Келгуси ойда Истанбулда муҳим конференция ўтказилиши режалаштирилган. Унда ислом мамлакатлари етакчилари, олимлар ва экспертлар замонавий муаммолар ва уларни ҳал қилиш йўлларини муҳокама қилишади.
“IQNA” ахборот агентлиги “Анадолу”га таяниб хабар қилишича, ушбу конференцияни Жаҳон ҳамдардлик ва ҳамкорлик уюшмаси (Cihannuma) ташкил этмоқда. Тадбир 2024 йил 13-15 декабрь кунлари Истанбулдаги Ҳалич университетида бўлиб ўтади.
Уюшма раҳбари Реза Юролмаз таъкидлашича, конференциянинг мақсади ислом жамиятлари учун инновацион ечимлар ишлаб чиқиш ва замонавий муаммоларни муҳокама қилиш учун платформа ишлаб чиқиш, йўл харитасини таклиф қилишдир. У турли соҳалар, жумладан, таълим, бизнес, санъат ва фуқаролик жамияти вакилларини жалб қилиш орқали сиёсий етакчилар ва кенг жамоатчилик ўртасидаги узилишни бартараф этиш муҳимлигини таъкидлади.
Конференцияда адолат, миграция, иқтисодий ривожланиш, қашшоқликни камайтириш, рақамлаштириш, руҳий саломатлик, мусулмон озчиликларнинг аҳволи каби муҳим мавзулар муҳокама этилади.
Шунингдек, оила, маданият, санъат ва фуқаролик жамияти масалаларига алоҳида эътибор қаратилади. Тадбирда мунозара ва маърузалар ўтказилиши режа қилинган.
Тадбирда ислом оламидаги 50 га яқин етакчи ва экспертлар, шунингдек, Туркиянинг кўплаб олимлари ва фикр юритувчилари қатнашиши кутилмоқда.
Ўзбекистон мусулмонлари идораси
Матбуот хизмати
Уламолар бирор бир мазҳабга эргашиш борасида Қурон оятлари ва ҳадиси шарифлардан ишоралар келтириб айтишадики,«...Агар билмайдиган бўлсангиз, аҳли зикрлардан сўрангиз» (16:43).
Ҳузайфа розияллоҳу анҳу Расулуллоҳ соллаллоҳу алайҳи васалламдан ривоят қилган ҳадисда: «Мен сизларнинг орангизда яна қанча қолишимни билмайман. Шундай экан, мендан сўнг у иккиси: Абу Бакр ва Умарга иқтидо қилинг» (Термизий, Ибн Можа, Аҳмад), дейилган.
Имом Муслим «Саҳиҳ» асарининг шарҳловчиси Имом Нававий муайян имомга тақлид қилишнинг шартлигини шарҳлаб: «Сабаб шундаки, мазҳаблардан бирини танлашга рухсат бериш кишиларни, улар ўз хоҳишларига мос келадиган осон нарсага эргашишига олиб келади. Улар ҳалол ва ҳаром, рухсат этилган ва ман этилган нарсаларнинг орасидан ўзларига мосини танлайдилар. Бу мазҳаблар осонлаштирилмаган, тизимлаштирилмаган ёки машҳур бўлмаган илк ислом давридан фарқли равишда масъулият ташвишидан озод қилишга олиб келади. Шулар асосида киши ўзи қатъий равишда амал қиладиган мазҳаблардан бирини танлаши лозим бўлади», деган .Бошқа манбада: «Бу уммат ижмо қилган, тўғирланган, ёзиб қўйилган тўрт мазҳабдир. Бизнинг кунимизгача одамлар унга тақлид қилишиб ўзларини ўшандан деб ҳисоблайдилар. Бунда, айниқса, қатъиятлилик камайган, хоҳишларимиз онгимизга ўрнашган ва одамнинг аҳмоқона эҳтироси худди фазилат сифатида қараладиган бугунги кунда, кўпгина аниқ устунлик бор», деб ёзган.
Янги Наманган тумани "Абдуллоҳ ибн Масъуд" жоме масжиди
имом-хатиби Ш.Тўхтабаев