Ўзбекистон халқаро ислом академияси Малака ошириш марказида жорий йилнинг 22-27 январь кунлари "Хотин-қизлар ўртасида ижтимоий-маънавий муҳитни соғломлаштиришнинг долзарб масалалари" мавзусида малака ошириш ўқув курслари ўтказилди.
Олий Мажлис Сенати, Оила ва хотин-қизлар қўмитаси, Дин ишлари бойича қўмита, Ўзбекистон мусулмонлари идораси ҳамда Ўзбекистон халқаро ислом академияси ҳамкорлигида ташкил этилган семинарларда тингловчилар соҳа мутахассисларидан турли мавзулардаги маърузаларни тинглашди.
Шу йил 27 январь куни мазкур ўқувларнинг якунига бағишланган тақдирлаш маросими ўтказилди. Унда Ўзбекистон халқаро ислом академияси ректори Музаффар Комилов, Дин ишлари бўйича қўмита раисининг ўринбосари Матлуба Қаҳҳорова, "Оила ва гендер" илмий-тадқиқот институти бўлим бошлиғи Фарида Йўлдошева, Малака ошириш маркази директори Ҳусниддин Ахмедов ҳамда тингловчилар иштирок этишди.
Академия ректори тадбирда сўз олар экан, бу каби ўқувларни ташкил этишдан мақсад мазкур соҳадаги фаолиятни янада ривожлантириш, тизимда ишни тўғри ва самарали ташкил этиш, жойларда хотин-қизлар соҳасидаги муаммоларни ечиш ва уларни ҳар томонлама қўллаб-қувватлаш юзасидан тайинланган масъул ходимларнинг кўникма ва малакаларини ошириш эканини таъкидлади.
Якунда тингловчиларга сертификатлар топширилди.
Ўзбекистон мусулмонлари идораси
Матбуот хизмати
Муборак Рамазон кунларида эҳтиёжманд инсонларга ёрдам бериш, уларни хурсанд этиш Ислом динида буюк фазилат саналади. Шу муносабат билан Фарғона шаҳрида кам таъминланган, ёрдамга муҳтож инсонлар учун ифторлик дастурхони ёзилди.
Меҳрибонлик ва саховат муҳити ҳукм сурган тадбирда Фарғона вилояти бош имом-хатиби Убайдуллоҳ домла Абдуллаев ҳам иштирок этиб, йиғилганларни муборак ой билан табриклади.
Рамазон – саховат, бирдамлик ва бағрикенглик ойи экани, бу ойда мўмин-мусулмонлар ибодатларини зиёда қилиб, мустаҳкам биродарлик ва бағрикенглик билан яшашга даъват этилгани, муҳтожларни қўллаб-қувватлаш инсон учун икки дунё саодатига элтадиган фазилат экани таъкидланди.
Тадбир давомида меҳмонларга таом тортилиб, дуолар қилинди ва хайрли амалларга тарғиб этилди. Тадбир иштирокчилари хайрия ифторлиги ташкилотчиларига ва саховатли инсонларга ўз миннатдорликларини изҳор қилдилар. Мана шундай хайрли тадбирлар орқали юртимизда меҳр-мурувват, ўзаро қўллаб-қувватлаш фазилатлари янада мустаҳкамланиши қайд этилди.
Фарғона вилояти вакиллиги
Матбуот хизмати