Allohga shukrlar bo'lsinki, bugun yurtimizning ko'pgina maskanlarida mo'min musulmonlar uchun ko'rkam va zamonaviy, barcha sharoitlarga ega bo'lgan masjidlar qurilib, foydalanishga topshirilmoqda.

Kecha 11 sentyabr' kuni Toshkent viloyati Toshkent tumanidagi ulug' sahobiy nomi bilan atalgan «Hazrati Bilol» jome masjidi ham qaytadan qurilib foydalanishga topshirildi. Bugun ushbu masjidda mo'min musulmonlarimiz ilk juma namozini jamoat bilan ado qilishdi.

Ushbu masjidning qurilish ishlari 2018 yilning yoz faslida boshlangan bo'lib, hozirda yangi qurilgan masjid 1050 nafar namozxonni o'z bag'riga sig'dira oladi.

Bundan tashqari «Hazrati Bilol» masjidida zamonaviy tahoratxona qurib bitkazilgan. Shuningdek, masjid hovlisining tom qismi ham yopilgan. Bu esa musulmonlarning yog'ingarchilik paytida ham o'z ibodatlarini to'la to'kis ado qilishlari uchun qulay sharoitlardan biridir. Hozirda masjid kutubxonasi, qorovulxona, imom noib hamda imom xatib xonalarining qurilish jarayoni davom etmoqda.

Avvallari ushbu masjid mo'min musulmonlarning ibodat qilishi uchun yaroqsiz holatga kelib qolgan edi, deydi masjid imom xatibi Ahmadjon domla Shamsixo'jayev. — Masjid asosan hashar yo'li bilan qaytadan qurildi. Bugun zamon talablariga to'la javob beradigan masjid barpo etildi. Masjidimiz qurilishida ko'makdosh bo'lgan barcha yurtdoshlarimizdan Alloh taolo rozi bo'lsin! Haq taolo ikki dunyo saodatidan bahramand qilsin!

Toshkent viloyati vakilligi matbuot xizmati