Сайт тест ҳолатида ишламоқда!
11 Июн, 2025   |   15 Зулҳижжа, 1446

Тошкент шаҳри
Бомдод
03:05
Қуёш
04:49
Пешин
12:28
Аср
17:38
Шом
19:59
Хуфтон
21:37
Bismillah
11 Июн, 2025, 15 Зулҳижжа, 1446
Янгиликлар

Жонажон Ватанимизнинг азиз тимсоли

18.11.2024   2632   3 min.
Жонажон Ватанимизнинг азиз тимсоли

18 ноябрь – Ўзбекистон Республикаси Давлат байроғи қабул қилинган кун

Ўзбекистон Республикасининг Давлат байроғи – фахру ғуруримиз, жонажон Ватанимизнинг азиз тимсолларидан бири.

Миллий байроғимиз қабул қилинган сана бу йил ўзгача шукуҳ ва тантана билан нишонланмоқда. Таълим масканлари, маҳаллалар, ҳарбий қисмлар, ташкилот ва идораларда Ўзбекистон Республикаси Давлат байроғи қабул қилинганининг 33 йиллигига бағишланган тадбирлар, маърифий анжуманлар, мусобақалар бўлиб ўтмоқда.

Жумладан, пойтахтимиздаги Aмир Темур хиёбони бўйлаб Тошкент шаҳрида жойлашган куч тузилмалари кавалерия бўлинмалари иштирокида “Отлиқ кавалерия паради“ бўлиб ўтди.

Минглаб юртдошларимиз, пойтахтимиз меҳмонлари, оловқалб ёшлар ана шу бетакрор тадбирнинг гувоҳи бўлди.

Айтиш керакки, эзгу акция мамлакатимизда кейинги йилларда маънавий-маърифий жабҳаларда кечаётган янгиланиш жараёнларини акс эттириши билан бирга ёшларни ватанпарварлик, юртга содиқлик, миллатпарварлик, фаол фуқаролик позициясига эга бўлган шахс этиб камолга етказиш борасидаги эзгу ишларнинг яна бир ўзига хос намойиши бўлди, дейиш мумкин.

...Ҳарбий оркестр садолари янграйди. Тилларанг тусга кирган куз маърифий тадбирга ўзгача кўриниш, файз, шукуҳ бағишлайди. Юрт байроғини тутган минглаб алпкелбат ҳарбий суворийлар жонажон Ўзбекистонимизнинг куч-қудрати, тенгсиз шижоати тимсолига айланган.

Бундай қизиқарли, ҳаяжонли, бетакрор лаҳзаларга гувоҳ бўлиш мақсадида кўплаб юртдошларимиз Соҳибқирон Амир Темур номи билан юритилувчи кўчаларнинг йўл ёқасида жамулжам бўлди. Юртдошларимиз бетакрор воқеликни суратга олишга ошиқадилар. Ушбу тадбир ватандошларимизга унутилмас лаҳзалар, ўз юртидан, давлат рамзларидан, мўътабар Ўзбекистонимиздан фахрланиш туйғуларини бағишлагани аниқ. Чиндан ҳам байроғимиз таърифига сўз ожиз. Ғоят чиройли, умидбахш.

Дарҳақиқат, миллат байроғи – она Ватан тимсоли. У – ота юрт рамзи. Кўкда мағрур ҳилпираган байроғимизга боқиб, мустақиллик, фаровонлик тушунчаларининг моҳиятини янада чуқурроқ англаймиз!

Байроғимиз бизни эзгу мақсадлар йўлида бирлаштиради. Юксак ва улуғ ишларга руҳлантиради! Шонли, асрлар қаърига сингиб кетган тарихимиздан, боболаримизнинг покиза орзу-ниятлари, истиқлолимиз, ҳурриятимиз, эрк ва озодлигимиз, мамлакатимиздаги янгиланиш жараёнларидан, улкан марралар сари интилган Ўзбекистоннинг нурли истиқболидан сўзлайди.

18 ноябрь – Ўзбекистон Республикаси Давлат байроғи қабул қилинган кун муносабати билан бутун юртимиз бўйлаб маданий тадбирлар, акция ва флешмоблар ўтказиляпти. Республика Маънавият ва маърифат маркази, Ўзбекистон маҳаллалари уюшмаси, Ёшлар ишлари агентлиги, Мудофаа вазирлиги ва Миллий гвардия ҳамкорлигида ўзига хос лойиҳа амалга ошириляпти. Рекорд даражадаги 100 метрлик байроғимиз юртимиз бўйлаб кезиб, барчага ғурур-ифтихор бағишламоқда. Хоразмдан Тошкент томон йўлга чиққан байроғимиз жасур ҳарбийлар, шижоатли ёшлар, ватанпарвар юртдошларимиз томонидан дастлаб Ичан-қалъадан, кейин Бухоронинг Арк-қалъасидан, қадим ва ҳамиша навқирон Самарқанднинг тарихий кўчаларидан, улуғвор Жиззахдан, воҳаю водийлардан олиб ўтилиб, ҳадемай азим пойтахтимизга етиб келади.

Байрам куни эса энг катта байроқни пойтахтимизда кўришингиз мумкин бўлади.

Дарҳақиқат, байроғимиз нурли келажагимиз, мўътабар диёримиз, шаънимиз, ор-номусимиз, тенгсиз ифтихоримиз рамзидир.

Назокат Усмонова, ЎзА мухбири

Жонажон Ватанимизнинг азиз тимсоли
Бошқа мақолалар

Қурбонлик қилинаётганда ўқиладиган 5 дуо

14.06.2024   6301   2 min.
Қурбонлик қилинаётганда ўқиладиган 5 дуо

 

بسم الله والله أكبر اللهم منك ولك اللهم تقبل مني

Ўқилиши: Бисмиллаҳи. Валлоҳу акбар. Аллоҳумма минка ва лака. Аллоҳумма тақоббал минний.

Маъноси: Аллоҳнинг номи билан. Аллоҳ улуғдир. Аллоҳим, бу Сендан ва Сен учундир. Аллоҳим, мендан қабул эт.

 

اللهم تقبل هذا منى كما تقبلت من حبيبك محمد و خليلك إبراهيم عليهما السلام

Ўқилиши: Аллоҳумма тақоббал ҳаазаа минний кама тақоббалта мин Ҳабийбика Муҳаммад соллаллоҳу алайҳи васаллам ва Халийлика Иброҳим алайҳимассалом.

Маъноси: Аллоҳим! Бу қурбонлигимни ҳабибинг Муҳаммад, халилинг Иброҳим алайҳимассаломдан қабул қилганингдек қабул қилгин.

 

إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالْأَرْضَ حَنِيفًا وَمَا أَنَا مِنَ الْمُشْرِكِينَ

Ўқилиши: Инний важжаҳту важҳий лиллазий фаторос самааваати вал арз ҳанийфан ва маа анаа минал мушрикийн.

Маъноси: Мен тўғри йўлни танлаган ҳолимда юзимни осмонлар ва Ерни ихтиро этган Зотга қаратдим. Мен мушриклардан эмасман.

 

قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ

Ўқилиши: Қул инна солаатий ва нусукий ва маҳйаая ва мамаатий лиллаҳи Роббил ъаламийн.

Маъноси: Айтинг: “Албатта, намозим, ибодатим ва ҳаёту мамотим оламлар Рабби бўлмиш Аллоҳ учундир”.

 

لَا شَرِيكَ لَهُ وَبِذَلِكَ أُمِرْتُ وَأَنَا أَوَّلُ الْمُسْلِمِينَ

Ўқилиши: Лаа шарийка лаҳу ва бизаалика умирту ва анаа аввалул муслимийн.

Маъноси: Унга (ҳеч қандай) шерик йўқдир. Мана шу (ақида)га буюрилганман ва мен (Аллоҳнинг буйруқларига) таслим этувчиларнинг аввалиман.

 

 Ўзбекистон мусулмонлари идораси
Матбуот хизмати