Malayziya chegaralari 2021 yil 31 mart kunigacha yopilganiga qaramasdan, mamlakatimiz rahbariyati tomonidan yurtimizga sayyohlar oqimini yanada oshirish, O'zbekistonning ziyorat turizmi imkoniyatlarini keng targ'ib qilish bo'yicha belgilangan vazifalarni bajarish maqsadida diplomatik missiya jamoasi o'zbekistonlik va malayziyalik sheriklar bilan birgalikda mazkur sohadagi hamkorlikni rivojlantirish bo'yicha yangi hukumatlararo bitim tuzish ustida ish olib bormoqda.
Bu haqda “Dunyo” axborot agentligiga interv'yuda O'zbekistonning Malayziyadagi elchisi Ravshan Usmonov ma'lum qildi.
“Mazkur hujjat Malayziya masjidlarida juma namozlari chog'ida mamlakatimizning ma'naviy-ma'rifiy merosini keng targ'ib qilish, O'zbekiston turizm sanoati vakillari uchun vebinarlar tashkil etish, «muslim friendly» va «halal tourism» standartlarini joriy etish bo'yicha tajriba almashish, Malayziya islom turizmi markazi ekspertlarini jalb etgan holda malay tili o'quv kurslarini tashkil etish, shuningdek malayziyalik sheriklar bilan hamkorlikda O'zbekistonda “ziyorat turizmi” sohasida kadrlar malakasini oshirish maqsadida O'zbekiston-Malayziya markazini ochish kabi loyihalarni o'z ichiga oladi”, - aniqlik kiritdi elchi.

O'zbekiston musulmonlari idorasi matbuot xizmati