Payg'ambarimiz sollallohu alayhi va sallam: “Zararberishvazararlanish (islomda) yo'q” dedilar (Imom Ibn Moja rivoyati). Shu bois har bir musulmon kishi zararlanishning oldini olish maqsadida badantarbiya bilan shug'ullanib, sog'lom turmush tarziga o'tishi lozim bo'ladi.

Sahobalardan Salama ibn Akva' roziyallohu anhu aytadilar: “Biz yo'lda yurib borardik. Ansoriylardan musobaqalarda hech engilmagan bir kishi: Madinagacha musobaqalashuvchi bormi? Kim musobaqa qila oladi?”, dedi. “Hurmatli kishining hurmati, sharaflining sharafini rioya qilmaysanmi?”, dedim. “Faqatgina Rasululloh sallollohu alayhi vasallamni”, dedi. “Yo Allohning rasuli, ota-onam sizga fido bo'lsin! Qo'yib bering, shu odam bilan musobaqalashay”, dedim. “Hohishing bo'lsa, mayli”, dedilar u zot. Madiniga undan avval etib bordim”. Ushbu rivoyatda badantarbiyaga, jismoniy musobaqalarga qiziqtirish va shu orqali sog'lom turmush tarziga chaqiriq bor.

 Mashhur tabib Abu Ali Ibn Sino: “Badantarbiya bilan muntazam shug'ullangan inson hech qanday dori-darmonga muhtoj bo'lmaydi”, degan.

Shu yil 30 oktyabr' kuni Yurtboshimiz “Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida”gi farmonni imzoladi. Bundan jismoniy tarbiya va ommaviy sport bilan muntazam shug'ullanish hamda sog'lom turmush tarzi bo'yicha hayotiy ko'nikmalarni shakllantirish orqali har bir fuqaroda kasallikka qarshi kuchli immun tizimi paydo bo'lishini ta'minlash, zararli odatlardan voz kechish, to'g'ri ovqatlanish tamoyillariga amal qilish, tiklash va reabilitatsiya ishlari hamda ommaviy jismoniy faollik tadbirlarini tizimli va samarali tashkil qilish, bu borada tegishli infratuzilma va boshqa zarur shart-sharoitlarni yaratish maqsad qilingan.

Pandemiya davrida ko'pchiligikning jismoniy salomatligi, sog'lom hayot darajamiz zaif ekanligi sezildi. Ayni davrda ushbu farmon kuchga kirgani muhim ahamiyat kasb etdi. Aziz yurtdoshlarimizni hozirda mamlakatimizda ommaviy tarzda o'tkazilayotgan yurish, yugurish, velosport mashg'ulotlarida faol ishtirok etishga chaqirib qolaman.

Alloh taolo yurtimizni tinch, xalqimizni hifzi himoyasida asrasin, o'zimizni isloh qilib, sog'lom turmush tarzini yo'lga qo'yishimizda kuch-quvvat ato etsin! 

Abdullaxon MIRZAYeV,

Denov tumanidagi
“Muhammadqul” jome masjidi imom-xatibi