23 Октябр, 2026, 12 Жумадул аввал, 1448
23 Октябр, 2026, 12 Жумадул аввал, 1448
Оталари уларга биринчи мактубни юборди. Лекин улар уни ўқиш учун очмадилар, балки ҳар бирлари мактубни пешоналарига суртиб: “Бу буюк ҳабибимиздандир”, дедилар. Ушбу хатнинг кўринишига назар қилиб, уни чиройли қутига солиб қўйишди. Болалар бошқа пайтларда мактубнинг чангини артиш учун олишар ва яна жойига қўйиб қўйишарди. Оталари оиласига юборган ҳамма хатларни шундай қилишди.
Йиллар ўтди. Ота уйга қайтди. Лекин улардан биргина фарзанд қолганди. Ота ундан сўради:
– Онанг қаерда?
Ўғил деди:
– Улар қаттиқ касал бўлдилар. Бизда онамни даволаш учун маблағ топилмади ва вафот этдилар.
Ота деди:
– Биринчи мактубимни очмадингизми?! Мен сизларга катта маблағ юборган эдим-ку!
Ўғил деди:
– Йўқ!
Ота яна сўради:
– Уканг қаерда?
Ўғил деди:
– Сиз унинг баъзи ўртоқларини танирдингиз. Онамнинг ўлимидан кейин унга насиҳат қиладиган ва уни тўғри йўлга соладиган кимса топилмади. У дўстлари билан кетди.
Ота ҳайратланиб деди:
– Нима учун?! Ёмон ўртоқларини тарк қилиб, менинг олдимга келишини ёзган мактубимни ўқимадингизми?
Ўғил жавобан:
– Йўқ, – деди.
Ота деди:
– Ла ҳавла ва ла қуввата илла биллаҳ. Опанг қаерда?
Ўғил деди:
– Турмушга чиқиш учун маслаҳат сўраган ҳалиги йигит билан никоҳланди ва у ҳозир бахтсиз яшаяпти.
Ота дарғазаб бўлиб деди:
– Сизларга бу йигитнинг обрўси, хулқи ёмонлиги ва бу тўйга норозилигим ҳақида ёзган хатимни ўқимадингизми?
Ўғил деди:
– Йўқ! Биз хатларингизни бир чиройли қутида сақладик. Доим уни зийнатладик, пешонамизга суртдик, лекин ўқимадик.
Бу оиланинг аҳволи, унинг бирлиги қандай тарқалиб кетгани, отанинг мактубини ўқимай, ундан манфаат олмай, балки уни муқаддаслаб, унда ёзилганларга амал қилмай, ҳаётларини қийинлаштирганликлари ҳақида тафаккур қилдим. Сўнг стол устидаги чиройли қутига солиб қўйилган Қуръони Каримга назар солдим... Шўрим қурисин!
Албатта, мен Аллоҳнинг Мактубига анави болалар оталарининг хатларига муомала қилганлари каби муносабатда бўляпман. Мен Мусҳафни столим устига қўйганман-у, лекин уни ўқимайман, ундаги нарсалардан фойдаланмайман ҳам. Ахир, у бутун ҳаётимнинг дастури-ку!
Роббимга истиғфор айтдим. Мусҳафни очдим ва ҳеч қачон уни тарк этмасликка қарор қилдим.
Араб тилидан Зиёда Мираҳматова таржимаси
Ўзбекистон элчихонаси ташаббуси билан Польша Мусулмонлар диний иттифоқи раиси, муфтий Томаш Мишкевичнинг мамлакатимизга ташрифи амалга оширилди, деб хабар бермоқда “Дунё” АА.
Ташриф доирасида Ўзбекистон мусулмонлари идораси раисининг биринчи ўринбосари Ҳамиджон Ишматбеков ва раис ўринбосари Зайниддин Эшонқулов муфтий Томаш Мишкевич бошчилигидаги делегацияни қабул қилди.
Учрашувда томонлар ўзаро ҳамкорликни мустаҳкамлаш, дин пешволари ўртасида тажриба алмашиш, зиёрат туризмини ривожлантириш ҳамда “ҳалол” стандартлари борасидаги ҳамкорликни кенгайтириш масалаларини кўриб чиқди.
Польша делегациясига Ўзбекистондаги диний-маърифий ҳаёт, Мусулмонлар идораси, масжидлар, мадрасалар ва Фатво маркази фаолияти, диний таълим тизимидаги ислоҳотлар ҳақида маълумот берилди.
Меҳмонлар Ҳазрати Имом мажмуасига ташриф буюриб, у ерда амалга оширилаётган ободонлаштириш ишлари ва ноёб қўлёзмалар фонди билан танишди.
Муфтий Томаш Мишкевичнинг Ислом цивилизацияси маркази директори Фирдавс Абдухолиқов билан ҳам учрашди. Иштирокчилар марказнинг халқаро илмий-маърифий макондаги ўрни ва келгусидаги ҳамкорлик истиқболлари юзасидан фикр алмашди. Суҳбатдан сўнг Польша делегацияси Ўзбекистоннинг тарихий, илмий, маданий ва диний меросига бағишланган экспозицияларни кўздан кечирди.
Ташриф дастури доирасида делегация Ўзбекистон Туризм қўмитаси раиси ўринбосари Суҳробжон Бобокалонов билан ҳам кўришди. Мулоқотда мамлакатимизнинг бой тарихий-маданий ва исломий мероси, зиёрат туризмини ривожлантириш чора-тадбирлари ҳақида тўхталиб ўтилди.
Томонлар буюк ислом алломалари – Имом Бухорий, Имом Мотуридий, Имом Термизий ва Баҳоуддин Нақшбанд меросини, Тошкент, Самарқанд ва Бухородаги тарихий обидалар ҳамда муқаддас қадамжоларни Польша мусулмон жамоалари орасида кенг тарғиб қилиш имкониятларига алоҳида эътибор қаратди.
Учрашувда ҳамкорликни ривожлантириш ва Ўзбекистоннинг зиёрат туризми имкониятини Польшада янада кенг намоён этиш чора-тадбирлари муҳокама қилинди.
Ташриф якунида Польша делегацияси Самарқанд ва Бухорода бўлиб, у ердаги тарихий қадамжолар, зиёратгоҳлар ва бошқа диққатга сазовор жойлар билан танишди.
Ўзбекистон мусулмонлари идораси Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 