекистон мусулмонлари идораси

Фатво маркази.

Мақолалар