12 Июн, 2025, 16 Зулҳижжа, 1446
12 Июн, 2025, 16 Зулҳижжа, 1446
Бисмиллаҳир Роҳманир Роҳийм
Баъзи қизлар гуноҳлари сабабли намоз ўқишга сусткашлик қилишади, баъзан эса бутунлай ташлаб қўйишади. Ўзларича «Шунча гуноҳларим бор, Аллоҳ намозимни қабул қилмайди», деб ўйлашади.
Бундай қилган қиз шайтонга икки марта алданади:
Биринчиси – шайтон уни гуноҳга етаклаганида алданади. Кейин шу гуноҳи сабабли қалбида қора доғ қолади, виждони қийналиб, юраги сиқилади.
Иккинчиси – шу гуноҳи учун шайтон уни намоздан узоқлаштирганда алданади. Шайтон «Энди қайси юзинг билан намозда Аллоҳнинг ҳузурида турасан? Аллоҳ гуноҳкор банданинг ибодатини қабул қилмайди. Ҳам гуноҳ қилиб, ҳам ибодат қилиб, Роббингнинг устидан куляпсанми? Сен бир гуноҳкор бўлсанг, нимангга намоз ўқийсан?» каби гаплар билан васваса қилади. Қарабсизки, бечора қиз ҳам гуноҳга ботади, ҳам намоз ўқимай қўяди – икки марталаб гуноҳкор бўлади. Борган сари қалбида қора доғлар ҳам, ғам-ташвишлари ҳам кўпайиб бораверади.
Агар бу қиз тавба намози борлигини билса, Аллоҳ фарз қилган, қалбига сокинлик, осойишталик ато этадиган беш маҳал намоз туфайли гуноҳлари ювилиб кетишини билса, намозини тамомлагунича Аллоҳ унинг гуноҳларини кечириб юборишини билса, намозга шошилган бўлмасмиди? Айнан ана шу гуноҳлари намозни маҳкам тутишига, ўқиганда ҳам, хушуъ ва ихлос билан ўқишига туртки бўлмасмиди?
Афсус. Аллоҳ таоло ҳаммамизга инсоф, тавфиқ берсин...
Бисмиллаҳир Роҳманир Роҳийм
1. Арафа куни кечаси, яъни, ҳайит кунига ўтар кечасини бедор ўтказиш.
Ҳайит кунига ўтар кечани Қуръон тиловати, зикр, тасбиҳ ва нафл намозлар билан ўтказиш улкан савобларга сабаб бўлади. Расулуллоҳ соллалоҳу алайҳи васаллам: "Ким икки ийд кечаларини Аллоҳдан савоб умидида қоим қилса, қалблар ўладиган кунда унинг қалби ўлмас”, деганлар (Ибн Можа, Табароний ривояти).
2. Ғусл қилиш. “Расулуллоҳ соллаллоҳу алайҳи васаллам фитр, азҳо ва арафа кунлари ғусл қилар эдилар” (Ибн Можа ривояти).
3. Энг яхши, янги ёки тоза кийимларни кийиш.
4. Хушбўйланиш.
5. Қурбон ҳайити намозига чиқишдан олдин ҳеч нарса емаслик. “Расулуллоҳ соллаллоҳу алайҳи васаллам Рамазон ҳайитида таомланмасдан чиқмасдилар, қурбонлик кунида эса намоз ўқигунларича таомланмасдилар” (Имом Термизий ривояти).
Эслатма! Баъзилар қурбон ҳайитида ҳеч нарса емай намозга чиқишни нотўғри тушуниб, куннинг аввалги ярмига қадар рўзани ният қилиш керак, дейишади. Шу билан бирга, ўша куни саҳарликка туришади ва оғизларини ният билан беркитиб намозга чиқишади. Ҳайит намози ўқиб бўлингач эса, худди ифторликдаги каби оғизларини очишади. Бундай қилиш нотўғри. Ҳайит кунларида рўзани ният қилиш ҳаром амал саналади. Қолаверса, ярим кунга рўза ният қилинмайди.
6. Масжидга имкон бўлса пиёда ва эртароқ бориш. “Расулуллоҳ соллаллоҳу алайҳи васаллам икки ҳайит намозига пиёда юриб чиқардилар” (Ибн Можа ривояти).
7. Йўлда таҳлил (Лаа илаҳа иллаллоҳ), такбир (Аллоҳу акбар) ва таҳмид (Алҳамдулиллаҳ) айтиш. "Аллоҳу акбар, Аллоҳу акбар, Лаа илаҳа иллаллоҳу Аллоҳу акбар, Аллоҳу акбар ва лиллаҳил ҳамд".
8. Ҳайит намозидан олдин бошқа бирор нафл намоз ўқимаслик. Масжидга боргандан сўнг таҳийятул масжид ёки бошқа бирор нафл намоз ўқимасдан зикр қилиб ўтириш лозим.
9. Намозга бир кўчадан бориб, бошқасидан қайтиш. Набий соллаллоҳу алайҳи васаллам шундай қилар эдилар.
10. Ҳайит билан муборакбод этиш. Саҳобалар: "Тақоббал Аллоҳ минна ва минкум (Аллоҳ биздан ҳам, сиздан ҳам қабул этсин)", деб бир-бирларини байрам билан табриклашарди.
11. Аҳли аёл ва ёш болаларни хурсанд қилиш. Оилада байрам кайфиятини пайдо қилиш, совға-ҳадялар улашиш керак.
12. Қавм-қариндош, ёш улуғларни зиёрат қилиш.
13. Таниш-билиш, ёру дўст, қўни-қўшниларни байрам билан табриклаш.
Қурбон ҳайитингиз муборак бўлсин!
Даврон НУРМУҲАММАД
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа