Halqimiz saxovatli, ehtiyojmand kishilarga yordam berishga doimo shay. Yurtdoshlarimiz orasida savob ishlar qilib, odamlarga, elga nafi tegishini hayotining mazmuniga aylantirgan solihlar ko'p. Biroq oramizda yaxshiliklarini minnat qilib, savob amallarini yo'qqa chiqaruvchilar ham uchrab turadi.

Minnat tufayli qilgan ezgu amallarimizga soya tushadi, saxovatimizga putur etadi. Bu haqda Alloh taolo Qur'oni karimda bunday deydi: «Ostidan anhorlar oqib turadigan, xurmoyu uzumlari bor, turli xil mevalari mo'l bog' egasi keksayib, notavon (yosh) bolalari bilan qolgan paytida o'sha bog'ini olovli to'fon urib, yonib ketishini xohlaydimi?! Tafakkur qilursiz deb, Alloh O'z oyatlarini sizlarga shunday bayon qiladi» (Baqara surasi, 266-oyat).

Oyatda Alloh yo'lida qilingan xayrli ishlar, savob amallar mevazor boqqa qiyoslanib, o'tli bo'ron bog'ni kuydirganidek, sadaqa va saxovat ketidan qilingan minnat solih amallarni yo'qqa chiqarishi aytilgan. Demak, mo'min kishi, “men senga falon yaxshilikni qilgan edim, lekin sen bilmading”, deb hech qachon minnat qilmasligi kerak. Avvalo, yaxshilik birov bilishi uchun qilinmasligini teranroq anglash zarur. Zero, “Yaxshilik qil – daryoga tashla, baliq biladi, baliq bilmasa – Holiq”, “O'ng qo'ling berganini chap qo'ling bilmasin” kabi hikmatli gaplar bejiz aytilmagan.

Minnat yaxshiligimizdan manfaat ko'rgan kishiga salbiy ta'sir ko'rsatadi. Ko'ngli o'ksiydi, qattiq ranjiydi. Bobomiz Alisher Navoiy “Mahbubul qulub” asarida bunday kishilarning ko'nglidan nimalar kechishini go'zal tarzda bayon qilgan:

Bu bedod ahlidin gar jon berib maxlas erur mumkin,
Qilib jonni fido, billahki, minnat qo'yg'amen jong'a.

Ya'ni, mutafakkir shoir minnat qiluvchi kimsalarni zolimga tenglaydi. Ulardan hatto jonini berish evaziga xalos bo'lish mumkin bo'lsa ham, bunga bajonidil tayyor ekanini aytadi.

Minnat barcha xayrli amallarimizni yuvib ketar ekan, bunga doimo e'tiborli bo'laylik. Besh kunlik dunyoda bilib-bilmay birovning ko'nglini og'ritib qo'yishdan o'zimizni tiyaylik. Yaxshiligimizni pesh qilib, Yaratganga gunohkor bo'lmaylik.

Karimqul MAVLONOV,
Bekobod tumani