Abdulloh ibn Abbos roziyallohu anhumodan rivoyat qiladi: "Rasululloh sollallohu alayhi vasallam sut ichdilar, so'ngra, suv bilan og'izlarini chayqadilar. So'ngra: “Unda yog' bor”, dedilar" (Imom Termiziy rivoyati).

Sut A, Ye, K, S, D, V, RR kabi vitaminlar, mineral moddalar va aminokislotalarga juda boy. Sut yog'lari hayvon yog'lari orasida eng to'laqonlisi hisoblanadi.

Sutni har kuni iste'mol qilish yurak-qon tomir tizimini mustahkamlaydi va yurak xuruji hamda insul't xavfini 37 foizga kamaytiradi.

Shuningdek sut miya va asab tizimi uchun foydali, suyaklarni mustahkamlaydi, immunitetni oshirib, infektsiyalardan himoyalaydi, oshqozon kasalliklarida va arterial qon bosimini pasaytirishga yordam beradi.

Qarang, bu juda ham oson, ammo savobi ulkan, gunohlarni ketkazuvchi, jannatga etkazuvchi bo'lgan amaldir. Lekin dangasaligimiz, beparvoligimiz oqibatida bunga e'tibor bermaymiz, amal qilmaymiz. Ko'pchiligimiz hatto bilmaymiz ham. Avval bilmasak, endi bilib oldik. Endi bilganimizga amal qilaylik va boshqalarga ham etkazaylik.

Zero, Rasululloh sollallohu alayhi vasallamning sunnatlarini yoyilishiga xizmat qilish u zotga bo'lgan muhabbat va ehtiromning yuksak namunasi hisoblanadi. U zot sollallohu alayhi vasallam sunnatlarini aniqlik bilan etkazganlarning haqqiga: “Mening gapimni eshitib, yodlab, singdirib, so'ngra etkazgan odamni Alloh ne'matlantirsin”, deb duo qilganlar (Imom Termiziy rivoyati).

Alloh taolo barchamizga har bir ishda Rasululloh sollallohu alayhi vasallamning sunnatlariga amal qilishimizga tavfiq ato etsin, omiyn!

Allohumma solli va sallim 'ala Muhammadin va 'ala oli Muhammad

Davron NURMUHAMMAD