Halqimiz azal-azaldan mehr-oqibat, silai rahm, qiyinchilik va mashaqqatli kunlarda bir-birini qo'llab-quvvatlash, muhtojlarga himmat ko'rsatish kabi ezgu fazilatlari bilan boshqa xalqlarga ibrat bo'lib kelgan. Zero, yiqilganni suyash, ochni to'ydirish, etimlarga muruvvat ko'rsatish kabi go'zal xulqlar ummat yo'lboshchisi bo'lgan Muhammad alayhissalom hamda u Zot olib kelgan Islom dinining bosh shiorlaridan ekani ham ma'lum va mashhurdir.

Abu Umoma roziyallohu anhudan rivoyat qilingan hadisi sharifda Rasululloh sollallohu alayhi vasallam shunday marhamat qilganlar: «Kim Alloh azza va jalla uchun bir etimning boshini silasa, qo'li nechta sochning ustidan o'tsa, shuncha hasanot yoziladi. Kim o'z huzuridagi etim qizga yoki bolaga yaxshilik qilsa, men o'sha odam bilan jannatda mana bunday bo'laman» deb ikki barmoqlarini yaqinlashtirdilar».

Abu Hurayra roziyallohu anhudan rivoyat qilingan boshqa bir hadisda esa Payg'ambarimiz alayhissalom: «Musulmonlarning uylari ichida eng yaxshisi undagi etimga yaxshilik qilinadigan uydir. Musulmonlarning uylari ichida eng yomoni undagi etimga yomonlik qilinadigan uydir», dedilar. So'ngra ikki barmoqlariga ishora qilib: «Men va etimning kafili jannatda mana bundaymiz» dedilar».
Gulbahor opa Turg'unovaga Alloh sinov berdi. Turmush o'rtog'idan erta ajragan, uch nafar farzandga ham otalik, ham onalik qilib kelmoqda. Mahalladagilarning aytishicha, u mehnatkash, sabr-matonatli hamda iffat va hayoda ko'pchilikka namuna bo'la oladi.

Honadondagi vaziyatdan boxabar bo'lgan oltiariqlik imom-xatiblar birlashib, saxovatpesha kishilar ko'magida, ikki xonalik kulbada hayot kechirayotgan bu oilaga, uch xona hamda oldi yopiq ayvon shakldagi yangi uy bunyod etilib, muborak Ramazon oyi oldidan xonadon sohiblariga tuhfa qilindi.

Tadbirga viloyat bosh imom-xatibi Ubaydulloh domla Abdullayev ham taklif etildi. Oltiariq tumani bosh imom-xatibi Baxtiyorjon domla Shermatov mazkur xonadon o'zining kamtarinligi hamda boshqa go'zal fazilatlari bilan boshqalarga namuna bo'lib kelayotgani, yangi imoratni qad rostlashida tashabbus qilgan himmatli kishilar tomonidan amalga oshirilgan xayrli va ibratli ishlar haqida viloyat bosh imom-xatibiga so'zlab berdi.

Ubaydulloh domla Abdullayev ushbu xayrli ishga hissa qo'shgan barchaga minnatdorchilik bildirib, yurtimiz tinchligi, xalqimiz farovonligi, dinimiz ravnaqi bu tashabbusga hissa qo'shgan saxovatpesha xalqimiz haqqiga ikki dunyo saodatini so'rab duo qildilar.

O'MI Farg'ona viloyati vakilligi Matbuot xizmati