Мен бахтлиман
Кунлардан бир куни бир подшоҳ касал бўлиб қолибди. Уни даволаш учун бутун дунёдан табибларни чақиришибди, лекин ҳеч бири подшоҳни даволай олмабди. Шунда улар маслаҳат қилиб бир қарорга келишибди. Агар бахтли одамни топиб, унинг кўйлаги подшоҳга кийдирилса, у тузалади. Бахтли одамни топиш учун дунёнинг ҳамма томонига чопарлар жўнатилибди. Лекин ҳеч ким "Мен бахтлиман", деган одамни топа олмабди. Кимдир бой, лекин касал, яна кимдир соғ, аммо камбағал, бошқаси бой, соғ, бироқ оиласи нотинч – хуллас, ҳамма нимадандир нолир эди.
Бир куни тунда подшоҳнинг ўғли шаҳар кўчаларини айланиб юрса, бир ҳовлидан кимнингдир гапини эшитиб қолибди. У: "Яхши ишладим, пулимни олдим, қорним тўйди, энди маза қилиб ухлайман. Мендан бахтли одам йўқ", дебди. Подшоҳнинг ўғли севиниб кетиб, тезда хизматкорларини жўнатибди. Катта пул эвазига ўша одамнинг кўйлагини олиб келишни тайинлабди. Хизматкорлар ҳовлига кириб шаҳзоданинг буйруғини бажармоқчи бўлишибди, лекин қарашса, ҳалиги "бахтлиман" деган одам шунчалар қашшоқ эканки, ҳатто эгнида кўйлаги ҳам йўқ экан.
Эй инсон, билгинки, бахт келувчи ва кетувчи нарсадир. Одам ўзини бир муддат бахтли ҳисоблаши учун бой бўлиши шарт эмас, балки бор нарсасига шукр қилса кифоя.
Акбаршоҳ Расулов
Покистоннинг машҳур телеканалида Ўзбекистон ҳақида кўрсатув намойиш этди
Покистоннинг “PTV” телеканалида Ўзбекистоннинг бой сайёҳлик салоҳиятига бағишланган махсус дастур намойиш этилди, деб хабар бермоқда “Дунё” АА.
Кўрсатувда покистонлик томошабинларга мамлакатимизнинг бетакрор тарихий-маданий мероси, қадимий шаҳарлари, меъморий обидалари, миллий анъаналари ҳамда замонавий саёҳат ва дам олиш имкониятлари ҳақида маълумотлар тақдим этилди.
Дастурда бой тарихий мерос ва жадал замонавий ривожланишни ўзида мужассам этган Самарқанд, Бухоро, Хива ва Тошкент шаҳарларига алоҳида эътибор қаратилди.
Томошабинлар кўрсатувда Буюк Ипак йўли тарихида муҳим роль ўйнаган Ўзбекистоннинг қадимий шаҳарлари, архитектура ансамбллари, маданий мерос объектлари ва бугунги кунда ҳам мамлакатнинг бетакрор сайёҳлик қиёфасини шакллантираётган миллий ҳунармандчилик анъаналари ҳақида маълумотга эга бўлдилар.
Алоҳида лавҳалар Ўзбекистоннинг табиий-иқлим имкониятлари, зиёрат, маданий-тарихий ва рекреацион туризмни ривожлантиришга бағишланди. Туристик маҳсулотларнинг хилма-хиллиги ва саёҳатчилар учун яратилаётган қулай шароитлар мамлакатнинг турли давлатлардан ташриф буюрувчилар учун жозибадорлигини оширишга хизмат қилаётгани таъкидланди.
Кўрсатув давомида Ўзбекистон миллий таомлари, ўзбек халқининг меҳмондўстлиги ва бой маданий анъаналари республикамизни сайёҳлик йўналиши сифатида оммалаштиришга хизмат қилувчи муҳим омиллар экани қайд этилди.
Дастурнинг кўп миллионли аудиторияга эга “PTV” телеканалида эфирга узатилиши Ўзбекистоннинг туризм салоҳиятини Покистонда тарғиб қилиш ва туристларнинг эътиборини мамлакатимиз бўйлаб саёҳат қилишга жалб этишда яна бир муҳим қадам бўлди.
Ўзбекистон мусулмонлари идораси Матбуот хизмати
