Latviyada rus tilida nashr etiladigan «Freecity» jurnalida «Turizm O'zbekiston iqtisodiyotining harakatlantiruvchi kuchlaridan biriga aylanmoqda» sarlavhali maqola bosilib chiqdi, deb xabar bermoqda «Dunyo» AA muxbiri.
Unda O'zbekiston o'z iqtisodiyotida turizmga alohida o'rin ajratayotgani qayd etilgan. «Sayyohlik bu yil pandemiyadan tiklanmoqda, deyiladi maqolada. – 2022 yil sentyabr' oyiga kelib O'zbekistonga kelgan xorijlik sayyohlar soni 2021 yilga nisbatan uch baravar ko'paydi. Yil boshidan buyon sayyohlik eksporti hajmi 926 million dollarni tashkil etdi. Horijiy sayyohlarning qolish muddati o'rtacha 4-5 kunga, xarajatlari esa 305 dollargacha oshdi. Mahalliy sayyohlar soni ham o'tgan yilga nisbatan 3,5 barobarga ortib, 7,5 million kishiga etdi».
Maqolada O'zbekiston Prezidenti tashabbusi bilan Samarqandda «Buyuk ipak yo'li» xalqaro sayyohlik markazi tashkil etilgani ma'lum qilingan. Ushbu ko'p funktsiyali markaz 8 ta zamonaviy mehmonxona, kongress-xoll, «Boqiy shahar» majmuasi, amfiteatr va boshqa ko'plab inshootlarni o'z ichiga oladi.
Materialda kayd etilganidek, O'zbekiston turizmining yana bir istiqbolli yo'nalishi bu ziyorat turizmidir. O'zbekistonda 1,2 mingdan ortiq ziyoratgoh bor. Agar bu imkoniyatdan to'liq foydalanilsa yiliga kamida 1 million sayyohni jalb qilish mumkin.
«Umuman olganda, kelgusi yili 7 million xorijiy va 12 million mahalliy sayyohni jalb qilish, sayyohlik xizmatlari eksportini 2 milliard dollarga etkazish uchun barcha imkoniyatlar mavjud», deb yozadi «Freecity».

O'zbekiston musulmonlari idorasi matbuot markazi