Toshkent viloyati mamlakatimizning o'ziga xos tabiati, keng imkoniyatiga ega hududlaridan biri bo'lib, poytaxtdan boshqa viloyatlarga chiqish yo'lida, inchunun, ziyorat turizmi dahasining boshlang'ich nuqtasida joylashganligi bilan alohida ahamiyatga ega. Shu bois viloyatdan o'tuvchi yo'lovchilar, ziyoratchilarga har taraflama qulaylik yaratish, namozxonlar uchun yuqori yuqori shart-sharoitlarni ta'minlash maqsadida ushbu hududda ko'plab xayrli islohotlar amalga oshirilmoqda.
Yuqori Chirchiq tumanida joylashgan “Iyk ota” ziyoratgohi ta'mirdan chiqarilib, obod maskanga aylantirildi. Quvonarlisi, ziyoratgoh tarkibida namozxona barpo etilib, tashrif buyuruvchilar uchun ibodatlarini o'z vaqtida ado etib olishlariga imkoniyat yaratildi.
Hoki poylari shu joyda joylashgan, mahalliy xalq orasida “Iyk ota” nomi bilan mashhur bu zotning tahminan XVI-XVII asrlarda yashab o'tganlari, yassaviya tariqatining namoyondalaridan biri bo'lgan mo''tabar zot ekanliklari aytiladi.
Kuni kecha, 1 sentyabr kuni yangi ta'mirdan chiqarilgan ziyoratgohga tashrif buyurgan mutasaddilar bu joy chinakam ma'rifat maskaniga aylanganini e'tirof etdilar. Jumladan, majmuada erkaklar va ayollar uchun alohida namozxona, kutubxona, hovlilarning keng va shinamligi kishining dilini yayratadi. Hullas, ziyoratga keluvchi yurtdoshlarimiz va xorijiy mehmonlar uchun maqbara zamonaviy ziyoratgoh sayyohlik maskaniga aylantirilgan.
Ma'lumki, bugungi kunda Olmaliq shahri tegishli dastur asosida kompleks rivojlantirilmoqda. Bu joyda barpo etilajak ko'plab infratuzilma ob'ektlari qatorida yangi masjid qurilishi ham ko'zda tutilgan. Bu “Hilol” nomli masjid bo'lib, yaqinda Adliya boshqarmasida davlat ro'yxatidan o'tkazildi.
Shaharda chindan ham masjidga ehtiyoj mavjud edi. Shu kunga qadar 150 mingdan ziyod aholi istiqomat qiladigan Olmaliqda birgina masjid faoliyat ko'rsatayotgan edi. Shuning uchun «Evalak» mahallasi, Faxriylar ko'chasida yangi barpo bo'layotgan masjid loyihasi ancha yirik bo'lib, u uch gektar maydonda joylashadi.
Shundoqqina shaharga kirib kelishda o'zining 60 metrlik to'rtta minorasi-yu, sharqona gumbazlari bilan muazzam qiyofa kasb etuvchi jome har qanday yo'lovchi e'tiborini o'ziga jalb etishi shubhasiz. Ibodat uyi 6 mingdan ortiq namozxonni o'z bag'riga sig'dirish imkoniyatiga ega bo'lishi bilan sig'imi jihatidan Toshkent viloyatidagi eng katta masjid bo'lishi kutilmoqda. Asosiy xonaqoh 50x50 metr hajmda bir qavatdan iborat bo'ladi. Bu joyda mahalliy aholi va yo'lovchilar uchun ko'plab qulayliklar yaratiladi. Jumladan, bir gektar maydondadagi avtoturargoh, ayollar uchun alohida namozxona va tahoratxona, yig'ilishlar zali va boshqa yordamchi xonalar o'rin oladi.
Yaqindagina muborak Ashuro kunlarida ezgu niyat va xayrli duolar bilan ushbu masjidning tamal toshi qo'yildi. 2021 yilning yakuniga qadar bitkazilishi rejalashtirilayotgan baytullohning qurilish ishlarida xizmat ko'rsatayotgan barcha fidoiy insonlarga Alloh taolodan madad va muvaffaqiyatlar tilab qolamiz.
* * *
Sirdaryo viloyatining Mirzaobod tumanida “Oltin O'rda” nomli masjid bor. Masjid 1993 yilda Sirdaryodagi masjidlarda ko'p yillar imomlik vazifasida faoliyat yuritgan, din xizmatidagi mo''tabar inson Yusufxon domla Mubashshirxonov boshchiligida xalq hashari yo'li bilan qurilgan. Masjid nomi hozirda qishloq nomiga monand “Oltin O'rda” deya yuritilsada, dastlab “Said Mubashshirxon to'ra” nomi bilan ham atalgan.
O'tgan davr mobaynida masjid binosining eskirganligi hamda noqulay ob-havo sharoitlarida namozxonlarga qiyinchiliklar tug'ilayotgani sababli, tegishli ruxsat asosida bu yili yangidan keng sig'im va zamonaviy sharoitlar asosida bunyod bo'lmoqda. Jome avvalgi holatda 250-270 namozxonni sig'dirgan bo'lsa, yangi loyihaga ko'ra, xonaqoh va qo'shimcha ayvonlar 700 dan ziyod namozxonga mo'ljallangan. Hozirda qurilish ishlarining 75% yakunlanib, ichki bezak ishlari davom ettirilmoqda. Joriy yilning noyabr oyida namozxonlar ixtiyoriga topshirilishi rejalashtirilgan.
Ta'kidlash lozimki, bugungi kunda bugungi kunda yurtimiz bo'yicha jami 181 ta masjid yangi loyihalar asosida qaytadan qurilmoqda. Masjidlarni ta'mirlab, barpo etishdek savobi ulug', xayrli ishlarda tashabbus ko'rsatayotgan, hissalari qo'shilayotgan barcha mutasaddilar, qo'li gul me'mor ustalar, ko'ngilli xizmatchilar, hasharchilarga tahsinlar aytib, Alloh taolodan kuch-quvvat tilaymiz. Masjidlar tez orada qad ko'tarib, kelajak avlod uchun ko'p yillar hidoyat mayog'i bo'lib xizmat qilishini Yaratgandan Parvardigor nasib etsin.
O'zbekiston musulmonlari idorasi Masjidlar bo'limi
O‘zbekiston Respublikasi Prezidenti
Shavkat Mirziyoyev Janobi Oliylariga
Bismillahir Rohmanir Rohim
Assalomu alaykum va rahmatullohi va barakotuh
Muhtaram Prezident Janobi Oliylari!
Alloh taologa behisob shukrki, Sizning bevosita tashabbuslaringiz va sa’y-harakatlaringiz bilan haj amallarini yuqori saviyada tashkil etishga muvaffaq bo‘lmoqdamiz.
Bunday e’tibor va ehtiromni biz hojilar chin yurakdan his etib, yaratilgan barcha qulayliklar uchun Sizga chuqur minnatdorlik izhor etamiz.
Hurmatli Prezident Sizni va Siz orqali yurtdoshlarimizni haj ibodatini ado etayotgan hamyurtlarimiz nomidan musulmon ummati uchun eng ulug‘ bayram – Qurbon hayiti bilan samimiy muborakbod etamiz.
Zero, Payg‘ambarimiz (sollallohu alayhi vasallam) “Duolarning eng yaxshisi arafa kuni qilingan duodir”, deb xushxabar berganlar.
Alloh taoloning bayti joylashgan muqaddas zaminda – Mino, Arafot kabi muborak manzillarda ulug‘ amallarni ixlos ila bajarmoqdamiz.
Sizni vaqt ajratib, muborak haj ziyorati uchun yaratilgan sharoitlar va salomatligimiz haqida so‘raganingiz hamda har kuni holimizdan xabardor bo‘lib turganingiz ibodat bilan yurgan biz hojilarni cheksiz darajada mamnun etdi.
Bunday e’tibor va ehtiromni Saudiya Arabistonining mutasaddilari ham yuqori baholab, Siz Janobi Oliylariga hurmat va duolarini izhor etmoqdalar.
Muborak maskanlarda har bir ziyoratchi Sizning g‘amxo‘rligingizni yurakdan his qilib, ko‘zlarida yosh bilan duolar qilayotganini alohida aytib o‘tmoqchiman.
Sizga aytadigan yana bir xabarimiz, Saudiya Arabistonida bo‘lib turgan yurtimizning diniy soha vakillari hamda ziyoratchilari tomonidan mavsum davomida Qur’oni karim 10 ming marotaba xatm qilinib, yurtimizga tinchlik, xalqimizga farovonlik tilab duolar qilindi.
Hurmatli Prezident, Siz yaratib bergan imkoniyatlardan ruhlanib, o‘zbekistonlik hojilar yurtga qaytganimizdan keyin “Yangi O‘zbekistonning tinchlik va ma’naviyat targ‘ibotchilari” degan ezgu tashabbusni bir ovozdan ilgari surib, Uchinchi renessans yaratuvchilarini tarbiyalashda Sizga ko‘makchi bo‘lmoqchimiz.
Siz boshchiligingizda yurtimizda tinchlikni mustahkamlash, xalqimizning ma’naviyatni yuksaltirish, ayniqsa yoshlarning sifatli ta’lim olishi, kasb-hunar egallashi, kerak bo‘lsa dunyoni egallashi kabi masalalar eng ustuvor vazifaga aylandi.
Shunday ekan, biz hojilar yurtimizga qaytgach, quyidagi ishlarni amalga oshirmoqchimiz:
– ona-Vatanimiz taraqqiyotiga xolis xizmat qilish, mahallalarda tinchlik va birdamlikni mustahkamlash, aholi orasida tinchlik-osoyishtalikni qadriga yetish, xalqimizni ma’nan yuksaltirish, jamiyatdagi islohotlarga daxldorlik hissini oshirish kabilarga targ‘ib etish;
– kitobxonlik madaniyatini yuksaltirish, ilmni qadrlash va ilm-ma’rifatga homiylikda namuna bo‘lish;
– to‘ylar, oilaviy tadbirlar va marosimlarda me’yoriylikka amal qilgan holda kamxarj va ixcham o‘tkazishda bosh-qosh bo‘lish;
– kiyinishda va muomalada oddiylik va kamtarinlikka amal qilish, dabdababozlik, isrofgarchilik, maishatbozlik kabi illatlardan yiroq bo‘lishni targ‘ib qilish;
– yoshlarni muvaffaqiyatlarga faqat o‘qib-o‘rganib, ilm bilan erishish mumkinligini o‘rgatish;
– ustozlar, o‘qituvchi va murabbiylarga doimo ehtirom ko‘rsatish, ularni moddiy qo‘llab-quvvatlash ishlariga ko‘mak berish;
– mahallalardagi notinch oilalar, shu jumladan tarbiyasida muammosi bor yoshlar o‘rtasida tushuntirish ishlarini olib borish;
– hududlardagi maktablarning ta’mirga muhtoj qismini joriy ta’mirlash ishlariga ko‘maklashish;
– xayriya, mehr-muruvvat va yordam ko‘rsatish ishlarini ko‘paytirish.
Barcha hojilarimiz yurtimizga qaytgandan so‘ng ushbu tashabbuslarni qat’iy amalga oshirishga va’da beramiz.
Zero, jonajon Vatanimiz kelajagi, xalqimiz farovonligi va yurtimiz shonu shuhrati Siz aytganingizdek yoshlarimiz qo‘lidadir. Ular ertaga O‘zbekistonni yanada kuchli, yuksak taraqqiy etgan davlatga aylantirish uchun o‘zlarining bor bilimi, iqtidori va kuch-g‘ayratini safarbar qilsa, ko‘zlagan barcha ezgu maqsadlarimizga, albatta erishamiz.
Yusuf Xos Hojib bobomiz aytganlaridek:
“Zakovat bor joyda ulug‘lik bo‘ladi,
Bilim bor joyda buyuklik bo‘ladi”.
Hurmatli Prezident Janobi Oliylari!
Biz, 15 ming hoji duolar ijobat bo‘ladigan Arafotda turib, Alloh taolodan Sizga mustahkam sog‘lik, uzoq umr va ulkan muvaffaqiyatlar tilab, olib borayotgan barcha ishlaringizda madadkor bo‘lishini so‘rab iltijolar qilyapmiz.
Alloh taolo butun dunyo mo‘min-musulmonlariga Qurbon hayitini muborak aylasin, tinchlik-xotirjamlik ato etsin, ibodatlarimizni O‘z dargohida husni qabul aylasin, ona Vatanimizni obod, xalqimiz hayotini yanada farovon qilsin!
Qurbon hayiti muborak bo‘lsin!
Hurmat va kamoli ehtirom ila,
O‘zbekiston hojilari,
Makka shahri Arafot vodiysi,
2025 yil 5 iyun