Kecha, 18 fevral' kuni Adliya vazirligining Surxondaryo viloyati boshqarmasi Sariosiyo tumani “Nurafshon” mahallasida joylashgan “Abdurahmon hoji ota” jome masjidini ro'yxatdan o'tkazib, bu to'g'ridagi guvohnomani masjid xodimlariga topshirdi. Shu bilan yurtimizdagi jome masjidlar soni 2082 taga etdi.

2020 yil 26 noyabr' kuni O'zbekiston musulmonlari idorasi raisi, muftiy Usmonxon Alimov hazratlari va Din ishlari bo'yicha qo'mita raisi Abdug'ofur Ahmedov Surxondaryo viloyatiga tashrifi davomida yangi qurilgan “Abdurahmon hoji ota” jome masjidi bilan yaqindan tanishgan edilar.

Ma'lumot uchun, “Abdurahmon hoji ota” jome masjidi qurilishi mahalliy aholi talab va istaklarini inobatga olgan holda 2017 yilda boshlanib, 2020 yil mart oyida yakunlangan edi. Masjidning er maydoni 10 sotix bo'lib, bino milliy andozalar va zamonaviy talablar asosida keng va yorug' qilib qurilgan. Jome masjid sig'imi 1000 nafar namozxonga mo'ljallangan bo'lib, saxovatpesha insonlar ko'magi va hashar yo'li bilan bunyod etildi.

Ushbu jome masjidni mo'min-musulmonlarga muborak aylashini Haq taboraka va taolodan iltijo qilib so'raymiz.

O'zbekiston musulmonlari idorasi matbuot xizmati