O'tgan yili 27 aprelda Buxoro viloyatida bo'lgan kuchli to'fonda Olot tumanidagi “Halifa” jome masjidi ham katta talafot ko'rgan edi. O'zbekiston musulmonlar idorasi, mahalliy hokimlik tashabbusi va sa'y-harakati, sohovatpesha insonlar ko'magi bilan ushbu masjid obod qilindi.

Honaqoh ustidagi 13 metrli qayta ta'mirlangan gumbaz jomega o'zacha mahobat va ko'rk bag'ishlab turibdi. Katta xonaqohning o'zida 1000 dan ziyod namozxon ibodat qilishi mumkin.

Zamonaviy usuldagi issitish tizimi va sovutgichlar o'rnatildi. Shuningdek, tahoratxona, kutubxona, ma'muriyat xonalari, avtomobil qo'yish maydoni qurildi, hovliga manzarli daraxt va gullar ekildi.

Ma'lumot uchun, “Halifa” jome masjidi 1912-1914 yillarda mahalliy aholi hashari bilan qurilgan. Sobiq sovet ittifoqi davrida omborxonaga aylantirilgan. 1991 yildan “Halifa” qishlog'ining maraka-marosimlari o'tkazib kelingan. Masjid 2003 yili davlat ruyxatidan o'tkazildi. Shundan so'ng jomeda kundalik jamoat, “juma”, “hayit” namozlari ado etib kelinmoqda.

Qur'oni karimda masjidlarni obod qiluvchilar bunday vasf qilinadi: “Allohning masjidlarini faqat Allohga va oxirat kuniga iymon keltirgan, namozni to'kis ado etgan, zakotni (haqdorlarga) ato qilgan va yolg'iz Allohdangina qo'rqadigan zotlargina obod qilurlar. Ana o'shalar hidoyat topuvchi zotlar bo'lsalar, ajabmas” (Tavba surasi, 18-oyat). Alhamdulillah, halqimiz orasida bunday kishilar ko'pchilikni tashkil etadi.

Allohni yaxshi ko'radigan sahovatpesha insonlardan O'zi rozi bo'lsin, ushbu xayrli ishga hissa qo'shgan barchaga ajru mukofotini ko'paytirib bersin.

K.Mavlonov,
masjid imom-xatibi