Ҳожи деган шарафли номга сазовор бўлган, Аллоҳнинг байтини зиёрат қилиб, Исломнинг бешинчи рукнини адо этган киши ўз манфаатларидан кўра халқиникини, Ватаниникини устун қўяди, қўя олади. Шу боис у ҳар жойда азиз ва мукаррамдирлар.
Шу йил 3 апрель куни Ўзбекистон мусулмонлари идораси раиси ўринбосари Зайниддин домла Эшонқулов бошчилигида Чирчиқ шаҳридаги «Марказий» жоме масжидида йиғилиш ўтказилди.
Тадбирда Тошкент вилояти бош имом-хатиби Дониёр домла Икромов, Чирчиқ шаҳар бош имом-хатиби, имом-домлалар, ҳожи оталар, ҳожи оналар иштирок этди.
Сўнгра тадбир иштирокчилари шаҳардаги маҳаллаларга ташриф буюрдилар.
Кам таъминланган, боқувчсини йўқотган, ўзгалар кўмагига муҳтож оилалар ҳолидан хабар олиниб, уларга зарур кўмаклар берилди.
Шу билан бирга, адашиб турли ёт оқимлар, ақидаси бузуқ кимсалар таъсирига тушиб қолган фуқаролар, айниқса, ёшларга ҳам ҳожи оталар, ҳожи оналар зарур тавсиялар, йўл-йўриқлар беришди.
Ватанимиз равнақи, юртимиз тинчлиги ва осойишталиги, маҳаллаларимиз ободлигини сўраб қилинган хайрли дуолар ташрифларга маънавий зеб бағишлади.
Ўзбекистон мусулмонлари идораси
Тошкент вилояти вакиллиги
Матбуот хизмати
#xabar #haj2025
Шу кунларда Маккаи мукаррамада ҳаж амалларини адо этишга тайёргарлик кўраётган зиёратчилар учун таниқли уламолар, имом-домлалар билан бир қаторда мутахассис ва отинойилар томонидан ҳам маърифий суҳбатлар узвий давом эттирилмоқда.
Жумладан, Ўзбекистон мусулмонлари идораси Хотин-қизлар масалалари бўйича бўлим ходими Мунира Абубакирова ва Тошкент шаҳар Янгиҳаёт тумани бош имом-хатибининг хотин-қизлар масалалари бўйича ёрдамчиси Сижоат Шарипова юртимизнинг ҳар бир ҳудудидан келган аёл зиёратчилар иштирокида суҳбатлар ўтказмоқда.
Шунингдек, олий тоифали шифокор Муҳаббат Саатова ҳам тиббий маслаҳатлар бермоқда.
Маърифий учрашувларда муборак заминда тоат-ибодат, дуою зикр ва зиёрат билан машғул бўлиб турган диёримиз аёлларига ҳаж ибодати рукнлари, фазилатлари ва сафарда аёлларга оид тиббий масалалар ҳам атрофлича тушунтирилмоқда. Уларни қизиқтирган саволларга жавоблар берилмоқда.
Ўзбекистон мусулмонлари идораси
Матбуот хизмати