Bugun, 6 oktyabr' kuni O'zbekiston musulmonlari idorasi raisi muftiy, Shayx Nuriddin Holiqnazar hazratlari Toshkent shahridagi “Ko'kcha Oqtepa” jome masjidida juma namozini jamoat bilan ado etdilar.

Juma namozi avvalida Muftiy hazratlari keksalarimizning borligi biz uchun ulkan baxt-saodat ekani, ularning qilgan duolari tufayli Alloh taolo bizlarni turli balo-ofatlardan saqlashi haqida go'zal ma'ruza qilib berdilar.

Shayx Nuriddin Holiqnazar hazratlari manfaatli mav'iza davomida Islom insonlarni bir-biriga yaxshilik qilishga targ'ib etishi, bunda keksalarga yanada ko'proq e'tibor qaratish, ularning hurmatini joyiga qo'yish lozimligini alohida ta'kidladilar.

Shuningdek, har bir inson yaxshilik va solih amallar bilan yashab keksayishga harakat qilishi kerakligi, zero, hadisi sharifda Payg'ambarimiz sollallohu alayhi va sallam: “Yo Rasululloh, odamlarning yaxshisi kim?” degan savolga: “Umri uzun, amali go'zal bo'lgan odam” deya javob berganlari bayon etildi.

O'zbekiston musulmonlari idorasi
Matbuot xizmati