Sayt test holatida ishlamoqda!
16 Iyun, 2025   |   20 Zulhijja, 1446

Toshkent shahri
Tong
03:04
Quyosh
04:49
Peshin
12:29
Asr
17:39
Shom
20:01
Xufton
21:40
Bismillah
16 Iyun, 2025, 20 Zulhijja, 1446

Farzand bilan mehr-muhabbatni mustahkamlovchi 80 uslub (2 qism)

05.06.2024   4456   3 min.
Farzand bilan mehr-muhabbatni mustahkamlovchi 80 uslub (2 qism)
  1. Dam olish kunlari farzandlaringizni mashinangizda sayrga olib chiqing.
  2. Farzandlaringiz bilan birgalikda turmush o'rtog'ingiz uchun kutilmagan sovg'a tayyorlang.
  3. Dam olish kunlari iloji boricha vaqtingizni farzandlaringiz bilan o'tkazing.
  4. Oilaviy suratlar olishga odatlaning. Har bir surat tagiga surat olingan sana va suratdagilarning ismini yozib qo'ying. Yillar o'tgach mana shular asosida farzandlaringiz atrofdagi qarindosh-urug', yoru do'stlarni yaqindan taniydilar.
  5. Farzandingizga kartochkalardan birini tanlashni taklif qiling. Ularga quyidagilar yozilgan bo'lsin: “Oilaviy tushlik qilish”, “Dadajon bilan birga o'yin o'ynash”, “Oyijon bilan bozorga borish”, “Bobo-buvilarnikiga mehmonga borish” va hokazo.
  6. Farzandingizni yaxshi ko'rishingizni anglatuvchi holatda suratga tushing.
  7. Farzandingiz bilan daryo yoki dengiz bo'yida sayr qiling.
  8. Oilangiz davrasida barchaga birdek yoqadigan kuy yoki qo'shiq tinglang.
  9. Biror tele yoki radiokanal orqali farzandlaringizga tabrik yo'llang.
  10. Havo sharida uchish, dengizda suzish kabi sayohat uyushtiring.
  11. O'quv yilining birinchi kunida, albatta, kichik farzandingiz bilan maktabiga boring va sinf xonasiga kuzatib qo'ying.
  12. Farzandlaringiz bilan biror joyga chiqib quyosh botishi yoki chiqishini kuzating.
  13. Oila davrasida farzandlaringiz bilan qilgan o'zaro suhbatingizni videoga oling va esdalik uchun saqlab qo'ying.
  14. Farzandlaringizga bolalikdagi do'stlaringiz, ular bilan bo'lib o'tgan qiziqarli voqealar haqida gapirib bering.
  15. Ota-onangizdan eski uslubdagi o'yinchoq yasab berishlarini so'rang. Ular bolalik davrlarida qanday o'yinlar o'ynashganini aytib berishlarini iltimos qiling.
  16. Oilaviy barcha suratlaringizni al'bomga joylang. Har bir suratni joylayotganingizda surat bilan bog'liq bo'lgan xotiralaringizni ularga gapirib bering. Oilaviy al'bomingizni far­zandlaringiz bilan tez-tez ko'rib turing. O'tib ketgan insonlarni xotirlang.
  17. Hafta mobaynida farzandlaringizning har biri uchun xos bir vaqt belgilab qo'ying. Agar imkoniyatingiz bo'lsa, ularni har biri bilan o'sha vaqtda alohida suhbatlashing.
  18. Kichik yoshdagi farzandlaringiz bilan qiziqarli o'yinlar tashkil qiling. Muhimi, o'rtangizda mehr-muhabbat hosil bo'lsin.
  19. Ota-onangiz sizni tarbiya qilishda qo'llagan go'zal tarbiya usullaridan siz ham foydalaning.
  20. Kichik qog'oz bo'laklariga turli xil vazifalarni yozing. Farzandlaringiz ularning orasidan birortasini tanlasin. Vazifalar sodda va maroqli bo'lsin. Misol uchun: oila a'zolari bilan birgalikda sharbat ichish; televizor ko'rish; yaqinlar bilan telefon orqali bog'lanib hol-ahvol so'rashish va hokazo.

    Davomi bor...

    Abdulloh Muhammad Abdulmu'tiyning "Mehr oyi" kitobidan

    G'iyosiddin Habibulloh, Hikmatulloh Ro'zaliyev tarjimasi.

Maqolalar
Boshqa maqolalar
Maqolalar

Fatvo berishga kim haqli

13.06.2025   4347   6 min.
Fatvo berishga kim haqli

Hozirgi kunda islom jamiyatida, dunyo musulmonlari, ayniqsa yurtimiz musulmonlari orasida fatvo berish, fatvo chiqarish, fatvo so‘rash kabi atamalar ko‘p ishlatilmoqda.

Fatvo so‘zi arab tilida “savolga javob berish” ma’nosini anglatadi. Istilohda esa, shar’iy masala haqida savol so‘ragan odamga dalilga asoslangan holda javob berishdir.

Birinchi fatvo beruvchi shaxs Rasululloh sallallohu alayhi vasallam bo‘lgan. U zotdan keyin sahoba, tobein va keyingi davr mujtahid ulamolar fatvo berish bilan shug‘ullanib, bugungi kunimizgacha davom etib kelmoqda. Shariatda musulmonlar hayotida paydo bo‘ladigan savollar bo‘yicha fatvo berilishi bu farzi kifoya amal hisoblanadi.

Qur’on va hadisdan hukm chiqarishning o‘ziga xos talablari mavjud. Qur’on va hadisga asoslangan holda musulmonlarning manfaatlaridan kelib chiqib, inson kamoloti, jamiyat farovonligi hamda uning ijtimoiy taraqqiyotini ko‘zlab hukm chiqarish alohida bilim va malaka talab etadi. Mo‘tabar manbalarda qayd etilishicha, arab tili, Qur’on va hadis ilmlari, fiqh va islom tarixini juda chuqur va mukammal biladigan va yana boshqa zarur sifatlarga ega bo‘lgan shaxslargina fatvo berish huquqiga ega.

Shunday bo‘lsa-da, biror-bir masalada hukm chiqarish zarur bo‘lib qolsa, avvalo, mazhablar ta’limotiga tayaniladi, agar ularning birortasida masalaning yechimi topilmasa, musulmonlarga osonlik va qulay sharoit yaratish nuqtayi nazaridan muftiylar tomonidangina fatvolar chiqarilishi mumkin.

Fatvo berish mas’uliyati. Islomda fatvoning o‘rni va ta’siri muhim bo‘lishi bilan birga o‘ta mas’uliyatli vazifa ham hisoblanadi. Chunki fatvoda Allohning hukmlarini bayon qilish maqsad qilinib, unda halol-harom, savob-gunoh, jannat-do‘zax orasidagi amallar ko‘rsatib beriladi. Imom Shotibiy rahmatullohi alayh fatvo berish mas’uliyati haqida to‘xtalib quyidagilarni ta’kidlaydi: “Muftiy – hukmlarni yetkazishda Rasululloh sallalllohu alayhi vasallamga o‘rinbosar va U zotning merosxo‘ri hisoblanadi. Shu bois u Rasululloh sollalllohu alayhi vasallam nomlaridan gapiradi”.

Haqiqatan, Abdulloh ibn Ja’fardan rivoyat qilingan hadisi sharifda Rasululloh sallallohu alayhi vasallam bu borada ogoh va e’tiborli bo‘lishga chaqirib: “Fatvoga jur’atli bo‘lganlaringiz do‘zaxga jur’atli bo‘lganingizdir”, – deganlar. Ya’ni voqe’likni to‘liq o‘rganmay, yetarli bilim va tajriba orttirmay turib, qo‘rqmasdan jur’at bilan fatvo berishdan qaytarganlar.

Buni chuqur anglab yetgan musulmonlarning dastlabki avlodlari o‘zlaridan ilmli shaxs bo‘lgan joyda sukut saqlashgan.

Imom Molik rahmatullohi alayhdan goho ellikta masala so‘ralganda bittasiga ham javob bermagan paytlari bo‘lgan ekan. Buning sababi so‘ralganda, u zot: “Javob beruvchi o‘zini avval do‘zaxga solib ko‘rsin, xalos bo‘lishiga ko‘zi yetsa, javob bersin”, – degan ekanlar.

Abu Aliy az-Zarirdan rivoyat qilinadi: “Men Ahmad ibn Hanbalga: “Kishiga fatvo berishi uchun qancha hadis yetarli, yuz ming hadis yetadimi?” – dedim. U: “Yo‘q”, – dedi. Men: “Ikki yuz mingchi?” – dedim. U: “Yo‘q”, – dedi. Men: “Uch yuz mingchi?”, – dedim. U: “Yo‘q”, – dedi. Men: “To‘rt yuz mingchi?” – dedim. U yana: “Yo‘q”, dedi. Shunda men: “Besh yuz ming bo‘lsachi?”, – degan edim, u: “Umid qilaman”, – deb aytdi”.

Yuqorida keltirib o‘tilgan dalillardan kelib chiqib shuni ta’kidlash lozimki, fatvo berish o‘ta mas’uliyatli bo‘lganligi jihatidan unga hamma ham jur’at qilavermaydi. Buning ortida jamiyat va unda yashovchi shaxslar uchun g‘oyat xatarli zararlar kelib chiqish mumkin. Shayx Ramazon Butiy aytadi: “Hukm chiqarish ilmi tibbiyot ilmi kabidir. Mabodo birovning farzandi og‘ir kasalga chalinib qolsa, u tegishli tashxis qo‘yish va farzandini davolash uchun tibbiyotga oid kitoblarni titadimi yoki malakali shifokorning oldiga boradimi? To‘g‘risini aytganda, uning esi joyida bo‘lsa, keyingi yo‘lni tanlaydi. Dinda ham xuddi shunday. Aslida bu tibbiyotdan ham muhimroq, shuningdek qamrovi jihatidan xavfliroqdir”.

Hech kimga sir emaski, hozirgi kunda ba’zilar o‘zicha oyat va hadislardan hukm chiqarib, noto‘g‘ri fatvolar berib, o‘zini va o‘zgalarni adashtirmoqda.

Ba’zi bir e’tirof etilmagan shaxslar yoki ma’lum maqsadlarga yo‘naltirilgan tuzilmalar tomonidan qo‘shtirnoq ichidagi “fatvolar” insonlarni islom ma’rifatidan uzoqlashtirishga sabab bo‘lmoqda. Ayniqsa, ularning “jihod”, “bay’at”, “takfir”, “bemazhablik”, “hijrat” kabi masalalardagi asossiz “fatvolari” nohaq qon to‘kilishiga olib bormoqda va insonlarning kafolatlangan huquqlariga rahna solinishiga sabab bo‘lmoqda. Imom Molik rahmatullohi alayhning ustozlari bo‘lgan Robia ibn Abdurahmonni yig‘lagan holda ko‘rib, undan buning sababini so‘rashganda, u zot kishilar diniy-huquqiy savollarni bilimi bo‘lmagan shaxslardan so‘rashayotganini ko‘rganligi, bu holat islomda katta xatar paydo bo‘lganligidan darak berishini ta’kidlagan ekanlar.

Demak, chuqur ilm, tajriba va xolislik kabi fazilat bo‘lmay turib, fatvo berishning oqibati xayrli emas. Shunday ekan, ba’zi doira yoki guruhlar tomonidan islomda ulkan masala sifatida qaralgan hukmlarga e’tiborsiz va mas’uliyatsizlik bilan fatvo berishlari o‘zlari va o‘zgalarni ham adashtirishdir. Qanday qilib shaxslarni va butun boshli jamiyatlarni kofirga chiqarib, jamoat oldida ularga ergashishni harom demoqdalar?!

Xulosa qilib aytganda, fatvoning musulmonlar hayotida o‘rni muhimligini hisobga olgan holda ilm va salohiyatsiz fatvo berish yoki uchragan kishidan fatvo so‘rash va unga ergashib ketaverish adashuvga olib boradi. Bu kabi salbiy oqibatlarni keltirib chiqaruvchi ixtiloflarning oldini olish birinchi navbatda islom markazlari va ulamolarning muhim vazifalaridan hisoblanadi.

Alloh taolo barchamizni turli ixtilof va fitnalardan asrab, barchamizni mamlakatimizda ming yillardan beri amal qilib kelinayotgan hanafiy mazhabimizga muvofiq ibodatlarini ado etib, zavqli hayot kechirish baxtiga nasib etsin!


Manba: "Ahli sunna" telegram kanali

MAQOLA