“Йўқотган китобларимга ачинаётган эдим, мана, бугун улар ҳам қайтиб келди!”
Аввал хабар берганимиздек, муфтий ҳазратлари Тошкент шаҳар, Шайхонтоҳур тумани “Оқлон” маҳалласидаги уйлари ёниб кетган саккизта хонадонга ташриф буюриб, талофатдан азият чеккан хонадон аҳлларига ҳамдардлик билдирган эдилар.
Ўзаро суҳбат давомида хонадон аҳлларидан бирлари: “Энг ачинарлиси, мен учун бебаҳо бойлик бўлган кўплаб китобларим ҳам ёнғинда ёниб кетди. Уларнинг аксарияти диний китоблар эди”, дея нафсус билан сўзлаб берган эди. Муфтий ҳазратлари йўқотилган китоблар ўрнини тўлдирилишини ўз зиммаларига олиб, албатта етказиб берилишини таъкидлаган эдилар.
Бугун ана шу хонадонларга муфтий ҳазратларининг ваъдалари етказилди. Ўзбекистон мусулмонлари идораси Масжидлар бўлими мудири Муҳаммадназар домла Қаюмов саккизта хонадоннинг ҳар бирига Қуръони карим ва ўндан ортиқ, жами юзга яқин диний-маърифий китобларни муфтий ҳазратлари номларидан топширдилар. Бундан ташқари, тез орада диний идора тарафидан моддий ёрдам ҳам кўрсатилишини билдирдилар.
“Аллоҳга шукурки, маҳалла аҳли бугун ҳаммалари бизга ёрдам кўрсатмоқда. Бу борада алҳамдулиллаҳ, кўнглимиз таскин топяти. Фақат мен йўқотган китобларимга ачинаётган эдим, мана бугун улар ҳам қайтиб келди! Муфтий ҳазратлари бизга Қуръони карим ва бошқа кўплаб мўтабар китобларни юборибдилар. Аллоҳ таоло ҳазратимизни Ўз паноҳида асрасин. Бошига синов тушган барча инсонлар номидан у кишига катта миннатдорчиликларимизни билдирамиз”, дейди Фатҳуллоҳ ҳожи ота.
Мўминларнинг бир-бирларини мусибат онларида ёлғизлатиб қўймаслик, дардларига малҳам бўла олишлик бу динимиз ва олийжаноб халқимизнинг гўзал анъаналаридандир. Аллоҳ атолодан мусибат етган хонадон аҳилларига нажот ва баракотлар беришини сўраб қоламиз.
Ўзбекистон мусулмонлари идораси Масжидлар бўлими
Муҳаррам ойида рўза тутгин
Бисмиллаҳир Роҳманир Роҳийм
Муҳаррам ойи Рамазон ойидан кейин турадиган энг ҳурматли ойдир. Бу ой ҳижрий сананинг бошланиш ойидир. Динимизда бу ой уруш ҳаром қилинган ойлардан бири ҳисобланади. Ашуро куни эса муҳаррам ойининг ўнинчи кунидир.
Пайғамбаримиз Муҳаммад соллаллоҳу алайҳи васаллам бу ойда рўза тутишга тарғиб қилганлар.
Али розияллоҳу анҳудан ривоят қилинади. Бир киши Расулуллоҳ соллаллоҳу алайҳи васалламга: "Эй Аллоҳнинг Расули, Рамазондан кейин қайси ойда рўза тутишимга буюрасиз", деди.
Шунда у зот: "Агар Рамазондан кейин рўза тутмоқчи бўлсанг, муҳаррам ойида тутгин. Чунки у Аллоҳнинг ойидир, унда бир қавмнинг тавбасини қабул қилган яна бошқа қавмларнинг ҳам тавбасини қабул қилади", деб жавоб бердилар (Имом Термизий ривояти).
