“Islom fiqhi asoslari” kitobi nashrdan chiqdi
O'zbekiston musulmonlari idorasi raisining birinchi o'rinbosari Homidjon domla Ishmatbekovning “Islom fiqhi asoslari” nomli kitobi nashrdan chiqdi.
Mazkur kitobda islom fiqhining paydo bo'lish tarixi va ildizlari haqida bayon etilgan. Islom shariatining o'ziga xos xususiyatlari haqidagi ushbu kitobning yozilishidan maqsad dinimiz voqeiy din ekani va barcha zamonu makonlarga ham muvofiq kelishini ilmiy asoslashdan iboratdir.
Hijriy ikkinchi va uchinchi asrlarga kelib mujtahid ulamolar tomonidan Islom shariati ahkomlarini o'zida ifodalovchi mazhablarga asos solindi. Jumladan, Ko'fada Imom Abu Hanifa, Madinada Imom Molik, Hijozda Imom Shofe'iy va Bag'dodda Imom Ahmad rahimahumulloh o'zlaridan avvalgi zotlarning ta'limi asosida keyingi avlodga shariat ahkomlariga amal qilishning yo'l-yo'riqlarini ko'rsatib berdilar.
Ularning ilmiy asosga ega usullari va joriy qilgan qoidalari hozirgacha o'z ahamiyatini yo'qotmay kelayotgani mavjud mazhablarning naqadar puxta va mustahkam ekaniga dalolat qiladi. Ushbu kitobda mavjud to'rt mazhabning aynan Qur'on va sunnatga asoslangani va dinimizning zamonlar osha yuzaga keladigan muammolarini hal qilishda aynan mazhab ulamolari joriy qilgan usul va qoidalarga asoslanishi ham bayon etilgan.
Alloh taolo ushbu kitobni ilm talabida bo'lgan kitobxonlarga manfaatli aylasin.
O'zbekiston musulmonlari idorasi Matbuot xizmati
Shayx hazratlarining kitoblari Masjidi Nabaviyda
Fazilatli shayx Muhammad Sodiq Muhammad Yusuf hazratlari qoldirgan boy ilmiy merosi nafaqat O‘zbekistonda, balki dunyoning turli nuqtalarida, xususan, Islom olamining tabarruk maskani bo‘lmish Masjidi Nabaviy kutubxonasida ham saqlanib kelyapti.
2017 yilda shayx hazratlarining bir qator kitoblari ilk bor Masjidi Nabaviy kutubxonasiga taqdim etilgan edi. Shundan buyon ziyoratga borgan hamyurtlarimiz ushbu kutubxonadan hazratning asarlarini o‘z ona tilimizda mutolaa qilish imkoniyatiga ega bo‘lib kelishyapti.
Masjidi Nabaviy kutubxonasi masjidning 10-eshigi yonida joylashgan. Kutubxonada 170 000 dan ortiq kitob saqlanadi. Asosiy adabiyotlar arab tilida bo‘lsada, 20 dan ortiq xorijiy tillardagi diniy manbalar ham jamlangan. Kutubxonadan bir vaqtning o‘zida 300 dan ortiq kitobxon foydalanishi mumkin.
Kutubxonada xorijiy tillardagi adabiyotlar uchun alohida xona ajratilgan. U yerda ingliz, rus, fransuz kabi jahon tillari qatorida o‘zbek tili bo‘limi ham bor. Ushbu bo‘limda shayx Muhammad Sodiq Muhammad Yusuf hazratlarining qalamlariga mansub 50 dan ortiq asar bor. Jumladan:
– «Hadis va Hayot» silsilasi;
– «Tafsiri Hilol»;
– «Kifoya»;
– «Ruhiy tarbiya»;
– «Zikr ahlidan so‘rang»;
– «Odoblar xazinasi»;
– «Xislatli hikmatlar sharhi»;
– «Baxtiyor oila» va boshqalar.
@islomuz
