Joriy yil 19 noyabr' kuni “Vaqf” xayriya jamoat fondining Vasiylik kengashi yig'ilishi bo'lib o'tdi. Unda faoliyatni jadallashtirish, ijtimoiy loyihalarni amalga oshirish, innovatsion uslublardan unumli foydalanish va moddiy ko'mak berish imkoniyatini yanada kengaytirish muhokama qilindi. Shuningdek, kengashda ish samaradorligini oshirish bo'yicha ishtirokchilar fikr-mulohazalari ham tinglandi.
So'zga chiqqan notiqlar vaqf mulkchiligini shakllantirish, kam ta'minlangan fuqarolarga moddiy yordamlar ko'rsatish ko'lamini kengaytirish, masjid va madrasalarni obod etish, bu boradagi ishlarni jonlantirish lozimligini ta'kidladilar.
Yig'ilishda tashkiliy masala ko'rildi. Avval xabar berganimizdek, Fond boshqaruv kengashi raisi Iskandar Halilov boshqa ishga o'tgani munosabati bilan Toshkent shahri Shayxontohur tumani “Shayx Zayniddin” jome masjidi imom-xatibi Abdurahmonov Yahyo boshqaruv kengashi raisi etib tayinlandi. Shuningdek, Fond raisi o'rinbosarlari Zohidjon To'rayev va Ikromjon Ahmedov ham boshqa ishga o'tganlari ma'lum qilindi.
Bugungi kunda rahbarlarning har jihatdan namuna, tashabbuskor va fidoyi bo'lishi davr talabi ekanini ham majlisda alohida qayd etildi. O'z navbatida, belgilangan vazifalar va istiqboldagi rejalarni amalga oshirishda jonkuyarlik, jamoa bo'lib ishlash va zamon talablariga monand tezkorlik bilan ish tutishning o'rni yuqori ekaniga katta e'tibor qaratildi.
Fondning yangi rahbariga faoliyatni zamon talablari darajasida olib borish, ish unumdorligini oshirish, ijtimoiy loyihalar, xayriya ishlari to'g'risida OAV va internet tarmog'i orqali xalqimizni xabardor etish, mablag'lar aylanishining shaffofligini ta'minlash, jamoatchilik bilan doimiy aloqada bo'lish kabilar yuzasidan muhim tavsiyalar berildi.

“Vaqf” xayriya jamoat fondi Matbuot xizmati