05 Январ, 2025, 5 Ражаб, 1446
05 Январ, 2025, 5 Ражаб, 1446
Аллоҳ таоло инсонга умр беради. Инсон бу берилган умрни ғанимат билиб, ҳаётини хайрли ишлар билан мазмунли қилиши учун савоб ишларни амалга оширади. Каримов Абдулҳаким ҳожи ота ўз умрини фидойилик ва халқ хизматига бағишлаган, 100 ёш билан юзлашган мана шундай инсонлардан биридир. Абдулҳаким ҳожи ота 1919 йил 1 январь куни Тошкент шаҳрининг Яккасарой тумани Қушбеги маҳалласида туғилган. У киши йигирма ёшга кирганда иккинчи жаҳон урушига кетиб, 1945 йили ғалаба нашидасини суриб, соғ-омон қайтиб келганлар.
Абдулҳаким ҳожи отанинг илмга бўлган муҳаббатлари сабаб, 1948 – 1951 йиллар орасида Низомий номидаги Тошкент давлат педагогика университетида таълим олади. Шундан кейин 50 йил ёшларга таълим бериш соҳасида ишлаб, эндиликда кексалик гаштини сурмоқда.
Абдулҳаким ҳожи ота Каримова Роҳатой ҳожи она билан турмуш қуришган. Мана 73 йилдирки, ҳожи ота ва ҳожи она тинч ва тотув яшаб келмоқда. Бу табаррук оиланинг 7 нафар фарзанди бор, 4 нафар ўғил ва 3 нафар қиз. Шунингдек, 33 невара, 89 эвара ва 5 чевара бор. Бу аҳил оила сабабчилари бўлмиш Абдулҳаким ҳожи ота ва Роҳатой ҳожи она бир гуруҳ фахрийлар билан 2017 йил муҳтарам Президентимиз раҳнамоликларида муборак ҳаж зиёратини адо этдилар.
Куни кеча фарзанду аржумандлар томонидан Абдулҳаким ҳожи отанинг табаррук 100 ёшга тўлганлари муносабати билан эҳсон дастурхони ёзилди, ҳожи ота ва ҳожи онага соғлик-саломатлик тиланди.
Ўзбекистон мусулмонлари идораси Матбуот хизмати
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Бақувват ва бўйи узун бир киши Набий соллаллоҳу алайҳи васалламнинг олдиларидан ўтиб кетди. У зот саҳобалар билан бирга ўтирган эдилар. Саҳобалар унинг куч ва қувватидан ҳайрон қолиб дейишди:
– Ё Аллоҳнинг Расули! Қани энди унинг мана шу кучи Аллоҳнинг йўлида ишлатилганида эди?! Расулуллоҳ соллаллоҳу алайҳи васаллам уларга дедилар:
– Агар у гўдак болалари учун кўчага чиққан бўлса, Аллоҳнинг йўлидадир. Агар у қари ота-онаси учун кўчага чиққан бўлса, Аллоҳнинг йўлидадир. Агар у риё ва фахрланиш учун кўчага чиққан бўлса, шайтоннинг йўлидадир!
Инсонлар фақатгина жангга қилич яланғочлаб чиқишни жиҳод деб ўйлашади. Қолган нарсалар уларнинг наздида гўё бир маромдаги оддий урф-одатлар. Тўғри, жанг қилиш Аллоҳ йўлидаги ишлар рўйхатининг аввалида туради. Аммо негадир «Аллоҳнинг йўлида» дейилса, энг аввал мияга жиҳод келади. Ҳолбуки, ҳалол тирикчилик қилиш ҳам Аллоҳнинг йўлидаги иш!
Саҳобалар инсоннинг кучи ва қуввати фақат Аллоҳнинг йўлидаги жиҳодда ишлатилиши керак деб ўйлашди. Расулуллоҳ соллаллоҳу алайҳи васаллам уларнинг тушунчаларини тўғрилаб қўйдилар. Уларга киши хотини ва бола-чақасининг ташвишида кўчага чиқса, ота-онасининг хизмати учун кўчага чиқса, уйланиш учун маҳрга яроқли нарса топиш илинжида учун кўчага чиқса, у ҳам Аллоҳнинг йўлида юрганини англатдилар!
Аллоҳ йўлида қилган ҳар бир ҳалол амалингизнинг ажрини тасаввур қилиб кўринг! Фарзанд ва аёлингиз яхши еб, яхши кийиниши учун кўчада, уйингиз тартибли бўлиши учун уйингизда ишлашингиз оддийгина одатий иш эмас, Аллоҳ йўлидаги кундалик жиҳоддир!
Ота-онангизни шифохонага олиб боришингиз оддий иш эмас. Бу яхшилик Аллоҳ йўлидаги амалингиздир!
Бир беморни кўргани боришингиз оддий инсоний бурч эмас. Бу Аллоҳ йўлидаги кўнгил олишдир!
Бировнинг отаси ёки онаси вафот қилганида бориб таъзия билдиришингиз оддийгина ижтимоий кўриниш эмас. Бу Аллоҳ йўлида бир-бирига қилинадиган раҳм-шафқатдир!
Тоат, яхшилик ва маъруф ишда ҳаёт кечириш барчаси Аллоҳ йўлида ҳаёт кечиришдир. Бу ишлардаги ажрни тасаввур қилсак, Аллоҳ йўлидаги кураш бизга енгил кечади!
«Набавий тарбия» китоби асосида тайёрланди
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа