Oilaning muqaddas ekanligi shu dargohda inson nasl-nasabini davomchilari dunyoga kelishidir. Oila so'zi “Ayol” so'zidan ishtiqoq qilingan bo'lib, oila deganda ayol tushuniladi. Demak, ayol muqaddas hisoblanar ekan.

Muqaddas dinimizda ayollarning alohida tutgan o'rni bor. Jamiyatda unga o'z haq-huquqlarini tiklab berdi. Islomdan oldin nafaqat johiliyat arablarida, balki butun er yuzida ayol zoti xo'rlanayotgan edi. Bunga tarix guvoh. Ayol kishini inson sifatida tan olishmas edi. Johiliyat arablari hatto o'zlarining qizlaridan ham nafratlanishgan. Bu haqda Alloh taolo bunday xabar bergan:

“Qaysi birlariga qiz (ko'rgani haqida) xushxabar berilsa, g'azabi kelib, yuzlari qorayib ketadi. U (qiz)ni kamsitgan holda olib qolish yoki (tiriklay) tuproqqa qorish (to'g'risida o'y surib), o'ziga xushxabar berilgan narsaning «yomon»ligidan (oriyat qilib) odamlardan yashirinib oladi. Ogoh bo'lingizki, ularning bu hukmlari juda yomondir” (“Nahl” surasi, 58, 59-oyatlar).

Ming afsuslar bo'lsinki, bugungi zamonamizda ham, jaholat qoldiqlaridan ba'zi holatlarni ko'rib, nahotki shunchalikka borishadimi deb istig'for aytishdan nariga o'tmaysiz.

Samarqand shahrida yuz bergan voqea butun O'zbekiston xalqini tinchini buzdi. Ijtimoiy tarmoqlarda tarqalgan ayolning eri tomonidan shafqatsizlarcha kaltaklanishi ayolning oiladagi o'rnini bilmaslikdan boshqa narsa emas. Kishini yaxshi yoki yomon ekanini bilish uchun dinimizda bir qoida bor. Payg'ambarimiz muborak hadislarida: “Sizlarning yaxshilaringiz o'z ahliga yaxshi munosabatda bo'lganingizdir”, deb marhamat qiladilar. Oila rahbari erkakning zimmasiga ahli-ayolini moddiy va ma'naviy tomonlardan o'z himoyasiga olishi vazifa qilinib belgilangan. Shunday ekan er kishilar bu masalada e'tiborli bo'lishlari juda zarur.

Ijtmoiy tarmoqlarda tarqalgan, qalbni og'ritadigan mazkur holatni sodir etgan erkak kishining hatti-harakati musulmon kishining qiladigan ishi emasligini aytib o'tamiz. Tezroq tavbaga shoshilishini maslahat beramiz. Aks holda Allohning g'azabi qattiqdir.

Zayniddin EShONQULOV,

Samarqand viloyat bosh imom-xatibi