Namanganda mutlaqo yangi qiyofa kasb etgan “O'n bir Ahmad” ziyoratgoh majmuasida mukammal ta'mirlash ishlari yakunlanib, ziyoratchilar va sayyohlar ixtiyoriga topshirildi.

2018 yilda Namangan shahrida joylashgan “O'n bir Ahmad” ziyoratgoh majmuasida mukammal ta'mirlash ishlari boshlanib, ushbu muborak maskanga zamonaviy tus berish, sayyohlar va ziyoratchilar uchun barcha qulay sharoitlar yaratish bo'yicha qator ishlar bajarildi.

O'zA xabariga ko'ra, 2020 yil sentyabr' oyida bunyodkorlik jarayoniga yangidan impul's berildi. Fidokor quruvchilarning zarbdor mehnati tufayli qisqa muddatda zamonaviy andozalarga to'liq javob beradigan bino va inshootlar qad rostladi. Ularni bunyod etishda milliy me'morchilik an'analaridan keng foydalanildi.

Ushbu hududni mo''jazgina istirohatgohga ham o'xshatish mumkin.

Ta'kidlash joizki, O'n bir Ahmad tarixini o'rganish yuzasidan boshlangan xayrli ishlarimiz to'xtamaydi. Ul zotlarning har biri haqida kitoblar va dostonlar yozilajak. Ajdodlarning bebaho merosini ilmiy asosda chuqur tadqiq etish, qadamjolarini obod maskanga aylantirish va kelajak avlodga bus-butun etkazish bugungi avlodning vazifasidir.

Tarixiy obidalarni asrab-avaylashga alohida e'tibor qaratilayotgani, ziyoratgohlar va qadamjolar obodligi yo'lidagi xayrli ishlar yurtdoshlarimiz va xalqaro jamoatchilik tomonidan keng qo'llab-quvvatlanmoqda. Bunday ezgu amallar hali davom etadi.

O'zbekiston musulmonlari idorasi matbuot xizmati