Shu yilning 30 oktyabr' kuni O'zbekiston musulmonlari idorasi raisi, muftiy Shayx Nuriddin Holiqnazar hazratlari Jizzax viloyatiga tashrif buyurdilar. Jizzax viloyatida faoliyat ko'rsatib kelayotgan imom-xatiblarning kengaytirilgan yig'ilishi bo'lib o'tdi. Majlis Qur'oni karim tilovati va xayrli duolar bilan boshlandi.

Muftiy hazratlari bugun har bir din peshvosi din va millat uchun astoydil xizmat qilishi, amalga oshirilayotgan ijobiy o'zgarishlar, mo'min-musulmonlar farovonligi yo'lida hayotga tatbiq etilayotgan chora-tadbirlarda faol ishtirok etish, ayniqsa, diniy-ma'rifiy sohadagi yangilanishlar imom-domlalarimiz zimmasiga katta mas'uliyat yuklashi haqida so'z yuritdilar.

Shuningdek, Muftiy hazratlari tomonlaridan Jizzax viloyatida oxirgi yillarda ijobiy ishlar qilinganligi, ammo tizimda hali amalga oshirilishi lozim bo'lgan talay ishlar mavjudligi alohida ta'kidlandi. Ayniqsa, imom-xatiblar muntazam o'z ustida ishlashi, mo'min-musulmonlar ehtiyojlarini ta'minlash yo'lida sa'y-harakat qilishi va ish faoliyatda belgilangan tartib-qoidalarga amal qilishi zarurligini qayd etish barobarida muhim tavsiya va topshiriqlar berildi.

Yig'ilishda Jizzax viloyati bosh imom-xatibi Mehmonali domla Jabborov tomonidan notiqlar tomonidan aytilgan har bir masala yuzasidan barcha imom-xatiblar to'g'ri xulosa chiqarishi, bundan buyon ular hamfikr va hamjihatlikda dinimiz ravnaqi va xalqimiz farovonligi yo'lida astoydil xizmat qilishlari bildirildi.

O'zbekiston musulmonlari idorasi
Matbuot xizmati