Bangladeshda Ginnesning rekordlar kitobiga kirish imkoniga ega noyob masjid qurib bitkazilmoqda.

Tangayl okrugida 201 gumbazli masjid va balandligi qariyb 140 metr bo'lgan minoraning qurilishi nihoyasiga etish arafasida.

Ushbu okrug markazidan 7 km uzoqlikda joylashgan Dakkxin Patxaliya qishlog'ining masjidi borasidagi g'oyani Bangladesh Bank xodimlari federatsiyasining sobiq prezidenti Rafiqul Islom 2012 yildayoq amalga oshirishni diliga tugib qo'ygan edi. Bunga esa qishloqdagi masjidga jamoatning sig'may qolgani sabab bo'ldi, qishloqdagilar tashabbusni qo'llab-quvvatladi.

Qurilish ishlari 2013 yilning yanvarida boshlandi va birinchi g'ishtni Rafiqul Islomning onasi Riziya Hotun qo'yib bergan edi. Rafiqul Islomning ukasi Abdul Qodirning aytishicha, hozirga kelib qurilish ishlarining 75 foizi tugallangan.

“Dunyoda chiroyli va katta masjidlar ko'p, biroq bizning masjidning farqi shuki, unda 201 ta gumbaz bor. Bilishimizcha, dunyoning hech bir masjidida gumbazlar bunchalik ko'p emas”, – deydi Abdul Qodir.

Qurilishi tugagandan keyin Dakkxin Patxaliya masjidida bir paytning o'zida 15 ming kishi namoz o'qishi mumkin bo'ladi.

O'zbekiston musulmonlari idorasi matbuot xizmati