Halqaro bolalarni himoya qilish kuni — bu jahon jamoatchiligi fikrini bolalar huquqiga qaratish urush xavfidan himoyalash, bolalar salomatligini saqlash, ularga demokratik asosda tarbiya va ta'lim berish uchun kurashishga jalb qilish kunidir.
O'tgan asrning 50-yillaridan beri har yili yoz oyining birinchi sanasi xalqaro bolalarni himoya qilish kuni sifatida er kurrasi bo'ylab turli shiorlar ostida keng nishonlab kelinadi.
Biroq bunday ezgu kunning tashkil etilganiga yarim asrdan ko'p vaqt o'tgan bo'lsa-da, ayrim qit'alarda millionlab bolalar ochlik, turli kasalliklar, yashash va ta'lim olish sharoitlari yo'qligidan azob chekayotganligi, afsuski ko'z yumib bo'lmas haqiqat.
Lekin, bu bayram ona yurtimizda o'ziga xos tarzda nishonlanadi. Zero, o'zbek millatiga xos nodir ma'naviy qadriyatlar sarasidan bo'lgan bolajonlik, oilaparvarlik, mehr-muruv-vatlik fazilatlari alohida ajralib turadi.
Bunga birgina misolni keltirish bilan barchani e'tiborini qaratish mumkin. ikkinchi jahon urushi paytida ota-onasidan etim qolgan, uy-joyi vayron bo'lgan, yaqinlaridan ajralgan yuz minglab etimlar O'zbekiston bag'rida mehr-shafqat ko'rdilar.
Dono xalqimiz o'zining bir burda nonini ana shu bolalar bilan beminnat baham ko'rdi. Ularni ta'lim-tarbiya bilan parvarishlab, voyaga etkazib jamiyat a'zolariga taqdim etdilar.
Yosh avlod kamoloti, ta'lim-tarbiyasi yo'lida hukumatimiz, shaxsan Prezidentimiz tomonidan qabul qilinayotgan Farmon va qarorlar ijrosi yo'lida ta'limning birinchi bosqichi bo'lgan maktabgacha ta'lim tashkilotlariga alohida e'tibor berilmoqda. O'rta va oliy ta'lim tizimida ham islohotlar amalga oshirilib, o'qitish uslublari jahon talabiga moslashtirilmoqda.
Muqaddas dinimizda ham bu borada talaygina ko'rsatmalar berilgan.
Rasululloh sollallohu alayhi vasallam bir hadisi sharifda bolalar va oilalarni yaxshilik qilishga o'rgatish hamda ularda chiroyli xulqni kamol toptirish zarurligi ta'lim berilgan.
U zot alayhissalom: “Bolalaringizga va oilala-ringizga yaxshilik qilishni o'rgatingiz va ularni odobli etib tarbiyalangiz”, – deganlar.
Shukrki, yurtimizda e'tibordan chetda qolgan bolaning o'zi yo'q. Barchaning ko'nglida bolalarga qarata mehr-muruvvat mujassam deb ayta olamiz.
Umrimizning bahor fasli bo'lgan yoshlik har birimizning qalbimizda quvonchli kunlari saqlanib qolgandek, bugungi bolalarning bayram kunlari ham quvonchlarga to'lsin.
Zero, bola kulsa, olam kuladi. Olam kulsa, u quvonchga to'ladi, bizlarning ona yurtimiz yanada gullab yashnaydi. Bolalarning beg'ubor qalblari doimiy yayrab-yashnayversin.
Anvarxon AKRAMOV,
Namangan shahar “Mulla Bozor Oxund” jome
masjidi imom-noibi
Muhtaram vatandoshlar!
Siz, azizlarni, barcha mo‘min-musulmon yurtdoshlarimizni, butun xalqimizni ulug‘ va mo‘tabar ayyom – Qurbon hayiti bilan chin qalbimdan samimiy muborakbod etib, o‘zimning yuksak hurmatim va ezgu tilaklarimni bildirishdan g‘oyat mamnunman.
Jamiki islom ummati uchun qadrli bo‘lgan ushbu shukuhli bayram – Iyd al-Adhoni el-yurtimiz bilan birgalikda tinch va osoyishta muhitda kutib olayotganimiz uchun, avvalo, mehribon va qudratli Alloh taologa behisob shukronalar aytamiz.
Hech shubhasiz, keyingi yillarda Yangi O‘zbekistonda ijtimoiy, xalqchil davlat barpo etish, uning ma’naviy asoslarini mustahkamlash va ta’sirchanligini oshirishda muqaddas islom dini, uning asosiy bayramlaridan biri bo‘lgan Qurbon hayiti ham muhim rol o‘ynamoqda.
Ayniqsa, bu bayramning insonparvarlik, ahillik, saxovat va olijanoblik kabi fazilatlari yurtimizda “Inson qadri uchun, inson baxti uchun” degan ezgu g‘oya asosida amalga oshirilayotgan keng ko‘lamli islohotlarga uyg‘un va hamohang bo‘lib, aholining ehtiyojmand qatlamlarini qo‘llab-quvvatlash, keksalar, yoshlar va xotin-qizlar haqida alohida g‘amxo‘rlik ko‘rsatish, kambag‘allikni qisqartirishga qaratilgan dasturlarimiz samarasini oshirishga xizmat qilayotganini alohida ta’kidlash o‘rinlidir.
Aziz do‘stlar!
Bugungi kunda mamlakatimizda turli millatlar va diniy konfessiyalar o‘rtasidagi hamjihatlikni mustahkamlash, vijdon erkinligini ta’minlash, diniy-ma’rifiy merosimizni asrab-avaylash, yosh avlodni milliy va umumbashariy qadriyatlar ruhida tarbiyalash bo‘yicha ulkan ishlar amalga oshirilmoqda.
Bu haqda so‘z yuritganda, islom dinining ezgu tamoyillarini chuqur o‘rganish, buyuk tariximiz va madaniyatimiz durdonalarini, mashhur allomalarimizning boy merosini to‘plash va keng targ‘ib etishga alohida e’tibor qaratilayotganini ta’kidlash lozim. Jumladan, ko‘hna Sharq mo‘jizasi – Samarqand shahri 2025 yilda islom madaniyati poytaxti, deb e’lon qilindi, ulug‘ vatandoshimiz Imom Moturidiyning 1155 yillik tavallud sanasi yurtimiz bo‘ylab keng nishonlanmoqda, Imom Buxoriy, Imom Moturidiy va Imom Termiziy xalqaro ilmiy-tadqiqot markazlari qatoriga, shu yil Buxoro shahrida o‘z faoliyatini boshlaydigan Bahouddin Naqshband ilmiy-tadqiqot markazi ham qo‘shildi.
Poytaxtimiz Toshkent shahrida bunyod etilayotgan Islom sivilizatsiyasi markazi ilmiy-ma’naviy yo‘nalishdagi ulkan va noyob loyiha sifatida el-yurtimiz va xalqaro jamoatchilikda katta qiziqish uyg‘otmoqda. Bu muazzam maskan ko‘p ming yillik qadimiy tariximiz, boy va betakror milliy madaniyatimizning yorqin timsoli sifatida Yangi O‘zbekiston hayotidagi g‘oyat muhim voqeaga aylanadi, deb ishonaman.
Hurmatli yurtdoshlar!
Shu saodatli kunlarda 15 ming nafar vatandoshimiz muqaddas haj ziyoratini ado etmoqda. Ezgu duo va niyatlar ijobat bo‘ladigan mana shunday munavvar lahzalarda ularni ham Qurbon hayiti bilan samimiy qutlab, Yaratgandan yurtimizga sog‘-omon qaytib kelishlarini so‘raymiz.
Umid qilamizki, muhtaram hojilarimiz jamiyatimizda birdamlik, oila va mahallalarimizda mehr-oqibat muhitini yanada mustahkamlash, yoshlarimiz tarbiyasini kuchaytirish, ularni ilm-ma’rifatga, zamonaviy kasb-hunarlarni egallashga, Vatan himoyachisi bo‘lishga targ‘ib etish, muhtoj insonlarga ko‘mak berishda alohida ibrat va namuna ko‘rsatadilar.
Qalblarimiz quvonchga to‘lgan ushbu fayzli kunlarda xorijiy davlatlarda bo‘lib turgan vatandoshlarimizni ham bugungi ulug‘ ayyom bilan chin dildan qutlab, ularga sog‘lik-omonlik, baxt va omad tilaymiz.
Jahonning uzoq-yaqin o‘lkalaridagi musulmon ummatini ham qizg‘in tabriklab, ularning xalqlari va mamlakatlariga tinchlik, ravnaq va farovonlik tilab qolamiz.
Aziz va muhtaram vatandoshlar!
Hozirgi kunda dunyo naqadar murakkab va tahlikali bo‘lib borayotganini barchamiz ko‘rib turibmiz. Bunday keskin sharoitda yurtimizda tinchlik, o‘zaro hurmat va totuvlik muhitini saqlab, barcha soha va tarmoqlarda fidokorona mehnat qilib ko‘zlagan yuksak maqsadlarimizga yeta olamiz.
Albatta, o‘z tarixida ne-ne sinov va mashaqqatlardan munosib o‘tgan mard va olijanob xalqimiz bunga har tomonlama qodir.
Bu yo‘lda el-yurtimizga mansub mehr-oqibat, o‘zaro birlik va jipslik biz uchun beqiyos kuch-qudrat manbai bo‘lib xizmat qiladi, deb ishonaman.
Siz, azizlarni muqaddas Qurbon hayiti bilan yana bir bor chin dildan tabriklab, barchangizga tinchlik-xotirjamlik, sihat-salomatlik, xonadonlaringizga fayzu baraka tilayman.
Qutlug‘ ayyom barchamizga muborak bo‘lsin!
Shavkat Mirziyoyev,
O‘zbekiston Respublikasi Prezidenti