Бугун, 6 январь кунидан “Кўкалдош” ўрта махсус ислом билим юртида “Қуръони карим ва тажвид” ўқув курсининг навбатдаги босқич машғулотлари бошланди. Шу муносабат билан ўтказилган йиғилишда билим юрти устозлари ва тингловчилар қатнашди.
Билим юрти Матбуот котиби Рустам Охунжонов ўқув курсининг тингловчиларига "Илм ва унинг одоблари" мавзусида маъруза қилиб, уларга ҳақиқий илм эгасига қандай одобларга эга бўлиши лозимлиги ҳақида сўз юритди. Шунингдек, ўқув курси тингловчиларининг тартиб-интизомга риоя қилиши, белгиланган дарсларга мунтазам иштирок этиши ва бошқа интизомга оид тавсияларга амал қилиш ҳар жиҳатдан манфаатли бўлишини айтиб ўтди.
Айни йўналишдаги давра суҳбати Имом Термизий ўрта махсус ислом таълим муассасаси қошидаги “Қуръони карим ва тажвид” ўқув курсининг навбатдаги 46-давра тингловчилари билан ҳам ўтказилди. Унда таълим муассасаси мутасадди вакиллари бўлғуси қори ва қорияларга ўз тавсияларини берди.
Якунда “Қуръони карим ва тажвид” ўқув курсининг навбатдаги босқич тингловчилари ҳаққига дуои-хайрлар қилинди.
Ўзбекистон мусулмонлари идораси
Матбуот хизмати
#xabar #haj2025 #tabrik
Муқаддас заминда ҳаж ибодатини адо этаётган миллионлаб мўмин-мусулмонлар қатори 15 минг нафар юртдошларимиз Мино ва Арафот каби муборак манзилларда улуғ амалларни ихлос ила бажармоқдалар.
Шу йил 5 июнь Арафа куни Маккаи мукаррамадаги Арафот ҳудудида бўлиб турган ҳожиларимиз тоату ибодатларда бўлиб, муҳтарам Президентимиз ва халқимизга Қурбон ҳайити табрикларини йўлладилар. (https://muslim.uz/e/post/43499-o-zbekiston-hojilarining-prezident-shavkat-mirziyoyevga-qurbon-hayiti-munosabati-bilan-yo-llagan-tabrigi) Уни ҳаж ибодатини ихлос ила адо этаётган ҳожиларимиз номидан Ўзбекистон мусулмонлари идораси раиси, муфтий Шайх Нуриддин Холиқаназар ҳазратлари ўқиб эшиттирдилар. Унда жумладан бундай дейилган:
“Ҳурматли Президент Сизни ва Сиз орқали юртдошларимизни ҳаж ибодатини адо этаётган ҳамюртларимиз номидан мусулмон уммати учун энг улуғ байрам – Қурбон ҳайити билан самимий муборакбод этамиз.
Биз, ўзбекистонлик ҳожилар шундай файзли кунлар учун шукроналар айтиб, Ҳақ таолодан жонажон юртимизга қут-барака, азиз халқимизга фаровонлик ва фарзандларимизга баркамоллик сўраб эзгу дуолар қилмоқдамиз.
Зеро, Пайғамбаримиз соллаллоҳу алайҳи васаллам “Дуоларнинг энг яхшиси арафа куни қилинган дуодир”, деб хушхабар берганлар.
Шунингдек, ҳожиларимиз гуноҳлар афв этиладиган ва дуолар ижобат бўладиган Арафотда туриб, Аллоҳ таолодан Юртбошимизга мустаҳкам соғлиқ, узоқ умр ва улкан муваффақиятлар тилаб, хайрли ишлари доимо бардавом бўлишини илтижо қилиб сўрашди.
Шу билан бирга юртимиз ҳожилари яратиб берилган имкониятлар ва кўрсатилган эҳтиромдан руҳланиб, юртга қайтгандан кейин “Янги Ўзбекистоннинг тинчлик ва маънавият тарғиботчилари” деган эзгу ташаббусни амалга оширишни бир овоздан илгари сурдилар. (https://muslim.uz/e/post/43499-o-zbekiston-hojilarining-prezident-shavkat-mirziyoyevga-qurbon-hayiti-munosabati-bilan-yo-llagan-tabrigi)
Аллоҳ таоло мўмин-мусулмонларнинг ҳажларини мабрур айласин.
Ўзбекистон мусулмонлари идораси
Матбуот хизмати