Муборак кун
Сабр қилинг, сизга етса офат,
Кутинг, ортидан тезда келар бахт.
Бир тажриба қилиб кўринг: Бомдод намозини ўқиганингиздан сўнг ўн-ўн беш дақиқа қиблага қараб тавозеъ билан ўтиринг, зикр ва дуони кўпайтиринг. Аллоҳдан гўзал, муборак, бахтиёр кун сўранг. Ундан бугунги кунингизга муваффақият, ёмонлик ва мушкул ишлардан паноҳ сўранг. Бу кунингизга кенг ризқ ва унинг яхшилигини тиланг. Чунки ризқ, шодлик ва яхшилик Аллоҳдангина сўралади. Аллоҳ насиб қилса мана шу кун сиз учун бугунги манфаатли, муборак ва гўзал кунингиз учун кафил бўлади.
Агар сиз бирор амални бажарсангиз, тавозеъ билан ўтириб хушовоз ва таъсирли қорининг қироатини тингласангиз қалбингиздаги хиралик, шак ва гумонлар ювилиб кетади. Шунда сиз гўзал ва қалбингиз хотиржам бўлганини ҳис қиласиз.
Шуъла: Қила олмайдиган ишларингиз туфайли ғам еманг. Бунинг ўрнига қила оладиган ишларингизни янада гўзал бажаришга ҳаракат қилинг.
Доктор Оиз ал-Қарнийнинг
"Дунёдаги энг бахтли аёл" китобидан
Имом-хатиблар иштирокида навбатдаги йиғилиш ўтказилди
Бугун, Наманган вилояти бош имом-хатиби, Уламолар кенгаши аъзоси Абдуллоҳ домла Саматов раислигида Ўзбекистон мусулмонлари идораси Наманган вилоят вакиллигининг мажлислар залида вилоятдаги имом-хатиблар иштирокида йиғилиш ўтказилди.
Йиғилишда Наманган вилояти ҳокимининг ўринбосари Хатамов Жамшед Мухторович иштирок этди. Унда 2026 йилнинг 9 ойи мобайнида амалга оширилган ишлар муҳокама қилинди.
Йиғилишда имомлик шарафли ва масъулиятли вазифа экани, бугунги кун имоми замонга зийраклик, теран фикр билан қараши, ўз устида мунтазам ишлаши ва мўмин-мусулмонларнинг маънавий-маърифий соҳадаги эҳтиёжларини қондириш учун тинимсиз изланиб, хизмат қилишлари зарур экани алоҳида қайд этилди.
Бундан ташқари, имомлар ҳудудлардаги МФЙлар билан мунтазам алоқада бўлиб, ҳожилар билан биргаликда ёшлар тарбиясига алоҳида эътибор қаратиш, илм-маърифатга қизиқтириш ва ёш авлод келажаги учун мустаҳкам пойдевор яратиш, оилаларни тинч-тотув яшаши, фарзандларни бевақт тирик етим бўлмаслиги учун ажримларнинг олдини олиш, кексаларни ҳурмат қилиш, қўшничилик одобларига риоя қилиш, юрт тинчлиги ва осойишталиги учун барча бирдек масъуллиги кабиларга алоҳида эътибор қаратиш таъкидланди.
Ўзбекистон мусулмонлари идораси Наманган вилояти вакиллиги Матбуот хизмати
