Shu kunlarda O'zbekiston musulmonlari idorasi tasarrufidagi barcha masjidlar imom-xatib va imom noiblari bilimlari, kasb-mahoratlari hamda ish faoliyatlari natijalari baholanmoqda.
Ta'kidlash kerakki, ushbu jarayonda imom-xatib va imom noiblarining professional malakasi, ishchanlik fazilati, kasbiy tayyorgarlik darajasi, vazifaga munosibliklari hamda zimmalariga yuklatilgan vazifalarga mas'uliyat bilan yondashish xislatlariga alohida e'tibor qaratilyapti.
Shuning bilan birga imomlarning notiqlik iqtidori, qiroati, ilmiy-ijodiy, ma'naviy-ma'rifiy faoliyati, chet tillarini bilish darajasi hamda axborot-kommunikatsiya texnologiyalarini qay darajada o'zlashtirganliklari test sinovlari va suhbatlar asosida namoyon bo'lmoqda.
Ushbu sinovlardan muvaffaqiyatli o'tib diniy-ma'rifiy, mehnati samaradorligi va kasbiy bilimlarini oshirgan imom-xatib va imom noiblarga oliy, birinchi va ikkinchi darajali malaka toifalari taqdim etiladi. Bu esa ularning kelgusidagi faoliyatida yanada yuqori natijalarga erishishida muhim omil bo'lib xizmat qiladi.
Ayni paytda O'zbekiston musulmonlari idorasi raisi o'rinbosarlari, mas'ul xodimlari, diniy-ta'lim muassasalari pedagog-o'qituvchilari hamda hamkor tashkilot vakillaridan iborat baholash komissiyasi a'zolari guruhlarga bo'lingan holda Andijon, Namangan, Farg'ona va Jizzax viloyatlarida faoliyat olib bormoqda. O'z navbatida mazkur jarayonga boshqa viloyatlarda ham qizg'in tayyorgarlik ishlari ko'rilyapti. 

O'zbekiston musulmonlari idorasi Matbuot xizmati