Янги йил байрами яқин. “Пақилдоқ”лар мавсуми эса аллақачон бошланган. Аммо бундай “хавфли ўйинчоқ“лар ишқибозлари бўлган болалару ўсмирлар пиротехника воситаларининг ўзи ва ён-атрофдагиларга зиёнидан етарлича хабардор эмас.

Республика кўз касалликлари клиник шифохонаси бош шифокори Отабек Икромов “пақилдоқ” ва салютлардан олинган жароҳатларнинг инсон кўриш аъзоларида қолдирадиган оғир асоратлари ҳақида маълумот берди:

– Ҳар йили Янги йил арафасида, байрамдан олдин ва байрамдан кейинги кунларда, "пақилдоқ" ва салютлардан олинган жароҳатлар туфайли клиникамизга кўплаб мурожаатлар бўлади. Уларда юз соҳаларининг, пешона соҳасининг куйиши билан биргаликда кўз кўрув аъзоларининг шикастланиши, кўриш фаолиятининг бузилиши ёки бутунлай йўқолиши ҳолатлари кузатилади. Даволаш чора-тадбирларига қарамасдан, айрим беморларда оғир асоратлар кузатилади – кўриш аъзолари шикастланиб, кўриш қобилияти бутунлай йўқолади. Ҳаттоки, пиротехника воситалари сабабли болалар умрбод ногиронликка маҳкум бўлиб қолади. 

Кўзнинг пиротехника воситалари таъсирида куйиши бир неча даражага бўлинади. Биринчи даражали куйишда беморларда кўз соҳасида қичишиш, қизариш шикоятлари кузатилса, иккинчи даражали куйишда кўз олмасида, кўзнинг шиллиқ пардасида гиперемиялар, шохпардада бироз шиш кузатилади. Шу билан биргаликда, юз аъзоларининг, пешона соҳасининг куйиши кузатилади. Учинчи даражали, яъни оғир даражали куйишда эса шох парданинг хиралашиши, қовоқлар некрози, юзнинг тўлиқ куйиши рўй беради. Тўртинчи даражали, яъни ўта оғир даражадаги куйишда кўзнинг барча органлари, шох парда ва бошқа тўқималарнинг куйиши, хиралашишлар ва чуқур некрозлар кузатилади.

Шунинг учун ота-оналардан, мактаб муассасаларидан ва барча масъул бўлган ташкилотлардан болаларга бу тўғрисида тўғри тушунча бериб, ҳар хил “пақилдоқ“лардан, пиротехника воситаларидан фойдаланмасликка чақиришларини сўрайман. Фарзандларимизнинг саломатлиги бир зумлик завқ ва ўйинқароқлиги ортидан хавф остида қолмасин!

ЎзА