Оталар ва оналар ҳақида
ОТАЛАР ҲАҚИДА
- Ота хонадонга ташриф буюрганда ўриндан туриб, жой бўшатиш лозим.
- Ота билан кетаётганда унинг изнисиз ундан олдин юрмаслик керак.
- Ота фарзанд учун бирон нарса мерос қолдирмаса ҳам, ундан номус қилинмайди.
- Ота бор уйда бош қотиришга ва бировга маслаҳат солишга зарурат бўлмайди.
- Ота ёнида ёки у кириб келганда ёнбошлаб ётилмайди.
- Ота уйда бўлмаган маҳалда истеъмол қилинган нарсалардан унинг учун алоҳида олиб қўйилиши фазилатдир.
- Мансабли шахс бўлсанг ҳам отанг чақирганда отингдан тушиб, олдида ҳозир бўлишга шошил! Мансабинг ишингга алоқадор, отангга эмас!
- Отангнинг ёнидаги солиҳ кишиларга нисбатан самимий бўлгин, агар отанг вафот топиб кетса ўшалар билан муомала-муносабатларингни узма!
ОНАЛАР ҲАҚИДА
- Ҳадяни аввал онага, сўнг отага берилиши маҳбубдир.
- Ҳаёт бўлсалар ҳам, вафот топиб кетган бўлсалар ҳам уларнинг ҳақларига доимо дуода бўлмоқ зарур.
- Оналарнинг юзларига тушган ажинлар, қўлларининг қадоқлари – сен ва ака-укаларинг, опа-сингилларинг сабабли эканлигини билгин!
- Сенга берган оқ сутини меҳру хурсандлик билан берган, аммо сенинг унга берган таоминг баъзида миннатли ва озорлидир. Шунинг учун берган ҳар-бир луқманг меҳрли бўлиши учун камтарин бўл, камтарин бўл!
- Унга сен ҳар куни кўриниш бер, чунки онангнинг сени кўриши хум-хум тилло туҳфа қилганингдан ортиқроқдир.
- Тириклигида бор имкониятинг ила унга тавозеъли ва ширин сўзли бўл, шунда уни йўқотганингда армонда қолмайсан.
- Ҳайит кунлари онангни бағринга бос! У сени ҳар куни қучиб, ҳидларингдан тўйиб-тўйиб завқ олганини эсингдан чиқармагин!
Интернет манбалари асосида Бахмал тумани «Домла Эшонқул»
жоме масжиди имом-хатиби Хушбеков Исоқул тайёрлади
Диний таълим муассасаларига кириш имтиҳони Тошкент шаҳрида давом этмоқда
Ўзбекистон мусулмонлари идораси тасарруфидаги олий ва ўрта махсус диний таълим муассасаларига 2026–2027 ўқув йили учун кириш тест синовларининг 2-ҳудуд (Тошкент шаҳри) босқичига старт берилди. Имтиҳонлар 2–3 август кунлари Чилонзор туманидаги “Шайх Муҳаммад Содиқ Муҳаммад Юсуф” жоме масжиди Мажлислар залида ўтказилади.
Жараён шаффоф ва адолатли ўтиши учун Дин ишлари бўйича қўмита, Мусулмонлар идораси раҳбарлари ва мустақил кузатувчилар жараённи бевосита назорат қилмоқда.
Абитуриентларга қулайликлар ва муҳим эслатмалар:
-
Қулайлик: Абитуриентлар ўзлари ҳужжат топширган ҳамда ўзларига яқин бўлган диний таълим муассасасида имтиҳон топширишлари мумкин.
-
Магистратура: Имом Бухорий номидаги Тошкент ислом институти магистратурасига ҳужжат топширган, араб тилидан сертификати бор абитуриентлар тестдан озод этилади. Улар 11 август куни ижодий имтиҳон топширади.
-
Зарур ҳужжатлар: Шахсни тасдиқловчи ҳужжат (паспорт/ID-карта) ва рухсатнома.
-
Вақт: Рухсатномада кўрсатилган вақтдан 30 дақиқа олдин келиш талаб этилади. Soat 17:00 дан кечикканлар тестга киритилмайди.
-
Тартиб: Телефон, ақлли соат, шпоргалка ва бошқа электрон қурилмалардан фойдаланиш қатъиян ман этилади ҳамда четлатишга асос бўлади.
Манзил: Чилонзор тумани, Сугалли ота кўчаси, 5/1-уй.
Алоқа: +998 99 876 0310
Расмий манба: https://t.me/qabulmuslimuz
Ўзбекистон мусулмонлари идораси
Матбуот хизмати
