Мисрда чоп этиладиган йирик матбаа нашрлардан бири - “Ал-Аҳрам” газетаси саҳифасида “Ўзбекистоннинг Қоҳирадаги элчиси: Президент Шавкат Мирзиёев янги муддатга сайланганидан кейин Миср билан ўзаро манфаатли алоқаларда улкан ривожланиш кутилмоқда” сарлавҳаси остидаги интервью босилиб чиқди, деб хабар бермоқда «Дунё» АА мухбири.
Мамлакатимизнинг Қоҳирадаги дипломатия ваколатхонаси раҳбари Мансурбек Қиличев билан бўлган ушбу суҳбатда Ўзбекистон ва унинг халқи араб мамлакатлари, хусусан, Миср халқи билан кўплаб тарихий, маданий ва диний ришталар орқали боғлангани қайд этилган.
Унда Ўзбекистоннинг мисрликларга қадим замонлардан бери Мовароуннаҳр – “дарё ортидаги мамлакат” сифатида танилгани ва Қоҳирада икки давлат ўртасидаги тарихий муносабатларнинг тарихи узоқ ўтмишга бориб тақалишини тасдиқлайдиган кўплаб далиллар ва ёдгорликлар сақланиб қолгани таъкидланган.
«Масалан, Қоҳирадаги “Нилометр”. “У Аҳмад Ал-Фарғоний” томонидан кашф этилган, шунингдек, ҳудуди бўйича Мисрдаги энг йирик масжидлардан бири бўлган “Ибн Тулун” масжиди асли Ўзбекистоннинг Бухоро шаҳридан бўлган Аҳмад ибн Тулун томонидан барпо этилган. Қоҳира марказидаги боғи билан машҳур бўлган “Ал-Ўзбекия” маҳалласининг номи эса Султон Қайтбой ўз қўшини қўмондони Сайфуддин Ўзбекка 60 гектар ерни совға қилишидан сўнгги даврига тўғри келади. Бу ерда Сайфуддин Ўзбек ободончилик қилган, кўплаб иншоотлар, жумладан, мазкур боғни барпо этган», деб ёзади нашр.
Ушбу интервьюда Ўзбекистоннинг замонавий даврдаги муносабатлари тарихий муносабатларидан кам эмаслиги, Миср 1993 йили, собиқ советлар иттифоқи парчалангач, яьни Ўзбекистон мустақилликка эришгандан сўнг Тошкентда элчихонасини очган биринчи давлатлардан бири бўлгани ҳам қайд этилган.
Суҳбатда Миср араб давлатлари орасидан биринчи бўлиб, 1991 йил 26 декабрда Ўзбекистон мустақиллигини тан олгани ва 1992 йилда имзоланган Қўшма баёнот асосида икки давлат ўртасида дипломатия муносабатлари ўрнатилгани ўқувчиларнинг эътиборига ҳавола қилинган.
Шунингдек, Ўзбекистон ва Миср етакчилари мунтазам учрашаётгани, Президент Абдулфаттоҳ ас-Сисий 2018 йилнинг сентябрь ойида Ўзбекистонга ташриф буюргани, жорий йилнинг феврал ойида эса Ўзбекистон Президенти Шавкат Мирзиёев Мисрга буюрган ташрифи доирасида эришилган келишувларни амалга ошириш барча соҳаларда ҳамкорлик асосларини кенгайтириш учун мустаҳкам замин яратгани алоҳида таъкидланган.
Юқоридагилар билан бирга, Ўзбекистоннинг Қоҳирадаги элчиси Мансурбек Қиличев жорий йил 9 июль куни бўлиб ўтган сайловларда Президент Мирзиёев янги президентлик муддатига сайланганидан кейинги даврда ҳам Миср билан алоқалар ҳам муҳим ўрин тутишини қайд этгани ва бунинг сабаблари атрофлича қаламга олинган.
«Ўзбекистон элчиси Миср ва Ўзбекистон ўртасидаги муносабатлар ўзаро ишончга асосланган дўстликка асосланишини тасдиқлар экан, икки мамлакат халқлари ўртасидаги тарихий ва маданий муштараклик ўзаро ҳамкорликни кенгайтириш учун мустаҳкам асос эканлиги, Миср Ўзбекистон учун истиқболли ҳамкор ва ўз мамлакати экспортининг Африка бозорларига кириш эшиги эканини таъкидлади», деб ёзади газета.
Маълумот тариқасида қайд этиш жоизки, “Ал-Аҳрам” газетаси 1875 йил 5 августда Мисрнинг расмий газетаси сифатида ташкил этилган. У Миср ва араб дунёсидаги энг йирик нашр бўлиб, кунлик адади 1 миллионга яқин нусхани ташкил этади.
Ўзбекистон мусулмонлари идораси
Матбуот хизмати
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳазрат Таҳонавий раҳматуллоҳи алайҳмурид ва яқинларига «сафар қилсангиз ва юкингиз сизга бепул олиб кетишингизга рухсат берган миқдордан ортиқ бўлса, албатта, ортиқча юкнинг ҳаққини адо этинг ва кейин сафар қилинг», дея кўрсатма берар эдилар.
Бир куни у киши сафар қилиш учун вокзалга етиб келдилар. Поезд келишига яқин қолган эди. Ҳазрат юкларини олиб, юклар тортиладиган жойга етиб келдилар ва навбатга турдилар. Тасодифан поездда бирга кетадиган кондуктор у ерга келди ва ҳазратни таниб қолди. Дарҳол: «Ҳазрат, сиз бу ерда нега турибсиз?» деб сўради.
Ҳазрат: «Юкимни торттириш учун келганман», дедилар.
Кондуктор: «Сизга юкингизни торттиришга зарурат йўқ. Ҳеч қандай муаммо бўлмайди. Мен сиз билан бирга поездда кетаман. Ортиқча юк учун ҳақ тўлашингиз шарт эмас», деди.
Ҳазрат: «Сиз мен билан бирга қаергача борасиз?» деб сўрадилар.
Кондуктор: «Фалон бекатгача бораман», деди.
Ҳазрат: «Кейин у ёғига нима бўлади?» деб сўрадилар. Кондуктор: «У бекатда бошқа кондуктор келади. Мен унга бу ҳазратнинг юклари, деб айтиб қўяман», деди.
Ҳазрат: «У кондуктор мен билан бирга қаергача боради?» деб сўрадилар.
Кондуктор: «У узоққа кетади. Ундан анча олдин сизнинг бекатингиз келади», деди.
Ҳазрат: «Йўқ, мен анча узоққа кетаман, охират тарафга кетаман, қабримга кетаман. Қайси кондуктор мен билан бирга кетади?» дедилар. Кейин: «Охиратда мендан бир давлатга оид поездда юкнинг ҳаққини адо қилмай қилган сафаринг ва ўғирлигинг ҳисобини бер деган талаб бўлса, у ерда қайси кондуктор менга ёрдам бера олади?!» дедилар.
«Насиҳатлар гулдастаси» китобидан