Фарғона вакиллиги фаолиятидан
Фарғона вилоятининг Бувайда туманида 14 та масжид фаолият олиб бормоқда. Уларда 25 нафар малакали имом-хатиб ва имом-ноиблар хизмат олиб бормоқдалар. Масжидларда ободончилик ишлари олиб борилиб, мўмин-мусулмонлар учун қулай шарт-шароитлар ҳозирланмоқда.
Имом-хатиблар ва масжидлар фаолиятини ўрганиш мақсадида Фарғона вилояти бош имом-хатиби Убайдуллоҳ домла Абдуллаев Бувайдага ташриф буюрди. Туман бош имом-хатиби Аҳмадхон домла Низомов бошчилигида туманда фаолият олиб бораётган имом-хатиб ва имом-ноиблари ҳамда "Ҳаж — 2024" мавсумида зиёратга борган ҳожилар иштирокида мулоқот бўлиб ўтди. Ижтимоий-маънавий муҳит барқарорлигини таъминлаш, аҳолига соф ислом таълимотларини етказиш, ёшларни соф ақида асосида, ватанга садоқатли қилиб тарбиялашда масъуллар олдида турган вазифаларга тўхталинди.
"Салмони Форсий" масжидида фуқаролар қабули ўтказилди. Туманнинг Гузар, Бувайда ва Ипак йўли маҳалла фуқаролари йиғинидан ташриф буюрган фуқаролар мурожаати тингланиб, уларнинг саволларига жавоб бериш баробарида амалий кўмак бериш чоралари кўрилди.
Масжид ҳудудига манзарали ва гул кўчатлари ўтказилиб, "Яшил макон" умуммиллий лойиҳасининг аҳамияти, кўчат экишнинг фойдалари, лойиҳада фаол бўлишнинг манфаати хусусида гапирилди.
Шунингдек, "Мансурхонтўра" масжиди бир ярим минг намозхон учун мўжалланган, замонавий архитектура талабларига ҳамоҳанг равишда ишланган лойиҳа асосида қайта қурилмоқда. Намозгоҳнинг янги биносига ғишт қўйилиб, бошланган ишлар хайрли бўлишини тилаб дуо қилинди.
Фарғона вилояти вакиллиги
Матбуот хизмати
Илм йўлида юрганларга ёрдам – Қуръон ва суннат нурида
Илм – бу инсоният тараққиётининг асоси бўлиб, динимиз эса бу ҳақиқатни ҳар жиҳатдан юксак даражада таъкидлаб келади. Ислом дини илмни нафақат мақтайди, балки уни талаб қилишни ҳар бир мусулмон эркак ва аёлга вожиб деб санайди. Айниқса, илм талаб қилаётган кишиларга ёрдам бериш, уларни қўллаб-қувватлаш, йўлларини очиш ва уларга енгиллик яратиш – бу фақат инсонийлик эмас, балки ибодатнинг ўзидир. Ушбу мақолада Қуръон оятлари, ҳадиси шарифлар ва уламолар ҳикматлари асосида бу мавзу чуқурроқ таҳлил қилинади.
Қуръони каримда илм аҳлига эҳтиром
“Агар ҳар бир жамоатдан бир гуруҳ чиқиб, динни ўрганиб келса ва ўз қавмларини огоҳлантирса, эҳтимолки, улар (гуноҳлардан) сақланурлар эди” (Тавба сураси, 122-оят).
Бу оят илм талаб қилишнинг ижтимоий ва диний масъулият эканлигини очиқ-ойдин ифодалайди. Динни чуқур тушунадиган кишилар жамиятнинг маънавий устунидир. Уларнинг тайёргарлиги учун шароит яратиш – бу жамоанинг иймонига далолатдир. Ҳар бир мусулмон илм аҳлини рағбатлантириши, моддий-маънавий ёрдам бериши бу оят асосида шаръий масъулият бўлиб қолади.
“Айтинг: билганлар билан билмаганлар тенг бўлурми? Фақат ақл эгалари ибрат олурлар” (Зумар сураси, 9-оят).
Аллоҳ таоло илм эгаларининг даражасини улуғлаб, уларни билмаганлардан ажратмоқда. Бу оят, илм эгасини қадрлашни, унга хизмат қилишни ва унга ёрдам кўрсатишни Аллоҳнинг марҳаматига яқинлаштирадиган амаллардан бири деб англашга ундайди.
Ҳадиси шарифлар: Илм йўлида юрганларга жаннат йўли очилади
“Ким илм талаб қилиш йўлига тушса, Аллоҳ унга жаннат сари йўлни осон қилади” (Имом Муслим ривояти).
Бу ҳадис илм йўлида юрган кишини қўллаб-қувватлаган ҳар бир инсонни жаннат йўлининг шерикларидан бири бўлиши мумкинлигини билдиради. Илм олувчига сув олиб бериш, китоб олиб бериш, йўл харажатига ёрдам бериш, ҳатто унга дуолар қилиш ҳам бу йўлга хизмат қилишдир.
“Агар Аллоҳ бир кишига яхшиликни хоҳласа, уни динни тушунишга муваффақ қилади” (Имом Бухорий ва Муслим ривояти).
Бу ҳадисда Аллоҳнинг бир бандага берган энг катта неъматларидан бири – илмга рағбатдир. Шундай инсонларни қўллаб-қувватлаш, Аллоҳ иродасини бажараётгандай ажр олиб келади.
Талаба – Аллоҳнинг розилигини истаётган банда. Унга ёрдам – бу розилик сари қўл чўзишдир.
Уламолар ҳикматларида:
Имом Шофеъий раҳимаҳуллоҳ: “Илм талаб қилувчига хизмат қилиш Аллоҳга ибодат қилишдир”.
Бу сўзлар илмга хизмат қилишнинг даражасини аниқ белгилайди. Бу фақат одамга эмас, балки Аллоҳга қилинаётган хизмат сифатида баҳоланади.
Ибн Қаййим Жавзийя раҳимаҳуллоҳ: “Илм эгаларини кўтариш, уларга йўл очиш – жамиятнинг юксалиши учун замин яратади”.
Илм аҳли ёрдам олмаса, жамият заифлашади. Уларнинг илм олишига, ривожланишига, хизмат қилишига ёрдам бериш жамиятнинг тараққиётига хизматдир.
Илм йўлида ҳаракат қилаётган кишилар – бу умматнинг келажак пойдеворидир. Уларга ёрдам бериш, уларга хизмат қилиш, уларни моддий ва маънавий рағбатлантириш – Қуръон ва Суннат кўрсатмасидир. Ҳар биримиз бу йўлда ҳисса қўшсак, Аллоҳ ҳузурида ажру савоб оламиз ва охиратда илм билан дўстлашганлардан бўламиз, иншаАллоҳ.
Хулоса қилиб айтганда “Илм эгасига берганинг – Аллоҳга берганингдир!” бу сўзлар ҳар бир мусулмон қалбига ёзилиши керак.
Анвар ХУЖАХАНОВ,
Тошкент Ислом институти талабаси.