Kecha Samarqand viloyati bosh imom-xatibi Zayniddin domla Eshonqulov faxriy imomlar – Mahmudjon domla Ibodullayev va Habibulloh domla Boyqobilovlar bilan birga Tayloq tumanidagi “Madaniyat” jome masjidini ko'zdan kechirdilar.

Zayniddin domla Eshonqulov jomedagi bunyodkorlik ishlari bilan yaqindan tanishish chog'ida masjid binosi go'zal naqqoshlik namunasi asosida bezatilgani, namozxonlar uchun tayyorlangan sharoitlar ko'ngilni xushnud qilishini ta'kidladilar. Shuningdek, mo'min-musulmon xalqimizga yanada qulayliklar qilish, pandemiya qoidalariga to'liq rioya etish yuzasidan tavsiya va ko'rsatmalar berdilar.

Shundan so'ng jamoat bilan peshin namozi ado etildi. Tashrif so'ngida faxriy imom Mahmudjon domla Ibodullayev ushbu masjid qiyomatga qadar mo'min-musulmonlarga xizmat qilishi va uning qurilishida jonbozlik ko'rsatayotgan saxovatpesha insonlarga yaxshiliklar so'rab duoi xayrlar qilindi.

Ma'lumot uchun, shu yil boshida “Madaniyat” jome masjidi yangi binosi milliy va zamonaviy me'morchilik an'analariga to'la mos holda qayta qurilib namozxonlar ixtiyoriga topshirilgan edi. Hozir masjid tahoratxonasi qayta qurilmoqda.

O'zbekiston musulmonlari idorasi Matbuot xizmati