Самимий мулоқот
2023 йил 7 сентябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Арман-Апостоллик черковининг Москва ва Новонахичеван епархияси раҳбари Езрас Нарсесянни қабул қилдилар.
Мулоқотда Дин ишлари бўйича қўмита раиси ўринбосари Дилшод Маматқулов, Ўзбекистондаги Арман Апостол черкови руҳонийси Аванес Григорян ва бир қатор мутасаддилар иштирок этди.
Учрашувда қадим-қадимдан Ўзбекистон заминида турли миллат, элат ва дин вакиллари аҳил-иноқ яшаб келаётган диёр экани, барчанинг асосий мақсади тинчлик ва осойишталикни таъминлаш ва эртанги тараққиёти учун ҳисса қўшиш эканига урғу қаратилди.
Самимий руҳда ўтган суҳбатда мамлакатимиздаги янгиланиш ва ислоҳотлар кенг қулоч ёзаётгани, Давлатимиз раҳбари томонидан миллатлараро тотувлик ва конфессиялараро ҳамкорликка берилаётган алоҳида эътибор мамлакатимиз тараққиётида янги даврни бошланишига замин яратганига алоҳида эътибор қаратилди.
Юртимиздаги бундай ижобий ўзгаришлар дунё ҳамжамиятида Ўзбекистонга бўлган қизиқишни янада ошириб, унинг халқаро майдондаги нуфузини тобора мустаҳкамлаётгани меҳмонлар томонидан юксак эътироф этилди.
Ўзбекистон мусулмонлари идораси Матбуот хизмати
Ҳудудларда отинойилар ўртасида «Заковат» баҳслари ўтказилди
Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг ташаббуслари билан хотин-қизларнинг маънавий-маърифий савиясини юксалтириш ва интеллектуал салоҳиятини оширишга қаратилган хайрли лойиҳалар изчил давом этмоқда.
Шу мақсадда Ўзбекистон мусулмонлари идорасининг Хотин-қизлар масалалари бўйича бўлими ташаббуси ҳамда масъуллари бевосита иштирокида жойларда бош имом-хатибларнинг хотин-қизлар масалалари бўйича ёрдамчилари ва маҳалла отинойилари ўртасида «Заковат» интеллектуал беллашувлари ташкил этилмоқда.
Хусусан, мазкур билимлар баҳси Тошкент шаҳри, Хоразм ва Сурхондарё вилоятларида кўтаринки руҳда бўлиб ўтди:
-
Тошкент шаҳрида кечган баҳсларда отинойилар тарихий, адабий, мантиқий ва диний билимларини синовдан ўтказди. Якунда «Тасним» жамоаси 1-ўринни эгаллади, «Маърифат соҳибалари» 2-ўринга, «Оқилалар» жамоаси эса 3-ўринга муносиб кўрилди.
-
Хоразм вилоятида «Илм — зиё, тафаккур — камолот сари йўл!» шиори остида ўтган беллашувда ЎМИ Хотин-қизлар масалалари бўйича бўлими бошлиғи Дилфуза Эгамова, диний соҳа вакиллари ҳамда ҳудуд отинойилари қатнашиб, билим ва тажриба алмашишди.
-
Сурхондарё вилоятида эса иштирокчилар ижтимоий-сиёсий, ақидавий-фиқҳий ва мантиқий саволларга жамоавий тарзда жавоб бериб, юқори тайёргарлик намойиш этди ҳамда республика босқичи йўлланмаларини қўлга киритди.
Мазкур интеллектуал тадбирлар жамиятда, хусусан, оилалар ва хотин-қизлар орасида маънавий соғлом муҳитни мустаҳкамлашда фидойилик кўрсатиб келаётган отинойиларнинг дунёқарашини янада кенгайтириш ва ўзаро ҳамжиҳатлигини кучайтиришга хизмат қилади.
Беллашувлар сўнгида ғолиб ва совриндорларга ташкилотчилар томонидан диплом ҳамда эсдалик совғалари топширилди.
Ўзбекистон мусулмонлари идораси
Матбуот хизмати
