Onamiz Oisha roziyallohu anho aytadilar: “Rasululloh sollallohu alayhi vasallam yotoqlariga yotganlarida, ikki kaftlarini birlashtirib, ularga dam urib – “Ixlos”, “Falaq”, “Nas” suralarini qiroat qilardilar. So'ngra ikki kaftlarini badanlarining qo'llari etgan joylariga surtardilar. Boshlaridan boshlab, so'ngra yuzlari va ketma-ket boshqa a'zolariga. Bu ishni uch marta qilardilar” (Imom Buxoriy rivoyati).

Ba'zi odamlar kechasi tinch yotish, bezovta bo'lmaslik uchun turli dorilarni, tinchlantiruvchi vositalarni qabul qilishadi. Ammo bu doim ham kutilgan natijani bermaydi. Tinch dam olish uchun turli yomon xayollarni miyadan chiqarib tashlash, shayton vasvasasini ketkazish kerak. Buning uchun nabaviy hadisga amal qilinadi. Shunda har xil dori-darmonlarga hojat qolmaydi. Zero, eng zo'r davo Qur'on va hadisdir.

Demak, kim kechasi uxlashdan oldin Ixlos, Falaq, Nos suralari bilan birga Fotiha, Isro, Sajda, Taborak, Duxon, Kofirun, suralarini (shuningdek, Oyatul kursiyni) o'qisa, tuni osuda o'tadi, uzuq-buzuq xayollar uni bezovta qilmaydi, yomon tush ko'rmaydi. Albatta, Alloh taolo Qur'onga oshno bandaga ikki dunyoda omonlik beradi.

Qarang, bu juda ham oson, ammo savobi ulkan, gunohlarni ketkazuvchi, jannatga etkazuvchi bo'lgan amaldir. Lekin dangasaligimiz, beparvoligimiz oqibatida bunga e'tibor bermaymiz, amal qilmaymiz. Ko'pchiligimiz hatto bilmaymiz ham. Avval bilmasak, endi bilib oldik. Endi bilganimizga amal qilaylik va boshqalarga ham etkazaylik.

Zero, Rasululloh sollallohu alayhi vasallamning sunnatlarini yoyilishiga xizmat qilish u zotga bo'lgan muhabbat va ehtiromning yuksak namunasi hisoblanadi. U zot sollallohu alayhi vasallam sunnatlarini aniqlik bilan etkazganlarning haqqiga: “Mening gapimni eshitib, yodlab, singdirib, so'ngra etkazgan odamni Alloh ne'matlantirsin”, deb duo qilganlar (Imom Termiziy rivoyati).

Alloh taolo barchamizga har bir ishda Rasululloh sollallohu alayhi vasallamning sunnatlariga amal qilishimizga tavfiq ato etsin, omiyn!

Allohumma solli va sallim 'ala Muhammadin va 'ala oli Muhammad

Davron NURMUHAMMAD