Mo'min-musulmonlar intiqib kutgan Ramazon oyi ham kirib keldi. Yurtdoshlarimiz o'zgacha kayfiyat va shukuh bilan ushbu farz amalini ado etishmoqda. Ayniqsa, bu yilgi Ramazoni sharifda mamlakatimizdagi 1380 dan ortiq jome masjidlarida taroveh namozlari o'qilayotgani, Qur'oni karim xatm qilinayotgani barchamizning ko'nglimizni shod qilmoqda.
O'tgan yili mo'min-musulmonlar karonavirus pandemiyasi sabab taroveh namozlarini jamoat bo'lib o'qiy olmagan, xatmi Qur'on fazlidan bahramand bo'lolmagan edi. Bu gal esa Alloh taoloning inoyati bilan ana shunday baxtga sazovor bo'lmoqdamiz.
Afsuski, koronavirus xastaligi hali-hamon butunlay bartaraf bo'lgani yo'q. Shuning uchun namozxonlarimiz taroveh namozlarida karantin qoidalariga qat'iy rioya qilishlari talab etilmoqda.
— Har oqshom masjidga chiqib, taroveh namozlarini chiroyli tarzda, hushu va zavq bilan ado etmoqdamiz, — deydi poytaxtimizning “Novza” mahallasida istiqomat qiluvchi Oybek ota Otajonov — Hamma tibbiy niqobda, salomatligimizga jiddiy e'tibor bermoqdamiz. Duolarimizda yurtimiz tinchligi, xalqimiz farovonligi, shu bilan birga jahonga tashvish solib turgan koronavirus kasalligi tezroq bartaraf bo'lishini Alloh taolodan iltijo bilan so'ramoqdamiz.
Yurtimiz masjidlaridagi qur'onxonliklar butun dunyo musulmonlarida havas va shodlik uyg'otmoqda. Ayniqsa, xorijda ishlab, o'qiyotgan vatandoshlarimiz bu haqda iliq fikrlarini izhor etishyapti.
— Ijtimoiy tarmoqlarda ushbu xabarlarni o'qib juda xursand bo'ldim, — deydi Janubiy Koreyaning Puson shahridagi Dong-A universiteti talabasi Olmosjon Qodirov. — Hamma yurtdoshlarimga Ramazon oyi muborak bo'lsin! Taroveh namozlari hamda xatmi Qur'on savoblaridan O'zbekistonimiz tinch, osuda, yanada ravnaq topaversin.
Payg'ambarimiz Muhammad Mustafo sollallohu alayhi vasallam: “Ro'za tutgan kishining uyqusi ibodat, sukut saqlashi Allohga tasbeh, qilgan amalining savobi ko'paytirib beriladi, duolari ijobat va gunohlari kechiriladi”, deb marhamat qilganlar.
Ro'zadorlar mazkur damlarni g'animat bilib, muborak hadisi shariflarga amal qilib, har qachongidanda ezgu va xayrli ishlarga bosh qo'shmoqdalar. Hususan, nogironlar, yolg'iz keksalar, boquvchisini yo'qotgan kishilar hamda kam ta'minlangan oilalarga mehr-muruvvat ulashilmoqda, bemorlar holidan xabar olinayapti.
Alloh taoloning rahmati va mag'firati yog'ilib turgan Ramazon oyida barchalarimizning duolarimiz qabul, murodimiz hosil bo'lsin!
O'zbekiston musulmonlari idorasi
Matbuot xizmati
O‘zbekistondagi Islom sivilizatsiyasi markazi ekspozitsiyalari orqali islom madaniyati va Qur’on ilmining turli davrlardagi rivojlanish bosqichlari haqida chuqur tasavvur olish imkoniyatiga ega bo‘lish mumkin. Shuningdek, Qur’on matnlari qanday saqlanib qolgani haqida ham ma’lumotlar taqdim etilishi kutilyapti.
Prezident Shavkat Mirziyoyev tashabbusi bilan bunyod etilayotgan O‘zbekistondagi megaloyiha — Islom sivilizatsiyasi markazining ekspozitsiyalarini shakllantirishda kontentlarni zamonaviy texnologiyalar asosida tayyorlash bosh vazifa sifatida belgilangan.
Ana shu vazifalar ijrosini ta’minlash maqsadida Markazning maxsus shtabida Qur’on zali ekspozitsiyasi bo‘yicha yakuniy taklif va xulosalar muhokama qilindi. Unda ekspozitsiyani mazmunan boyitish, noyob qo‘lyozmalarni tanlab joylashtirish, ularni zamonaviy texnologiyalar asosida keng ommaga taqdim etish kabi masalalar muhokama qilindi.
Zalda 114 ta noyob Qur’on qo‘lyozmasi to‘plangan bo‘lib, bu yurtimizda Qur’onga bo‘lgan hurmat va e’tiborni namoyon etadi. Qo‘lyozmalar orasida juda qadimiy va nodir nusxalar ham mavjud. Jumladan:
- “Katta Langar Qur’oni” — bugungi kunda juda kam sonli nusxalari saqlanib qolgan, ilk islomiy qo‘lyozmalardan biri;
- Hazrati Usmon Qur’oni — Qur’onning ilk nashrlaridan biri bo‘lib, islom olamida muqaddas manba sifatida e’tirof etiladi.
Shuningdek, boshqa davrlarga oid ko‘plab arab grafikasida yozilgan, bezakli, noyob qo‘lyozmalar namoyish qilinadi. Bu qo‘lyozmalar tarixiy va diniy ahamiyatga ega bo‘lib, ularni o‘rganish orqali islom madaniyati va Qur’on ilmining turli davrlardagi rivojlanish bosqichlari haqida chuqur tasavvurga ega bo‘lish mumkin.
Muhokamada Qur’on zalini tashkil etishda zamonaviy uslublarni qo‘llash, ya’ni nafaqat kitoblarni saqlash, balki ularni interaktiv va tushunarli shaklda taqdim etish masalalari muhim o‘rin tutdi. Jumladan, quyidagi texnologiyalarni joriy etish rejalashtirilmoqda:
interaktiv ekranlar – har bir qo‘lyozmaning sahifalarini yaqinlashtirib, harflari va bezaklarini ko‘rib chiqish imkoniyati;
audiogidlar (ovozli yo‘lboshchilar) – har bir eksponat haqida o‘zbek, arab, ingliz tillarida ma’lumotlar tinglash imkoniyati;
virtual ekspozitsiyalar – internet orqali Qur’on zalini masofadan turib tomosha qilish imkoniyati;
Zamonaviy yoritish va namoyish texnikasi – qo‘lyozmalarni zarar yetkazmasdan ko‘rsatish imkonini beradi.
Bu usullar orqali tashrif buyuruvchilar har bir Qur’on nusxasining tarixi, yozilgan davri, geografiyasi va san’at darajasi haqida to‘liq ma’lumotga ega bo‘lishadi.
Mazkur zal faqat ko‘rgazma emas, balki ilmiy tadqiqotlar olib boriladigan markaz ham bo‘ladi. Bu yerda sharqshunoslar, tarixchilar, filologlar, hattotlar va diniy olimlar uchun bebaho manbalar taqdim etiladi.
Hamidulla Lutfullayev, Sharqshunoslik instituti Tarixiy manbalar bo‘limi boshlig‘i, olim:
– Qur’oni karimning dastlabki davrlariga oid, ayniqsa Hazrati Usmon davrida yozilgan yettita qo‘lyozma nusxasi aniqlangan. Ekspozitsiyadan joy olishi kutilayotgan bu manbalar bizga Qur’on matni qanday saqlanib qolganini ko‘rsatadi va o‘rganishimizga zamin yaratadi. Qur’on zali yosh avlod, xorijiy mehmonlar, tadqiqotchilar va ziyoratchilar uchun diniy, madaniy va ilmiy boylikni bir joyda ko‘rish imkonini beradi.
Mazkur loyiha orqali O‘zbekiston musulmon olamida yana bir bor ilm, ma’naviyat va bag‘rikenglik markazi sifatida o‘z o‘rnini mustahkamlashi kutilmoqda. Qur’on zali esa bu yo‘ldagi muhim qadamlardan biri bo‘lib xizmat qiladi.
cisc.uz