Бисмиллаҳир Роҳманир Роҳийм
Баъзи қизлар гуноҳлари сабабли намоз ўқишга сусткашлик қилишади, баъзан эса бутунлай ташлаб қўйишади. Ўзларича «Шунча гуноҳларим бор, Аллоҳ намозимни қабул қилмайди», деб ўйлашади.
Бундай қилган қиз шайтонга икки марта алданади:
Биринчиси – шайтон уни гуноҳга етаклаганида алданади. Кейин шу гуноҳи сабабли қалбида қора доғ қолади, виждони қийналиб, юраги сиқилади.
Иккинчиси – шу гуноҳи учун шайтон уни намоздан узоқлаштирганда алданади. Шайтон «Энди қайси юзинг билан намозда Аллоҳнинг ҳузурида турасан? Аллоҳ гуноҳкор банданинг ибодатини қабул қилмайди. Ҳам гуноҳ қилиб, ҳам ибодат қилиб, Роббингнинг устидан куляпсанми? Сен бир гуноҳкор бўлсанг, нимангга намоз ўқийсан?» каби гаплар билан васваса қилади. Қарабсизки, бечора қиз ҳам гуноҳга ботади, ҳам намоз ўқимай қўяди – икки марталаб гуноҳкор бўлади. Борган сари қалбида қора доғлар ҳам, ғам-ташвишлари ҳам кўпайиб бораверади.
Агар бу қиз тавба намози борлигини билса, Аллоҳ фарз қилган, қалбига сокинлик, осойишталик ато этадиган беш маҳал намоз туфайли гуноҳлари ювилиб кетишини билса, намозини тамомлагунича Аллоҳ унинг гуноҳларини кечириб юборишини билса, намозга шошилган бўлмасмиди? Айнан ана шу гуноҳлари намозни маҳкам тутишига, ўқиганда ҳам, хушуъ ва ихлос билан ўқишига туртки бўлмасмиди?
Афсус. Аллоҳ таоло ҳаммамизга инсоф, тавфиқ берсин...
Шу йил 21 май куни ижтимоий-маънавий муҳитни янада соғломлаштириш, отинойилар фаолиятини такомиллаштириш мақсадида Хоразм вилоятида фаолият юритаётган отинойилар ва тарғибот гуруҳи аъзолари иштирокида ўқув-семинари бўлиб ўтди.
Семинарда Ўзбекистон мусулмонлари идораси Хотин-қизлар масалалари бўйича бўлим бошлиғи Дилфуза Эгамова ва Дин ишлари бўйича қўмитанинг масъул ходими Шаҳзод Ғафурович иштирок этди.
Ўқув-семинарда фуқароларнинг виждон эркинлигини таъминлаш ва диний соҳадаги давлат сиёсати концепсияси мазмун-моҳияти тушунтирилди. Шунингдек, отинойилар фаолияти бўйича ишлаб чиқилган янги қўлланма билан таништирилиб, ҳар бир бандига изоҳ берилди.
Ўзбекистон мусулмонлари идораси
Матбуот хизмати